Rhuti 2:1-23
2 Elimeleke nuna wa Nawomi a a ri ni xaka leri a ri fuwile swinene; vito ra rona a ku ri Bowazi.+
2 Rhuti wa Mumowabu a byela Nawomi a ku: “Ndzi kombela ku ya khwaja emasin’wini,+ ndzi landzela un’wana ni un’wana loyi a nga ta ndzi twela vusiwana.” Kutani Nawomi a ku eka yena: “Famba n’wananga.”
3 Hiloko a famba a ya sungula ku khwaja emasin’wini a sale vatshoveri hi le ndzhaku. U tikume a ri ensin’wini ya Bowazi+ loyi a a ri xaka ra Elimeleke.+
4 Kutani Bowazi a fika a huma eBetlehema, a ku eka vatshoveri: “Yehovha a a ve na n’wina.” Va n’wi hlamula va ku: “Yehovha a a ku katekise.”
5 Bowazi a vutisa jaha leri a ri ri ndhuna ya vatshoveri a ku: “Xana nhwanyana loyi i wa ka mani?”
6 Ndhuna ya vatshoveri yi hlamula yi ku: “Nhwanyana loyi i Mumowabu,+ hi loyi a vuyeke na Nawomi hi le tikweni ra Mowabu.+
7 U fike a ku, ‘Ndzi kombela ku khwaja+ leswi siyiweke hi vatshoveri ni ku hlengeleta masalela exikarhi ka tinhulu.’ Hi mpfhuka a fika laha nimixo, hi kona a ya wisanyana endzhutini.”
8 Bowazi a ku eka Rhuti: “Yingisa n’wananga, u nga yi u ya khwaja ensin’wini yin’wana, u nga ha hundzeli kun’wana; khwaja ekusuhi ni malandza ya mina ya xisati.+
9 Khwaja ensin’wini leyi va tshovelaka eka yona, u va sala hi le ndzhaku. Ndzi lerise malandza ya mina ya majaha leswaku ma nga ku karhati.* Loko u twa torha, yana emakhuwaneni u ya nwa mati lama kiweke hi malandza ya mina.”
10 Hiloko Rhuti a khinsama xikandza xakwe xi languta ehansi kutani a ku: “Hikokwalaho ka yini u ndzi komba tintswalo ni ku ndzi khathalela, kasi a ndzi wa tiko leri?”+
11 Bowazi a n’wi hlamula a ku: “Ndzi byeriwe hinkwaswo leswi u swi endleleke n’wingi wa wena endzhaku ka ku fa ka nuna wa wena, nileswaku u siye tata wa wena ni mana wa wena ni tiko ra rikwenu, u ya eka vanhu lava a wu nga va tivi.+
12 Onge Yehovha a nga ku katekisa hikwalaho ka leswi u swi endleke,+ onge u nga kuma hakelo leyi hetisekeke leyi humaka eka Yehovha Xikwembu xa Israyele, loyi u teke u ta kuma nsirhelelo eka yena.”*+
13 Rhuti a ku: “Onge u nga hambeta u ndzi komba tintswalo hosi yanga, hikuva u ndzi chavelerile naswona u vulavule na mina* hi ndlela leyi khutazaka, hambileswi ndzi nga riki nandza wa wena.”
14 Hi nkarhi wa swakudya, Bowazi a ku eka yena: “Tana u ta dya xinkwa ni vhinyo yo dzunga.” Hiloko a tshama etlhelo ka vatshoveri. Kutani Bowazi a n’wi nyika ni mbhacha, a dya a xurha, wu tlhela wu sala.
15 Loko a suka a yima ku ya khwaja,+ Bowazi a lerisa majaha yakwe a ku: “N’wi tshikeni a khwaja ni leswi nga exikarhi ka tinhulu leswi siyiweke hi vatshoveri, mi nga n’wi karhati.+
16 Nakambe mi fanele mi tiyiseka leswaku mi n’wi siyela swo karhi eka tinyandza leswaku a ta tshovela, mi nga n’wi holoveli.”
17 Rhuti a ya emahlweni a khwaja emasin’wini ku fikela nimadyambu.+ Loko a hule leswi a swi khwajeke, ntiko wa swona wu ve kwalomu ka efa* ya maxalana.
18 Kutani a ma rhwala a muka na wona, n’wingi wakwe a fika a ma vona. Endzhaku ka sweswo Rhuti a humesa swakudya leswi a dyeke a swi siya, a n’wi nyika swona.+
19 Hiloko n’wingi wakwe a ku eka yena: “Xana a wu khwaja kwihi namuntlha? Xana u tirhe kwihi? Onge loyi a veke ni musa eka wena a nga katekisiwa.”+ Kutani a byela n’wingi wakwe hi munhu loyi a tirheke eka yena a ku: “Vito ra munhu loyi ndzi tirheke eka yena namuntlha i Bowazi.”
20 Nawomi a ku eka Rhuti: “Onge a nga katekisiwa hi Yehovha, loyi a rhandzaka lava hanyaka ni lava feke.”+ Nawomi a ya emahlweni a ku: “Munhu loyi i xaka ra hina.+ I un’wana wa lava nga ni mfanelo yo hlanganisa.”*+
21 Kutani Rhuti wa Mumowabu a ku: “U tlhele a ku, ‘U fanele u va ekusuhi ni malandza ya mina kukondza ma heta ku tshovela.’”+
22 Nawomi a byela n’wingi wakwe Rhuti a ku: “Swa antswa n’wananga leswaku u famba ni malandza yakwe ya xisati, ku ri ni ku ya karhatiwa ensin’wini yin’wana.”
23 Kutani a famba ni malandza ya Bowazi ya xisati a khwaja kukondza ntshovelo wa maxalana+ ni wa koroni wu hela. A hambeta a tshama ni n’wingi wakwe.+
Tinhlamuselo ta le hansi
^ Hi Xiheveru, “khumbi.”
^ Hi Xiheveru, “ehansi ka timpapa ta yena.”
^ Hi Xiheveru, “u vulavule ni mbilu ya mina.”
^ Kwalomu ka 22 wa tilitara. Vona Xiengetelo B14.
^ Ku nga loyi a tekaka nsati wa makwavo kumbe wa xaka leri feke.
