Samuwele Wo Sungula 1:1-28
1 A ku ri ni wanuna un’wana wa le Ramatayimi-zofimi*+ endhawini ya tintshava ya Efrayimi+ loyi vito rakwe a ku ri Elkana,+ n’wana wa Yerohamu, n’wana wa Elihu, n’wana wa Tohu, n’wana wa Zufu, wa ka Efrayimi.
2 A a ri ni vasati vambirhi; lowun’wana a ku ri Hana kasi lowun’wana a ku ri Penina. Penina a a ri ni vana, kambe Hana a a nga ri na vana.
3 Lembe ni lembe wanuna yoloye a a ya eXilo ku ya gandzela* ni ku endlela Yehovha wa mavuthu gandzelo.+ Kwalaho hi laha vana vambirhi va Eli, ku nga Hofini na Finiyasi+ a va ri vaprista va Yehovha kona.+
4 Siku rin’wana loko Elkana a endla gandzelo, u nyike nsati wakwe Penina ni vana vakwe hinkwavo va majaha ni va vanhwanyana swiphemu* swa nyama,+
5 kambe a nyika Hana xiphemu* xo hlawuleka, hikuva Hana hi yena loyi a a n’wi rhandza; kambe Yehovha a a endle leswaku a nga kumi vana.
6 Ku tlula kwalaho, nkatikulobye na yena a a tshamela ku n’wi dyisa mbitsi leswaku a n’wi hlundzukisa hileswi Yehovha a a nga n’wi nyikanga vana.
7 A a endla hi ndlela yoleyo lembe ni lembe; nkarhi hinkwawo loko Hana a ya endlwini ya Yehovha,+ nkatikulobye na yena a a n’wi dyisa mbitsi lerova a rila a tlhela a ala ni ku dya.
8 Kambe nuna wakwe Elkana a ku eka yena: “Hana, u rilela yini, hikwalaho ka yini u nga dyi naswona hikwalaho ka yini u nga tsakanga?* Xana a ndzi antswi eka wena ku tlula vana va majaha va khume?”
9 Hiloko Hana a suka a yima endzhaku ka loko va hete ku dya ni ku nwa eXilo. Hi nkarhi wolowo muprista Eli a a tshame exitulwini enyangweni ya tempele*+ ya Yehovha.
10 Mbilu ya Hana a yi vava ngopfu, hiloko a sungula ku khongela Yehovha+ a ri karhi a rila swinene.
11 Kutani a endla xihlambanyo lexi a ku: “Yehovha wa mavuthu, loko wo vona maxangu ya nandza wa wena, u ndzi tsundzuka, u nga n’wi rivali nandza wa wena, u nyika nandza wa wena n’wana wa jaha,+ ndzi ta n’wi nyika Yehovha masiku hinkwawo ya vutomi byakwe naswona a ku na xisingwana lexi nga ta hundza enhlokweni ya yena.”+
12 Loko a ri karhi a khongela nkarhi wo leha emahlweni ka Yehovha, Eli a a langute nomu wa yena.
13 Hana a a vulavula hi mbilu, a ku tshavatana milomu yakwe ntsena, kambe rito rakwe a ri nga twakali. Xisweswo Eli a a vona onge u dakwile.
14 Eli a ku eka yena: “Xana u ta tshama u dakwile ku fikela rini? Tshika ku nwa vhinyo.”
15 Hiloko Hana a hlamula a ku: “A swi tano hosi yanga! Ndzi wansati la nga ni mbitsi swinene; a ndzi nwanga vhinyo kumbe byala, ndzi phofulela Yehovha leswi nga embilwini ya mina.+
16 U nga ehleketi leswaku nandza wa wena i xiphukuphuku, hikuva a ndzi ri eku vulavuleni ku fikela sweswi hikwalaho ka ku vilela ka mina lokukulu ni maxangu ya mina.”
17 Eli a hlamula a ku: “Famba hi ku rhula, onge Xikwembu xa Israyele xi nga ku nyika leswi u swi kombeleke.”+
18 Hiloko Hana a ku: “Onge nandza wa wena a nga kuma tintswalo ematihlweni ya wena.” Hana a famba a ya dya naswona a a nga ha ri na gome.
19 Kutani va pfuka nimixo swinene va khongela eka Yehovha, endzhaku ka sweswo va tlhelela endlwini ya vona eRhama.+ Elkana a etlela na Hana nsati wakwe, kutani Yehovha a n’wi tsundzuka.+
20 Loko lembe ri nga si hela,* Hana a tika a veleka n’wana wa jaha a n’wi thya vito+ ra Samuwele,* hikuva u te, “ndzi n’wi kombele eka Yehovha.”
21 Hi ku famba ka nkarhi Elkana a tlhandluka ni ndyangu wakwe hinkwawo va ya endlela Yehovha gandzelo ra lembe ni lembe+ ni gandzelo rakwe ra xihlambanyo.
22 Kambe Hana a nga yanga,+ hikuva u byele nuna wakwe a ku: “Loko mufana se a lumuriwile, hi ku hatlisa ndzi ta n’wi tisa; kutani u ta humelela emahlweni ka Yehovha a tshama kona vutomi byakwe hinkwabyo.”+
23 Nuna wakwe Elkana a ku eka yena: “Endla leswi u vonaka swi ri swinene. Tshama ekaya ku fikela loko u n’wi lumurile. Onge Yehovha a nga endla leswi u swi vuleke.” Kutani Hana a tshama ekaya, a wundla n’wana wakwe ku fikela loko a n’wi lumula.
24 Hi ku hatlisa endzhaku ko n’wi lumula, a n’wi yisa eXilo, swin’we ni nkuzi ya malembe manharhu, efa* yin’we ya mapa ni khuwana lerikulu ra vhinyo,+ a nghena endlwini ya Yehovha eXilo,+ a tisa xifanyetana lexi a ri na xona.
25 Hiloko va tlhava nkuzi kutani va teka xifanyetana va xi yisa eka Eli.
26 Kutani Hana a ku: “Ndzi khomele hosi yanga! Ndza hlambanya eka wena hosi yanga, leswaku hi mina wansati loyi a a yime na wena endhawini leyi, ndzi khongela eka Yehovha.+
27 Xifanyetana lexi hi xona lexi a ndzi khongelela xona naswona Yehovha u hlamule xikhongelo xa mina.+
28 Kutani sweswi ndzi n’wi lomba Yehovha. Vutomi bya yena hinkwabyo u ta va a lombiwe Yehovha.”
Hiloko a* khinsama kwalaho emahlweni ka Yehovha.
Tinhlamuselo ta le hansi
^ Kumbe “wa le Rhama, Muzofimi.”
^ Kumbe “khinsama.”
^ Kumbe “maqatha.”
^ Kumbe “qatha.”
^ Kumbe “hikwalaho ka yini mbilu ya wena yi vava?”
^ Ku nga tabernakela.
^ Kumbexana “Hi nkarhi lowu faneleke.”
^ Leswi vulaka “Vito Ra Xikwembu.”
^ Efa a yi ringana ni 22 wa tilitara. Vona Xiengetelo B14.
^ Swi tikomba ku vulavuriwa hi Elkana.
