Taim yumi stap pren bilong ol narapela, ol inap helpim yumi long stap amamas na stap gut. Ol gutpela pren i save helpim yumi long kamapim ol gutpela pasin na mekim yumi kamap gutpela man o meri.—Provep 27:17.

 Tasol Baibel i tok em i bikpela samting long yumi makim gut ol pren bilong yumi. Em i givim tok lukaut olsem ol hevi inap painim yumi sapos yumi poroman wantaim ol pren i no gat gutpela pasin. (Provep 13:20; 1 Korin 15:33) Ol kain pren olsem inap mekim na man i no wokim ol gutpela disisen o ol inap bagarapim ol gutpela pasin bilong em.

Long dispela atikol

•  Wanem samting i mekim man i stap gutpela pren?

•  Wanem sampela eksampel bilong ol gutpela pren long Baibel?

•  Yu ting man inap i stap pren bilong God?

•  Ol ves bilong Baibel we i stori long pasin pren

 Baibel i tok olsem bilong i stap gutpela pren i no makim olsem ol pren i mas i gat wankain laik long ol samting na em tasol, nogat. Olsem, Buk Song 119:63 i tok: “Mi pren bilong olgeta man i save pret long yu a na bilong ol man i save bihainim ol tok bilong yu.” Tingim olsem dispela man bilong raitim Baibel i tok em i makim ol pren we i save pret long mekim God i no amamas na ol i laik bihainim ol lo bilong em long i stap bilong ol.

 Baibel i stori tu long ol pasin em gutpela pren i mas i gat. Olsem:

•   “Trupela pren i save soim pasin laikim long olgeta taim na em i kamap olsem brata bilong yu long taim bilong hevi.”—Provep 17:17.

•   “I gat ol poroman i redi long bagarapim narapela narapela, tasol i gat ol pren husat i save pas gut tru wantaim, winim pasin i stap namel long tupela brata.”—Provep 18:24.

 Ol dispela ves i givim skul long yumi olsem gutpela pren i save stap gut long narapela, i gat pasin laikim, pasin helpim, na pasin bilong givim samting. Pren tru em wanpela husat i redi long sapotim yumi long gutpela taim na long taim bilong hevi. Na tu, em bai i no pret long tokim yumi sapos yumi bihainim rot i no gutpela o tokim yumi olsem disisen yumi laik wokim i no gutpela.—Provep 27:6, 9.

 Long Baibel i gat ol eksampel bilong ol gutpela pren em ol i gat kain kain krismas, sindaun, kalsa, na namba. Skelim 3-pela bilong ol.

•   Rut na Naomi. Rut em i tambu meri bilong Naomi, na ating Naomi i gat bikpela krismas moa long Rut. Na tu, kalsa bilong Rut i no wankain long Naomi. Maski i olsem, tupela i pas gut wantaim, na laikim narapela narapela.—Rut 1:16.

•   Devit na Jonatan. Tru, ating krismas bilong Jonatan i winim bilong Devit inap 30 yia, tasol Baibel i tok Devit na Jonatan i “laikim tru narapela narapela.”—1 Samuel 18:1.

•   Jisas na ol aposel. Jisas i gat bikpela namba long ol aposel bilong em bikos em i tisa na bikman bilong ol. (Jon 13:13) Tasol em i no pilim olsem ol i no gutpela inap long stap pren bilong em, nogat. Em i pas gut wantaim ol man i bihainim tok bilong em. Em i tok: “Mi kolim yupela pren, long wanem, olgeta samting mi bin harim long Papa bilong mi, mi kamapim long yupela.”—Jon 15:14, 15.

 Yes, ol man inap stap pren bilong God. Baibel i tok: “Em i save pas gut wantaim man bilong mekim stretpela pasin.” (Provep 3:32) Ol man em God i save makim olsem pren bilong em, em ol man i traim long mekim gutpela pasin, onest pasin, pasin rispek, na bihainim ol lo bilong em long wanem ol pasin i stret na wanem ol pasin i no stret. Olsem, Baibel i kolim bilipman Abraham olsem pren bilong God.—2 Stori 20:7; Aisaia 41:8; Jems 2:23.