Mi go bikpela long Los Angeles, California, long Amerika. Mipela i stap long ol ples we ol man i insait long lain raskol na ol i save kisim drak. Papamama i gat 6-pela pikinini, na mi namba 2.

Mipela i save go wantaim mama long lotu evanjelikal. Tasol taim mi kamap tineja, mi insait long ol pasin nogut. Long olgeta Sande, mi save bung wantaim ol narapela bilong singsing long haus lotu. Long ol narapela de bilong wik, mi tingting tasol long pati, kisim drak, na mekim pasin pamuk.

Mi gat pasin bilong belhat hariap. Mi save yusim olgeta kain samting bilong pait na bai mi ken win. Ol tok mi lainim long haus lotu i no helpim mi. Mi save tok: “Bikpela i save bekim rong, na mi helpim bilong em!” Long 1968 samting taim mi stap long haiskul, i gat wanpela lain politik em ol i kolim Black Panthers. Dispela lain i strong long gavman i mas kamapim sampela senis. Samting ol i mekim i kirapim mi long joinim wanpela lain sumatin husat i tokaut long raits bilong mipela. Sampela taim mipela i mekim ol protes, na ol i mas pasim skul inap sotpela haptaim.

Pasin bilong protes i no helpim mi long kamapim belhat bilong mi na bai mi ken amamas. Olsem na mi na sampela pren i kirap long birua long ol man. Sampela taim mipela i save lukim ol piksa bilong lain Afrika long bipo, em lain Amerika i bringim ol i kam olsem sleiv. Ol i bin mekim nogut tru long dispela lain. Mipela i bel hevi tru long pasin ol i bin mekim long ol Afrika, olsem na mipela i paitim ol yangpela waitskin long haus piksa. Bihain, mipela i go long ol ples we i gat ol waitskin, na mipela i painim sampela man moa bilong paitim.

Taim mi gat 19 krismas samting, mi na ol brata bilong mi i insait long pasin raskol. Na planti taim ol polis i arestim mipela. Wanpela brata bilong mi i insait long lain raskol i nogut tru, na mi bung wantaim ol. I stap bilong mi i wok long go nogut moa.

Papamama bilong wanpela pren bilong mi ol i Witnes Bilong Jehova. Ol i singautim mi long i go long ol miting bilong kongrigesen, na mi orait long go wantaim ol. Long fes miting mi luksave olsem ol Witnes i narakain tru long ol narapela lotu. Olgeta i gat Baibel na ol i opim Baibel long taim bilong miting. Na ol yangpela tu i mekim ol tok long dispela miting! Mi kirap nogut long save olsem God i gat nem, em Jehova, na ol i save kolim dispela  nem. (Song 83:18, NW) Ol lain insait long kongrigesen i bilong narapela narapela kantri, tasol olgeta i stap wanbel wantaim.

Pastaim mi no laik stadi long Baibel wantaim ol Witnes, tasol mi amamas long go long ol miting. Wanpela nait mi stap long miting bilong ol Witnes, na sampela pren bilong mi i go long bung bilong ol man i save pilaim musik. Long dispela hap, ol i paitim wanpela yangpela na kilim em i dai, long wanem, em i no givim saket bilong em long ol. Long neks de, ol i tok hambak long samting ol i bin mekim. Na taim ol i sanap long kot, ol i no ting dispela rong i bikpela samting. Kot i makim klostu olgeta bilong ol long stap kalabus long laip olgeta. Mi amamas tru olsem mi no bin go wantaim ol long dispela nait! Nau mi pasim tok long bel olsem mi mas mekim sampela senis na kirap stadi long Baibel.

Mi lukim olsem planti man i save bel nogut long ol man bilong narapela ples, tasol mi kirap nogut long pasin bilong ol Witnes. Olsem, wanpela taim wanpela waitskin Witnes i go long narapela kantri, na em i lusim ol pikinini bilong em wantaim wanpela blakskin famili. Na tu, wanpela famili waitskin i kisim wanpela yangpela blakskin i kam long haus bilong ol, long wanem, em i no gat ples slip. Nau mi bilip olsem pasin bilong ol Witnes Bilong Jehova i stret wantaim tok bilong Jisas long Jon 13:35, olsem: “Sapos pasin laikim i stap namel long yupela, orait olgeta bai save olsem yupela i disaipel bilong mi.” Mi save olsem mi painim wanpela lain brata tru.

Taim mi stadi long Baibel, mi kisim save olsem mi mas senisim tingting kranki bilong mi. Mi mas kisim nupela tingting na bai mi ken stap bel isi, na mi luksave olsem dispela em gutpela rot bilong bihainim long i stap bilong mi. (Rom 12:2) Mi wok long kamap strong, na long Janueri 1974, mi kisim baptais olsem wanpela Witnes Bilong Jehova.

Maski mi baptais pinis, mi wok strong long daunim pasin bilong belhat hariap. Wanpela taim, mi autim tok long ol haus na wanpela man i stilim redio long kar bilong mi, olsem na mi ranim em. Tasol taim mi go klostu long em, em i lusim redio na ranawe. Mi stori long ol narapela long samting i kamap, na wanpela elda i askim mi: “Stephen, sapos yu bin holim dispela man, bai yu mekim wanem?” Dispela askim i kirapim mi long wok strong yet long daunim pasin bilong belhat na stap wanbel wantaim ol narapela.

Long Oktoba 1974, mi kirap long autim tok fultaim, dispela i makim olsem mi mas lusim 100 aua long olgeta mun long skulim ol man long Baibel. Bihain, mi volantia long hetkota bilong ol Witnes Bilong Jehova long Brooklyn, New York. Long 1978, mi go bek long Los Angeles bilong lukautim mama bilong mi, long wanem, em i bin sik. Tupela yia bihain mi maritim Aarhonda. Em i helpim mi long lukautim mama i go inap long taim mama i dai. Bihain mitupela Aarhonda i go long Wastaua Baibel Skul Bilong Gileat, na mipela i kisim asainmen long i go long Panama bilong mekim wok misineri. Nau mipela i mekim yet dispela wok long Panama.

Bihain long mi baptais, planti taim ol samting i kamap bilong mekim mi belhat hariap. Tasol mi lain long lusim kwik ol man i laik kirapim mi long pait na mi save mekim ol samting bilong pinisim pait. Meri bilong mi na ol narapela i tok amamas long pasin bilong mi long bosim bel. Na mi tu i kirap nogut olsem mi inap mekim olsem! Tasol mi no senisim pasin bilong mi long strong bilong mi yet, nogat. Mi bilip olsem Baibel i gat strong long helpim ol man long senisim pasin bilong ol na kisim nupela pasin.—Hibru 4:12.

Tok bilong Baibel i helpim mi long luksave olsem i stap bilong mi i gat as bilong en, na tu, em i skulim mi long pasin bilong stap wanbel. Nau mi no save paitim moa ol man, mi save helpim ol long kisim save long God. Na tu, mi bin stadi long Baibel wantaim wanpela man em bipo mi birua long em long taim mipela i stap long haiskul! Bihain long em i baptais, mitupela i stap long wanpela haus inap sampela haptaim. Long nau, mipela i stap olsem ol gutpela pren yet. Mi na meri bilong mi i bin helpim 80 manmeri long rot bilong stadi wantaim ol long Baibel, na ol i kamap Witnes Bilong Jehova.

Mi tenkyu tru olsem Jehova i helpim mi na i stap bilong mi i gat as bilong en, na mi amamas long stap namel long wanpela lain brata tru.