“WAI na God i larim dispela hevi i painim mi?” Dispela em askim bilong Sidnei, husat i gat 24 krismas na em i stap long Brasil. Em i kisim eksiden long wanpela pablik ples bilong waswas na nau em i paralais, olsem na em i mas sindaun long wilsia.

Ol man inap bel hevi long God taim ol i kisim eksiden, bikpela sik i painim ol, wanpela ol i laikim i dai, o disasta na woa samting i kamap. Wankain samting i save painim planti man. Bilipman Jop bilong bipo i bin bungim planti hevi. Em i popaia na em i tok long God olsem: “God, mi sanap long ai bilong yu na singaut long yu long helpim mi, tasol yu save lukluk tasol long mi na yu no putim yau long singaut bilong mi. Yu no save marimari liklik long mi. Nogat. Yu save mekim nogut tasol long mi long olgeta strong bilong yu.”—Jop 30:20, 21.

Jop i no save husat i givim hevi long en, na tu, em i no save long risen na ol hevi i kamap. Yumi amamas olsem Baibel i helpim yumi long save long risen na ol hevi i painim yumi, na tu, ol samting yumi mas mekim long taim bilong hevi.

Baibel i tok long God olsem: “God bilong yumi i save stap olsem oltaim. Em i olsem wanpela bikpela strongpela ston i no save senis. Oltaim em i save bihainim tok bilong en na em i no save giaman. Na pasin bilong en i gutpela na stretpela tasol.” (Lo 32:4) Olsem na yu ting em laik bilong God husat i gat “gutpela na stretpela” pasin i larim ol man i karim pen na hevi? Na yu ting em bai kamapim ol hevi bilong givim strafe long ol man o helpim ol long bihainim stretpela pasin?

Nogat tru. Baibel i tok: “Taim traim i painim wanpela man, em i no ken tok: ‘God i traim mi.’ Ol samting nogut i no inap traim God, na tu, God i no save traim man.” (Jems 1:13) Baibel i tok taim God i wokim fes man na meri em i givim gutpela sindaun long ol. Em i putim Adam na Iv long wanpela gutpela ples, givim olgeta samting ol i nidim bilong i stap laip, na tu, em i givim gutpela wok long ol. God i tokim tupela olsem: “Yupela i mas kamap planti na i go sindaun long olgeta hap bilong graun.” Olsem na i no gat risen long Adam na Iv i bel hevi long God.—Stat 1:28.

Long bipo yet ol man i karim planti pen na hevi. Tasol long nau, ol hevi bilong ol i go nogut moa. Na dispela i truim tok bilong Baibel olsem: “Olgeta samting God i wokim, ol i wok long krai na pilim pen wantaim i kam inap long nau.” (Rom 8:22) Bilong wanem i gat pen na hevi i stap?

Long kliagut long risen na pen na hevi i stap, i gutpela yumi save long samting i kamap long bipo. Wanpela bikhet ensel, em bihain ol i kolim em Satan na Devil, i giamanim Adam na Iv na ol i sakim stretpela lo bilong God long “no ken kaikai pikinini bilong dispela diwai bilong givim gutpela save long wanem samting i gutpela na wanem samting i nogut.” Satan i tokim Iv olsem ol i no inap dai sapos ol i sakim tok bilong God na kaikai prut bilong dispela diwai. I olsem em i tokim tupela olsem God i giaman. Na tu, Satan i sutim tok olsem God i pasim raits bilong ol man long skelim wanem samting i gutpela na wanem samting i nogut. (Stat 2:17; 3:1-6) Satan i tok ol man bai stap gutpela moa sapos God i no bosim ol. Ol tok Satan i kamapim long gaden Iden i mekim na yumi laik save long bekim bilong wanpela bikpela askim, Yu ting i stret God i bosim dispela graun?

Na tu, Satan i sutim tok long ol man olsem ol i mekim wok bilong God, long wanem, ol i laik bai God i helpim ol. Satan i toktok wantaim God na mekim dispela tok long bilipman Jop olsem: “Oltaim yu save lukaut gut long em na long famili bilong en na long olgeta samting bilong en. . . . Tasol sapos yu bagarapim na rausim dispela olgeta samting bilong en, orait bai yu lukim em i tok nogut tru long yu.” (Jop 1:10, 11) Maski Satan i sutim tok long Jop, i olsem em i tok olgeta man i mekim wok bilong God, long wanem, God i lukautim ol.

Wanem gutpela rot bilong stretim ol dispela tok  Satan i mekim long God na long ol man? God i gat olgeta savetingting i save long rot bilong stretim dispela hevi, na bai yumi inap stap amamas. (Rom 11:33) Insait long sampela haptaim, God i larim ol man i mekim wok bos na bai ol i ken luksave husat i gat rait long bosim ol.

Long nau, i gat planti pen na hevi na dispela i soim olsem ol man i no inap bosim wokabaut bilong ol yet. Ol gavman bilong graun i no inap kamapim bel isi, gutpela sindaun, na amamas. Na tu, wok bos bilong ol man i bagarapim klostu olgeta hap bilong graun. Dispela i truim bikpela tok i tru bilong Baibel olsem: “Mipela man i no inap bosim wokabaut bilong mipela yet na bihainim ol rot mipela i laikim.” (Jeremaia 10:23) Wok bos bilong God tasol inap long bringim bel isi, gutpela sindaun na amamas long ol man inap oltaim, long wanem, em samting God i tingting pinis long mekim.—Aisaia 45:18.

Olsem wanem God bai inapim ol samting em i tingting pinis long mekim bilong helpim ol man? Jisas i skulim ol disaipel bilong em long beten olsem: “Kingdom bilong yu i mas i kam. Laik bilong yu i mas kamap long graun olsem em i save kamap long heven.” (Matyu 6:10) Klostu nau, long rot bilong Kingdom Bilong God, olgeta pen na hevi bai pinis. (Daniel 2:44) Ol man bai i no stap rabis, ol bai i no sik, na bai i nogat dai moa. Baibel i tok God bai “helpim ol rabisman i singaut long em.” (Song 72:12-14) Na Baibel i tok promis olsem: “I no gat man . . . bai i tok olsem, ‘Mi gat sik.’” (Aisaia 33:24) Na tu, Jisas i tok God bai tingim ol man i dai pinis na kirapim bek ol. Jisas i tok: “Taim i laik kamap na olgeta man i stap long matmat ol bai harim nek bilong Pikinini na kam ausait.” (Jon 5:28, 29) Em ol gutpela tok promis tru!

Tingim Sidnei em yumi bin stori long en long kirap bilong dispela atikol. Klostu 17 yia bihain long em i kisim eksiden, em i tok: “Mi no bin sutim tok long God Jehova long eksiden i painim mi, tasol mi mas tokaut olsem pastaim mi bel hevi long em. Sampela taim mi save bel hevi tru na krai taim mi tingim olsem mi paralais na mi no inap mekim moa ol wok. Tasol long rot bilong Baibel, mi luksave olsem dispela eksiden i no panismen i kam long God. Baibel i tok, ‘taim nogut i save painim yumi olgeta.’ Taim mi prea long Jehova na ritim ol skripsa i stori long ol dispela kain hevi, dispela i helpim mi long pas gut wantaim God, na mi stap amamas.”—Song 145:18; Saveman 9:11; 2 Korin 4:8, 9, 16.

Taim yumi tingim risen na God i larim pen na hevi i stap na hau Em bai pinisim ol dispela samting, dispela i helpim yumi long daunim pasin bilong bel hevi long God. Na dispela i strongim bilip bilong yumi olsem “God i save givim gutpela pe long ol man i wok strong long painim em.” Ol man i bilip long God na Pikinini bilong Em i no inap tru long bel hevi.—Rom 10:11; Hibru 11:6.