Wok bilong mipela long olgeta hap bilong graun i save kamap long rot bilong kontribusen olgeta wan wan Witnes Bilong Jehova i save givim long laik bilong ol yet. a I gat ol kontribiusen boks long ol ples bilong mipela long lotu, na i gat ol narapela rot ol man inap givim donesen olsem i stap long jw.org (lukim aninit long: Donesen). I gat narapela narapela rot man i ken makim bilong putim donesen bilong helpim wok long olgeta hap, o helpim wok long hap ol i stap long en, o tupela wantaim.

 Ol Witnes Bilong Jehova i no save givim namba 10 hap bilong ol samting, o makim stret hamas long pe bilong ol bilong givim olsem kontribiusen, nogat. (2 Korin 9:7) Mipela i no save singaut long mani, o askim ol man long baim mani bilong kam long ol miting bilong mipela, na ol man i go pas long mipela i no save kisim pe long baptaisim man, mekim fiuneral tok, weding, o ol arapela wok lotu. Mipela i no save mekim ol samting bilong kisim mani, olsem salim kaikai, salim ol samting, o ol narapela samting long kisim mani, na tu, mipela i no askim ol man long givim donesen. Na tu, mipela i no save tokaut long nem bilong ol man i givim kontribiusen. (Matyu 6:2-4) Websait bilong mipela na ol pablikesen bilong mipela i no gat ol edvetaismen we mipela i soim bilong kisim mani long en.

 Long olgeta kongrigesen bilong ol Witnes Bilong Jehova, ol i save ritim ripot bilong akaun long ol miting long olgeta mun, na ol man i kam long dispela miting i ken harim dispela ripot. Ol i save wokim odit bilong ol akaun bilong kongrigesen na bai ol i ken luksave olsem ol i yusim gut ol donesen.​—2 Korin 8:20, 21.

•   Ol kontribiusen boks: Yu inap putim mani o sek long ol kontribiusen boks i stap long ol Haus Kingdom, ol Ples Kibung, na ol narapela hap we ol miting bilong mipela i save kamap long en.

•   Long Intenet: Long planti kantri, yu inap go long websait bilong mipela long dispela hap “Donate to Jehovah’s Witnesses” na putim kontribiusen long rot bilong kredit kat, debit kat, benk trensfe, na ol narapela rot olsem. b Sampela Witnes i save “putim sampela mani i stap” long olgeta mun, na ol i yusim wanpela bilong ol dispela rot bilong givim donesen.​—1 Korin 16:2.

•   Stretim Rot Bilong Givim: Bilong givim sampela donesen, pastaim yu mas stretim rot o kisim tingting bilong wanpela loya. Long sampela kantri, sapos yu laik givim mani bilong helpim wok lotu, orait i gat sampela takis we yu no inap baim. Planti man i save gut long ol rot bilong givim mani na ol narapela samting olsem presen long taim ol i stap laip yet o ol long ol taim ol i dai, na dispela i helpim ol long wokim ol gutpela disisen. Plis ringim brens ofis bilong ol Witnes Bilong Jehova long kantri bilong yu, na bai yu kisim sampela save moa sapos yu laik givim donesen long ol dispela rot:

  •   mani long benk akaun

  •   insurens na ritaia mani

  •   haus o graun

  •   ol sea samting

  •   raitim pepa

 Bilong kisim sampela save moa long ol rot bilong givim donesen long hap bilong yu, go long websait bilong mipela long hap “Donate to Jehovah’s Witnesses.”