Yes. (Rom 15:4) Skelim sampela ves bilong Baibel we i bin mekim isi bel bilong planti manmeri em ol i karim ol hevi na bel na tingting bilong ol i no stap isi.

Long dispela atikol

•  Taim bilong hevi

•  Taim wanpela yumi laikim i dai

•  Bel i kotim man tumas long rong em i bin mekim

•  Bel hevi

•  Sik

•  Pasin bilong tingting na wari

•  Ol pait

•  Tingting planti long ol samting bai kamap bihain

 Filipai 4:13: “Long olgeta samting, mi gat strong long rot bilong dispela man husat i save givim pawa long mi.”

 Wanem mining bilong skripsa?: God inap givim yu strong long karim ol hevi i painim yu.

 Aposel 24:15: “Bai i gat kirap bek bilong ol man i dai pinis.”

 Wanem mining bilong skripsa?: God bai kirapim bek ol lain yumi laikim em ol i dai pinis.

 Buk Song 103:12: “Hap bilong sankamap i stap longwe tru long hap bilong san i go daun, olsem tasol em i save rausim ol sin bilong yumi i go longwe tru long yumi.”

 Wanem mining bilong skripsa?: Taim God i fogivim yumi, em i rausim ol sin bilong yumi i go longwe tru we yumi hatwok long tingim. Em i no save kamapim gen na gen ol dispela rong bilong yumi bilong sutim tok long yumi o bilong mekim save long yumi, nogat.

 Buk Song 34:18: “Jehova i save stap klostu long ol manmeri em hevi i daunim tru ol; na em i save kisim bek ol manmeri bel bilong ol i bagarap.”

 Wanem mining bilong skripsa?: God i tok promis long sapotim yu long taim yu bel hevi. Em inap givim yu strong bilong karim bel hevi.

 Aisaia 33:24: “I no gat wanpela man i stap long dispela ples bai tok: “Mi sik.”

 Wanem mining bilong skripsa?: God i tok promis long wanpela taim bai kamap we olgeta manmeri bai i gat gutpela helt.

 1 Pita 5:7: “God i save wari long yupela, olsem na yupela i mas putim olgeta hevi bilong yupela long han bilong em.”

 Wanem mining bilong skripsa?: God i save tingim tru ol hevi yumi karim. Em i tokim yumi long beten long em na autim ol wari bilong yumi long em.

 Buk Song 37:11, 29: “Ol man i gat pasin daun, ol bai kisim graun olgeta, na ol bai i stap bel isi tru na dispela bai mekim ol i stap amamas moa yet. . . . Ol stretpela man bai kisim graun olgeta, na ol bai stap oltaim long en.”

 Wanem mining bilong skripsa?: Ol manmeri i bihainim ol gutpela pasin bai i stap bel isi long graun inap oltaim oltaim.

 Revelesen 21:4: “Em bai mekim drai aiwara i stap long ai bilong ol, na bai i no gat dai moa, na ol bai i no bel hevi moa na krai moa, na ol bai i no inap pilim pen gen. Ol dispela samting bilong bipo ol i pinis olgeta.”

 Wanem mining bilong skripsa?: God i tok promis long em bai pinisim olgeta samting nogut we yu lukim i kamap long nau na i painim yu tu.