Tihosi To Sungula 19:1-21
19 Kutani Akabu+ a byela Yezabele+ hinkwaswo leswi Eliya a swi endleke ni ndlela leyi a dlayeke vaprofeta hinkwavo hi banga ha yona.+
2 Loko Yezabele a twa sweswo a rhumela munhu eka Eliya a ku: “Swikwembu a swi ndzi xupule swinene loko mundzuku hi nkarhi lowu ndzi ta va ndzi nga ku endlanga leswi u swi endleke eka vona!”
3 Eliya a sungula ku chava, hiloko a baleka leswaku a ponisa vutomi bya yena.+ A fika eBera-xeba+ lowu nga muti wa Yuda,+ a siya mutirhi wakwe kona.
4 A ya emananga ivi a famba siku hinkwaro, a fika a tshama ehansi ka murhi wa brumu, a kombela leswaku a fa. A ku: “Swi ringene! Yehovha Xikwembu xanga, herisa vutomi bya mina sweswi,+ hikuva a ndzi va tluli ha nchumu vakokwana.”
5 Kutani a etlela ehansi ka murhi wolowo a biwa hi vurhongo. Hiloko ntsumi yi n’wi hlakahla+ yi ku: “Pfuka u dya.”+
6 Loko a languta, etinhlokweni takwe a ku ri ni xinkwa xa xirhendzevutana ehenhla ka maribye lama hisaka ni gula ra mati. A dya ni ku nwa a tlhela a etlela.
7 Endzhaku ntsumi ya Yehovha yi vuya ra vumbirhi yi n’wi hlakahla, yi ku: “Pfuka u dya, hikuva riendzo ra wena ra ha lehile.”
8 Hiloko a pfuka a dya ni ku nwa, kutani swakudya leswi swi n’wi nyika matimba yo famba masiku ya 40 ni vusiku bya 40, kukondza a fika eHorebe, ntshava ya Xikwembu xa ntiyiso.+
9 U fike a nghena ebakweni+ a etlela kona; kutani waswivo, rito ra Yehovha ri fika eka yena, ri ku: “Eliya, xana u endla yini laha?”
10 Hiloko a ku: “Ndzi tinyiketele hi mbilu hinkwayo eka Yehovha Xikwembu xa mavuthu;+ kambe Vaisrayele va tshike ntwanano wa wena,+ va hirimuxe tialtari ta wena, va dlaye ni vaprofeta va wena hi banga,+ ku lo sala mina ntsena. Sweswi va lava ku ndzi dlaya.”+
11 Kambe A ku: “Huma u ya yima entshaveni emahlweni ka Yehovha.” Yehovha a a ri eku hundzeni+ naswona moya lowukulu wa matimba a wu pandza tintshava, wu hirimuxa maribye emahlweni ka Yehovha,+ kambe Yehovha a a nga ri kona eka moya wolowo. Endzhaku ka moya lowu ku ve ni ku tsekatseka ka misava,+ kambe Yehovha a a nga ri kona eka ku tsekatseka koloko ka misava.
12 Endzhaku ka ku tsekatseka ka misava, a ku ri ni ndzilo,+ kambe Yehovha a a nga ri kona endzilweni wolowo. Endzhaku ka ndzilo lowu a ku ri ni rito ro rhula leri twalelaka ehansi.+
13 Hi ku hatlisa loko Eliya a twa rito leri, a funengeta xikandza xakwe hi nguvu yakwe leyi ambariwaka hi vaprofeta,+ a huma a yima enyangweni ya bako. Kutani rito ri n’wi vutisa ri ku: “Eliya, xana u endla yini laha?”
14 Hiloko a ku: “Ndzi tinyiketele hi mbilu hinkwayo eka Yehovha Xikwembu xa mavuthu; kambe Vaisrayele va tshike ntwanano wa wena,+ va hirimuxe tialtari ta wena, va dlaye ni vaprofeta va wena hi banga, ku lo sala mina ntsena. Sweswi va lava ku ndzi dlaya.”+
15 Yehovha a ku eka yena: “Tlhelela, u ya emananga ya Damaska. Loko u fika kona, hlawula Hazayele+ leswaku a va hosi ya Siriya.
16 Naswona u fanele u hlawula Yehu+ ntukulu wa Nimxi leswaku a va hosi ya Israyele, u fanele u hlawula na Elixa* n’wana wa Xafati loyi a humaka eAvele-mehola leswaku a va muprofeta a siva wena.+
17 Un’wana ni un’wana la nga ta pona banga+ ra Hazayele, u ta dlayiwa hi Yehu;+ ni un’wana ni un’wana la nga ta pona banga ra Yehu, u ta dlayiwa+ hi Elixa.
18 Ndza ha ri ni vanhu va 7 000 eIsrayele,+ lava matsolo ya vona ma nga n’wi khinsamelangiki Bali+ ni lava milomu ya vona yi nga n’wi tswontswangiki.”+
19 Hiloko a famba, kutani a kuma Elixa n’wana wa Xafati a ri karhi a rima, swipani swa 12 swa tinkuzi swi ri emahlweni ka yena, yena a a rima hi xipani xa vu-12. Kutani Eliya a ya eka yena, a lahlela nguvu+ yakwe leyi ambariwaka hi vaprofeta ehenhla ka yena.
20 Endzhaku ka sweswo a siya tinkuzi, kutani a landza Eliya hi ku tsutsuma, a ku: “Ndzi kombela u ndzi pfumelela ndzi ya tswontswa tatana na manana. Kutani ndzi ta ku landzela.” A ku eka yena: “Famba, u tlhela u vuya, a ndzi ku siveli.”
21 Kutani a tlhela, a teka tinkuzi timbirhi a endla gandzelo hi tona, a sweka nyama ya tona hi majoko ya tinkuzi a phamela vanhu va dya. Endzhaku ka sweswo a landzela Eliya naswona a sungula ku n’wi tirhela.+
Tinhlamuselo ta le hansi
^ Leswi vulaka “Xikwembu Xa Ponisa.”
