Yes. Baibel inap helpim yumi long daunim hevi bilong bel i kotim yumi. (Buk Song 32:1-5) Sapos yumi bin mekim wanpela rong tasol yumi sori tru long pasin yumi mekim, God bai fogivim yumi na helpim yumi na bai bel i no kotim yumi moa. (Buk Song 86:5) Tok bilong Baibel i soim olsem sampela taim pasin bilong bel i kotim yumi inap helpim yumi—em inap kirapim yumi long stop long mekim pasin i no stret, na wok strong long no ken mekim gen dispela pasin long bihain. (Buk Song 51:17; Provep 14:9) Tasol Baibel i givim tok lukaut long yumi mas was gut na yumi no ken larim bel i kotim yumi oltaim, ating yumi skelim yumi yet olsem yumi no inap mekim wanpela gutpela samting o yumi samting nating long ai bilong God. Kain tingting olsem inap mekim na yumi “bel hevi na givap.”​—2 Korin 2:7, Contemporary English Version.

•  Wanem ol samting inap mekim na bel i kotim yumi?

•  Hau mi inap karim hevi bilong bel i kotim mi?

•  Ol ves bilong Baibel i stori long taim bel i kotim yumi na God i save fogivim rong

 I gat planti samting inap mekim na bel i kotim yumi. Ating yumi pilim olsem yumi bagarapim bel bilong wanpela yumi laikim o yumi no bihainim wanpela lo em yumi save yumi mas bihainim. Sampela taim yumi pilim olsem bel i kotim yumi, tasol tru tru yumi no mekim wanpela rong. Olsem, sapos yumi putim ol mak i antap tumas na olgeta taim yumi no winim, bel bilong yumi bai kotim yumi. Em risen na Baibel i kirapim yumi long putim ol mak i stret long skel bilong yumi.​—Eklisiastis 7:16.

 No ken larim bel i kotim yu tumas na yu pilim nogut tru, mobeta yu mekim ol samting bilong stretim. Hau bai yu stretim?

•   Tokaut long ol popaia bilong yu. Long beten, askim Jehova a God long fogivim yu. (Buk Song 38:18; Luk 11:4) Yu inap bilip olsem God bai harim beten bilong yu sapos yu tanim bel na sori tru long rong yu bin mekim, na sapos yu wok strong long no ken mekim gen dispela rong. (2 Stori 33:13; Buk Song 34:18) God i lukim bel bilong man, em samting i no gat wanpela man inap lukim. Taim God i lukim yumi wok strong long lusim wanpela pasin nogut em yumi bihainim, em i “save bihainim tok bilong em na mekim stretpela pasin, . . . em bai fogivim ol sin bilong yumi.”​—1 Jon 1:9; Provep 28:13.

   Sapos yu rongim wanpela, yu mas luksave long dispela na tok sori long dispela man. Em i no isi long mekim olsem! Yu mas i gat strongpela bel na pasin daun bambai yu ken tok sori. Sapos yu pilim tru long bel na tok sori, dispela i kamapim tupela bikpela samting: I olsem em i rausim bikpela hevi long ol solda bilong yu, na kamapim gen pasin wanbel wantaim narapela.​—Matyu 3:8; 5:23, 24.

•   Tingim tingim ol skripsa i stori long pasin marimari bilong God. Olsem, skelim tok bilong 1 Jon 3:19, 20. Long ol dispela ves, Baibel i tok ating “bel bilong yumi i kotim yumi long wanpela samting”—olsem, bel i kotim yumi strong tumas, ating yumi pilim olsem yumi samting nating na God i no inap laikim yumi. Tasol dispela ves i tok tu olsem “God i winim tru bel bilong yumi.” Hau? Em i save gut long yumi na em i kliagut long ol filings bilong yumi na ol samting yumi no strong long en. Em i save tu olsem yumi bon wantaim sin, olsem na yumi save mekim ol pasin i no stret. b (Buk Song 51:5) So em i no save sakim ol man husat i bel hevi tru long ol rong ol i bin mekim.​—Buk Song 32:5.

•   No ken tingim tingim ol rong yu bin mekim bipo. Baibel i gat planti stori bilong ol man na meri husat i bin mekim ol pasin nogut tasol bihain ol i senisim pasin bilong ol. Wanpela em Sol bilong Tarsis, bihain em i kamap aposel Pol. Olsem wanpela Farisi, em i bin paitim na mekim nogut tru long ol manmeri i bihainim Jisas. (Aposel 8:3; 9:1, 2, 11) Tasol taim em i kisim save olsem em i wok long birua long God, na dispela Mesaia, o Krais, em i tanim bel, senisim ol pasin bilong em, na kamap wanpela gutpela Kristen. Tru, Pol i sori tru long ol dispela pasin em i bin mekim, tasol em i no tingim tingim ol rong em i bin mekim bipo. Pol i luksave long bikpela pasin marimari God i mekim long em, na em i kamap man bilong givim bel tru long autim tok na em i holim strong dispela hop bilong kisim laip oltaim oltaim.​—Filipai 3:13, 14.

 Jeremaia 31:34: “Bai mi fogivim ol long ol pasin nogut ol i mekim, na bai mi no tingim moa ol sin bilong ol.”

 Wanem mining bilong skripsa? Taim God i fogivim yumi, em i no inap kamapim gen dispela sin na kotim yumi long en, nogat. Pasin marimari bilong em i bikpela tumas.