Nogat. Baibel i tok klia olsem God i wokim ol man, na tu “ol kain kain” animal na diwai samting. a (Stat 1:12, 21, 25, 27; Revelesen 4:11) Baibel i tok olgeta manmeri bilong graun i kamap long Adam na Iv, fes papamama bilong yumi. (Stat 3:20; 4:1) Tok bilong Baibel i no sapotim dispela stori nating olsem long rot bilong evolusen God i kamapim olgeta kain kain samting i gat laip. Tasol Baibel i wanbel long tok bilong saiens olsem kain kain samting i gat laip i stap long grup bilong ol yet. b

•  Sampela man i gat wanem bilip?

•  Tok bilong evolusen i wanbel wantaim Baibel?

•  Olsem wanem samting i stap long ol animal na diwai samting inap helpim ol long stap gut long ol hap ol i stap long en?

 Sampela man i bilip olsem God i stiaim ol animal na diwai samting long kamap long wanpela hap we i gutpela long ol so ol inap stap gut na karim ol pikinini na i go planti.

 Dispela tingting olsem long rot bilong evolusen ol samting i kamap i insait tu long ol dispela samting:

•   Olgeta samting i gat laip i kamap long wanpela samting tasol kirap long bipo bipo tru.

•   Sampela i bilip olsem wanpela kain laip inap senis senis na i kamap wanpela samting we i narapela kain olgeta. Eksampel, ol i tok ol monki i senis senis na i kamap man.

•   God i kamapim ol dispela senis.

 Tok bilong evolusen long hau ol samting kamap i givim tingting olsem stori bilong Baibel long kriesen long Buk Stat em i no stret. Tasol Jisas i tok long stori bilong Buk Stat olsem em i kamapim ol stori tru bilong ol samting i bin kamap bipo. (Stat 1:26, 27; 2:18-24; Matyu 19:4-6) Baibel i tok paslain long Jisas i kam long graun, em i stap wantaim God long heven, na em i bin helpim God long kamapim “olgeta samting” na ol i stap. (Jon 1:3) Olsem na dispela tingting olsem long rot bilong evolusen God i wokim ol kain kain samting i gat laip i pait wantaim ol tok bilong Baibel.

 Baibel i no stori long hamas taim ol animal na diwai samting i senis senis insait long grup bilong ol. Na tok bilong en i pait wantaim stori tru olsem God i wokim olgeta kain kain animal na diwai, na ol i kamapim ol pikinini wankain olsem ol yet na ol inap stap gut long wanpela nupela hap. Sampela i tingim ol animal na diwai samting inap kamap gut long wanpela hap i olsem wanpela kain wok bilong evolusen, tasol dispela i no kamapim narapela nupela laip.