Esaya 39:1-8
-
Varhumiwa vo huma eBabilona (1-8)
39 Hi nkarhi wolowo hosi ya Babilona, Merodaka-baladani n’wana wa Baladani, a rhumela mapapila ni nyiko eka Hezekiya,+ hikuva a a swi twile leswaku a a vabya kambe se u horile.+
2 Hezekiya a va amukela hi mandla mambirhi kutani a va komba laha a vekaka kona xuma,+ silivhere, nsuku, mafurha ya balsama, mafurha man’wana ya nkoka, matlhari yakwe hinkwawo ni swilo hinkwaswo leswi a swi ri laha a hlayiselaka kona xuma. Ku hava nchumu lowu Hezekiya a nga va kombangiki wona endlwini* yakwe ni le mfun’weni wakwe hinkwawo.
3 Endzhaku ka sweswo, muprofeta Esaya a ya eka Hosi Hezekiya a fika a n’wi vutisa a ku: “Xana vavanuna lava va te yini naswona va huma kwihi?” Hiloko Hezekiya a ku: “Va huma etikweni ra le kule, eBabilona.”+
4 A tlhela a vutisa a ku: “Va vone yini endlwini ya wena?” Hezekiya a ku: “Va vone swilo hinkwaswo leswi nga endlwini* ya mina. Ku hava nchumu ni wun’we lowu ndzi nga va kombangiki wona laha ndzi vekaka kona xuma.”
5 Hiloko Esaya a byela Hezekiya a ku: “Twana leswi Yehovha wa mavuthu a swi vulaka,
6 ‘Yingisa! Masiku ma ta naswona hinkwaswo leswi nga endlwini* ya wena ni hinkwaswo leswi vakokwa wa wena va swi siyeke ku fikela namuntlha, swi ta rhwariwa swi yisiwa eBabilona. A ku nge sali nchumu,’+ ku vula Yehovha.+
7 ‘Naswona van’wana va vana va wena, va ta tekiwa va ya tirha ehubyeni endlwini ya vuhosi eBabilona.’ ”+
8 Hiloko Hezekiya a byela Esaya a ku: “Leswi Yehovha a ku byeleke swona i swinene.” A tlhela a ku: “Hikuva ku ta va ni ku rhula ni ntshamiseko* loko ndza ha hanya.”+
Tinhlamuselo ta le hansi
^ Kumbe “endlwini ya vuhosi.”
^ Kumbe “endlwini ya vuhosi.”
^ Kumbe “endlwini ya vuhosi.”
^ Kumbe “ntiyiso.”
