Mi go bikpela long biktaun Alicante, em ples i stap long hap is bilong Spen. Long taim mi yangpela yet, famili bilong mi i no pas gut wantaim, olsem na planti taim mi raun long ol strit na mi no stap long haus. Klostu long haus bilong mipela i gat wanpela stua bilong stretim taia. Na mi kamap pren bilong José María, em wanpela wokman bilong dispela stua. Em i tingim mi tru na ol pasin em i mekim em samting mi no bin lukim long famili bilong mi. Maski em i gat 20 krismas winim krismas bilong mi, long taim bilong hevi, em i stap olsem brata tru bilong mi.

José María i kirap long stadi long Baibel wantaim ol Witnes Bilong Jehova. Mi luksave olsem em i laikim tru ol tok bilong Baibel, olsem na oltaim em i toktok wantaim mi long ol tok i tru bilong Baibel. Tru tru mi nogat interes, tasol long pasin rispek mi putim yau long ol tok bilong em. Mi tineja yet long dispela taim, olsem na mi tingting long planti samting. Tasol nau tingting bilong mi i senis.

Mi no laik long mekim planti stori long hau dispela eksiden i kamap. Tasol mi inap tokaut olsem mi yet i no bihainim savetingting. Insait long wanpela de tasol i stap bilong mi i senis olgeta. Pastaim mi bin stap olsem wanpela tineja husat i gat bikpela strong, tasol nau mi paralais na stap long haus sik. Dispela i givim bikpela hevi long mi. Mi save tingting olsem, ‘I gat gutpela samting bai painim mi?’

José María i kam lukim mi, na kwiktaim em i stretim rot long ol Witnes Bilong Jehova long kongrigesen i stap long dispela hap long visitim mi long haus sik. Mi amamas tru olsem oltaim ol i save kam visitim mi. Bihain stret long mi lusim haus sik, mi kirap stadi long Baibel. Mi kisim save long as na ol man i save karim pen na hevi na dai, na bilong wanem God i larim ol hevi long kamap. Na tu, mi kisim save long tok promis bilong God long ol samting bai kamap bihain. Olsem, ol stretpela manmeri bai stap long olgeta hap bilong graun, na long dispela taim no gat man bai i tok: “Mi gat sik.” (Aisaia 33:24) Dispela em fes taim mi kisim save long wanpela gutpela samting we mi inap bilip na wet long en.

Taim mi lusim haus sik, mi givim bel tru long stadi long Baibel. Mi gat wanpela spesel wilsia, na dispela i helpim mi long go long ol miting bilong ol Witnes Bilong Jehova, na tu, mi inap long autim tok wantaim ol. Long Novemba 5, 1998, taim mi gat 20 krismas mi kisim baptais long wanpela tab bilong waswas. God Jehova i helpim mi long tingim olsem laip bilong mi i gat as bilong en. Tasol mi mas mekim wanem bilong soim tenkyu bilong mi?

Mi no laik larim hevi bilong mi i pasim mi, olsem na mi givim bel yet long mekim olgeta samting mi inap mekim bilong lotuim Jehova. (1 Timoti 4:15) Pastaim i hatwok tru long mi mekim olsem, long wanem, famili bilong mi i birua long nupela bilip bilong mi. Tasol ol wanbilip i stap olsem ol brata na sista bilong mi. Oltaim ol i save helpim mi long go long ol miting na insait long wok bilong autim tok.

Tasol mi luksave olsem mi nidim ol man long lukautim mi long olgeta wan wan de. Inap longpela taim mi painim haus bilong lukautim ol man i gat bagarap long bodi. Bihain liklik, mi painim kain ples olsem long Valencia, em biktaun i stap 160 kilomita long hap not bilong Alicante. Mi stap long dispela haus i kam inap long nau.

Maski mi slip tasol long bet, mi laik tru long mekim wok bilong God. Mi yusim pensen mani em gavman na ol narapela oganaisesen i givim na mi baim wanpela kompiuta em ol i putim klostu long bet bilong mi. Na tu, mi baim wanpela mobail fon. Long olgeta moning, ol wokman bilong haus mi stap long en i save onim kompiuta na fon bilong mi. Ol i putim wanpela liklik masin aninit long maus bilong mi na dispela i helpim mi long kontrolim kompiuta. Na tu, i gat wanpela stik mi save putim long maus na bai mi inap rait long kompiuta na fon.

Olsem wanem ol dispela masin i helpim mi? Mi inap yusim ol dispela masin long go long Web-sait jw.org, na tu, Watchtower ONLINE LIBRARY long Intenet. Ol dispela gutpela tul i helpim mi tru! Long olgeta de, mi save lusim sampela aua long ritim na mekim wok painimaut long ol buk na nius bilong Baibel. Na dispela i helpim mi long kisim save long God na ol gutpela pasin bilong en. Na maski sampela taim mi bel hevi o mi pilim olsem mi stap wanpis, i gat sampela tok long Web-sait we i save givim nupela strong long mi.

Long rot bilong kompiuta mi inap harim na bekim ol tok long miting. Na tu, mi inap beten, mekim ol tok, na ritim Wastaua long taim ol i makim mi long mekim olsem. Maski mi no inap bung wantaim ol brata sista long taim bilong miting, mi save olsem mi tu i hap bilong dispela kongrigesen.

Long rot bilong kompiuta na fon, mi inap long mekim gut wok autim tok. Maski mi no inap long go long ol haus bilong ol man olsem ol Witnes Bilong Jehova i save mekim, dispela i no pasim mi long autim tok. Mi save yusim ol dispela masin long tokaut long ol narapela long bilip bilong mi. Mi amamas tru long toktok wantaim ol man long rot bilong fon, olsem na ol elda long kongrigesen i askim mi long go pas long lukautim wok bilong autim tok long fon. Dispela pasin bilong autim tok i helpim tru ol brata sista husat i gat hevi long helt na ol i no inap long lusim haus bilong ol.

Tasol mi no kisim helpim long rot bilong teknoloji tasol. Long olgeta de, ol pren bilong mi i visitim mi.  Na tu, ol i kam wantaim ol wanfamili bilong ol na ol man i gat laik long kisim save long Baibel. Planti taim ol i save tokim mi long stori wantaim ol dispela man. Na sampela taim ol famili i visitim mi na bai mi ken insait long famili lotu bilong ol long apinun. Mi save amamas tru taim ol liklik pikinini i sindaun klostu long bet bilong mi na tokim mi long wai na ol i laikim Jehova.

Mi amamas olsem planti man i save visitim mi. Long klostu olgeta de, ol man i kam long rum bilong mi, sampela em ol pren bilong mi husat i stap long ol ples klostu na sampela long ol longwe ples. Ol wokman bilong dispela hap i kirap nogut long lukim olsem ol dispela man i tingim mi tru. Long olgeta de, mi tenkyu long Jehova olsem mi stap insait long wanpela gutpela lain brata.

Taim ol man i tok gude long mi na askim sapos mi orait, mi save tok: “Mi stap wankain tasol, mi no givap!” Mi save olsem mi no karim dispela hevi long strong bilong mi yet. Maski wanem wanem samting i kamap, olgeta Kristen i insait long wanpela pait, em “gutpela pait bilong bilip.” (1 Timoti 6:12) Wanem samting i helpim mi long karim dispela hevi insait long planti yia? Olgeta de mi save prea long Jehova na tok tenkyu long em i helpim mi long luksave olsem laip i gat as bilong en. Na mi givim bel tru long mekim wok bilong God, na dispela i helpim mi long tingim ol gutpela samting bai kamap bihain.

Planti taim mi save tingting long ol samting bai kamap long nupela taim, long dispela taim mi inap long ron na kalap gen. José María em gutpela pren bilong mi i gat sik polio. Olsem na sampela taim mi save tok pilai long samting bai kamap sapos mipela i ron long maraton resis. Mi save tok: “Husat bai win?” Na em i save tok: “Mi no wari long husat bai win. Bikpela samting em yumi stap long Paradais bilong ron long dispela resis.”

Taim mi kisim bagarap long bodi, i hatwok long mi mekim ol senis long i stap bilong mi. Mi save olsem long taim mi stap tineja, mi bin mekim wanpela longlong pasin tru na dispela i givim hevi long mi. Maski i olsem, mi amamas olsem Jehova i no lusim tingting long mi. Em i givim mi planti gutpela blesing, mi stap insait long bikpela lain brata, mi save long as na mi stap laip, mi kisim amamas long helpim ol narapela, na tu, mi bilip na wet long ol gutpela samting bai kamap bihain. Olsem na mi inap long tok Jehova i givim mi planti gutpela blesing.