Nogat, mipela i no mekim olsem. Taim mipela i bin luksave olsem sampela bilip bilong mipela i no stret wantaim tok bilong Baibel, dispela i kirapim mipela long senisim ol bilip bilong mipela.

 Paslain tru long mipela i kirap long wokim Nupela Taim Trenslesen Bilong Ol Skripsa Holi long 1950, mipela i bin skelim gut ol tok bilong Baibel. Mipela i bin yusim ol narapela Baibel we i stap long dispela taim bipo na mipela i stretim ol popaia long bilip bilong mipela. Orait, em hia sampela bilip we ol Witnes Bilong Jehova i holim inap planti yia pinis, na yu yet i ken skelim sapos ol dispela bilip i stret wantaim ol tok bilong Baibel o nogat.

1.   Bilip bilong mipela: God em i no wanpela God Triwan. Zion’s Watch Tower bilong Julai 1882 i tok: “Ol rida bilong mipela i save olsem mipela i bilip long Jehova na Jisas, na holi Spirit, tasol mipela i sakim bilip em Baibel i no sapotim, em dispela bilip olsem tripela God i stap insait long wanpela man o, olsem sampela i tok, wanpela God i stap insait long tripela man.

     Baibel i tok: “God bilong yumi Jehova em wanpela Jehova tasol.” (Lo 6:4, The Holy Bible, by Robert Young) “Yumi gat wanpela God tasol, em God Papa. Em i as bilong olgeta samting, na yumi stap olsem ol manmeri bilong em stret. Na i gat wanpela Bikpela tasol, em Jisas Krais. Em i bin wokim olgeta samting, na yumi bin kisim laip long em.” (1 Korin 8:6, Buk Baibel) Jisas yet i tok: “Papa i stap namba wan tru na i winim mi.”—Jon 14:28, Buk Baibel.

2.   Bilip bilong mipela: I no gat helpaia we ol man bai kisim pen inap oltaim oltaim long en. Zion’s Watch Tower bilong Jun 1882 i gat dispela het tok, “Pe Bilong Sin Em Dai,” na dispela tok i kam long Rom 6:23 long King James Version, na nius i tok: “Dispela tok em i klia na simpol tru. Em narapela kain tru olsem planti manmeri husat i bilip olsem Baibel em Tok Bilong God, ol i strong yet long sakim dispela stretpela tok, na ol i strongim olsem ol i bilip, na strongim olsem Baibel i tok, olsem pe bilong sin em long pilim pen inap oltaim oltaim.”

     Baibel i tok: “Man i mekim sin, dispela man tasol i mas i dai.” (Esekiel 18:​4, 20, Buk Baibel) Taim God i panisim ol man i sakim tok bilong em, ol bai i no kisim pen inap oltaim oltaim, nogat, bai ol i “bagarap i stap oltaim oltaim.”​—2 Tesalonaika 1:9, Buk Baibel.

3.   Bilip bilong mipela: Kingdom Bilong God em wanpela gavman i stap tru, na em i no wanpela filing nating insait long bel. Zion’s Watch Tower bilong Disemba 1881 i stori long Kingdom Bilong God na tok: “Taim dispela kingdom i kirap long mekim wok, em bai pinisim olgeta kingdom bilong dispela graun.”

     Baibel i tok: “Taim ol dispela king i stap yet God bai i kirapim wanpela kingdom na dispela kingdom bai i stap oltaim oltaim. Ol arapela king i no inap daunim kingdom bilong God, tasol em bai i daunim ol na bagarapim ol arapela king na kingdom bilong en bai i stap oltaim.”—Daniel 2:​44, Buk Baibel.

 Nogat, bikos mipela i save yusim yet planti narapela Baibel long wok bilong autim tok. Long fri Baibel stadi program bilong mipela, em tru olsem mipela i save givim fri, kopi bilong Nupela Taim Trenslesen, tasol mipela i amamas tu long stadi wantaim ol manmeri husat i laik yusim ol narapela Baibel.