Dispela tok gutpela man Samaria em wanpela hap tok ol man i save yusim taim ol i stori long man husat i save helpim ol narapela husat i nidim helpim. Dispela tok i kam long wanpela stori, o tok piksa, em Jisas i bin mekim bilong soim olsem gutpela man i save mekim pasin marimari na helpim narapela man maski dispela man i bilong narapela kantri o bekgraun.

Long dispela atikol

•  Wanem dispela tok piksa bilong gutpela man Samaria?

•  Wai na Jisas i mekim dispela tok piksa?

•  Wanem skul yumi kisim long dispela tok piksa?

•  Ol Samaria ol i husat?

•  Yu ting stori bilong gutpela man Samaria em samting i bin kamap tru?

Hia em liklik hap bilong dispela stori Jisas i mekim: Wanpela man Juda i lusim Jerusalem na wokabaut i go long Jeriko. Long rot, ol raskol i stilim ol samting bilong em, paitim em, em i hap indai na ol i lusim long rot.

Wanpela pris Juda, na bihain narapela bikman bilong lotu Juda tu i wokabaut i go abrusim dispela man i kisim bagarap na slip long rot. Maski ol i bilong wanpela lain tasol olsem dispela man i kisim bagarap long rot, no gat wanpela bilong tupela i stop bilong helpim dispela man.

Bihain wanpela man bilong narapela lain i kam. Em wanpela man Samaria. (Luk 10:33; 17:16-18) Dispela man Samaria i sori tru long dispela man i kisim bagarap na pasim ol sua bilong em. Bihain em i kisim dispela man i kisim bagarap i go long wanpela haus pasindia. Na em i lukautim dispela man long nait olgeta. Long neks de, em i baim papa bilong haus pasindia bilong lukautim dispela man na em i tokim em olsem sapos em i yusim sampela samting moa bilong lukautim dispela man, em bai baim.—Luk 10:30-35.

Jisas i mekim dispela stori long wanpela man husat i ting lain i gat seim skin kala na lotu olsem bilong em, ol tasol i wantok bilong em. Jisas i laik skulim dispela man long wanpela bikpela lesen—olsem em i mas kliagut long dispela tok “wantok,” i no makim tasol ol wantok bilong em, em ol Juda, nogat. (Luk 10:36, 37) Dispela stori i stap long Baibel bilong helpim olgeta man husat i laik amamasim God.—2 Timoti 3:16, 17.

Dispela stori i skulim yumi olsem man i gat pasin sori em bai soim dispela long rot bilong ol samting em i mekim. Em bai mekim ol samting bilong helpim man i karim pen na hevi—maski dispela man i bilong narapela bekgraun, skin kala, o narapela lain. Wantok tru bai mekim gutpela pasin long ol narapela wankain olsem em i laik bai ol i mekim long em.—Matyu 7:12.

Ol Samaria i sindaun long kantri i stap long hap not bilong Judia. Ol Juda i maritim lain i no bilong Juda na kamapim dispela lain Samaria.

Long taim bilong ol aposel, ol Samaria i kirapim wanpela lotu bilong ol yet. Ol i bihainim ol tok i stap long 5-pela buk bilong Ol Skripsa Hibru tasol ol i sakim olgeta narapela buk bilong Ol Skripsa Hibru.

Planti Juda long taim bilong Jisas i luk daun long ol Samaria na ol i no laik mekim ol samting wantaim ol. (Jon 4:9) Sampela Juda i save yusim dispela tok “man Samaria” bilong daunim ol.—Jon 8:48.

Baibel i no stori long wanpela samting i bin kamap tru we i as bilong dispela tok piksa bilong man Samaria. Tasol planti taim Jisas i save stori long ol kastam na ol ples em ol man i save long en taim em i skulim ol, so ol man i harim tok bilong em ol bai kliagut long bikpela poin em i laik kamapim.

Planti samting long dispela stori em long ol hap i stap tru long bipo. Olsem:

• Dispela rot kirap long Jerusalem i go long Jeriko—em longpela winim 20 kilomita (12 mail)—i go daun olsem 1 kilomita (0.6 mail). Dispela stori i tok stret olsem bilong i go long Jeriko, ol man i save “lusim Jerusalem na i go daun.”—Luk 10:30.

• Ol pris na ol Livai i stap long Jeriko ol i save bihainim dispela rot bilong i go long Jerusalem.

• Ol raskol i save hait arere long rot long ol hap i no gat man, na wet long ol man i kam—moa yet em ol man i raun wanpis.