God Jehova i laik yumi mas kamapim tingting bilong yumi long em long rot bilong beten long olgeta taim. (Luk 18:1-7) Em i save harim ol beten bikos em i laik helpim yumi. Papa bilong yumi long heven i laik yumi mas beten long em, olsem na i stret yumi mekim olsem.—Ritim Filipai 4:6.

Yumi no beten bilong kisim helpim na em tasol, nogat. Beten i helpim yumi long go klostu long God. (Song 8:3, 4) Taim yumi kamapim tingting bilong yumi long God long olgeta taim, bai yumi go klostu moa long em.—Ritim Jems 4:8.

Taim yumi beten, God i no laik yumi mas yusim ol kain kain bilas tok o kolim ol wankain tok. Na tu, i no olsem yumi mas brukim skru o daunim het na dispela bai mekim na God i harim yumi. Jehova i laik yumi mas kamapim tingting bilong yumi taim yumi beten. (Matyu 6:7) Olsem, long taim bilong lain Israel long bipo, Hana i gat hevi insait long famili, olsem na em i beten. Tasol bihain taim em i no bel hevi moa na em i amamas, em i beten na tenkyu long God.—Ritim 1 Samuel 1:10, 12, 13, 26, 27; 2:1.

Beten em wanpela gutpela presen tru! Yumi inap kamapim tingting bilong yumi long Krieta bilong yumi. Na tu, yumi inap tok tenkyu na givim biknem long em. Olsem na yumi laik yusim dispela gutpela presen em God i givim long yumi.—Ritim Song 145:14-16.