I yini lexi taka emiehleketweni ya wena loko u twa hi ku herisiwa ka swilo hinkwaswo laha misaveni? Swi nga endleka u ehleketa hi xiendlakalo lexi nga ta endleka emisaveni hinkwayo kumbexana lexi nga ta herisa vutomi bya swivumbiwa hinkwaswo leswi hanyaka laha misaveni. Vanhu van’wana va tshemba leswaku sweswo swi ta endleka ku nga ri khale, ngopfungopfu loko va hlaya hi swiviko swa mahungu swo fana ni leswi landzelaka:

•   “Swi nga endleka ku va ni nyimpi ya nyutliya, yi nga ha sunguriwa hi vomu, hi xihoxo kumbe hikwalaho ka ku nga twanani.”—Bulletin of the Atomic Scientists.

•   “Eka malembe ya khume lama hundzeke, ku ve ni swiendlakalo leswikulu leswi tsemaka nhlana swo tanihi swidzedze, ku hisiwa ka nhova, dyandza, ku cinca ka tikorala ti va to basa hikwalaho ka ku cinca ka maxelo, ku hisa ka dyambu ni swidzedze emisaveni hinkwayo.”—National Geographic.

•   “Mitlawa ya tinjiya eAfrika yi tele ngopfu naswona ya onhetela swinene ku tlula leswi a yi ri xiswona eka makume ya malembe lama hundzeke.”—The Associated Press.

 Xana misava hinkwayo yi ta herisiwa, swin’we ni swilo hinkwaswo leswi hanyaka eka yona? Xana Bibele yi ri yini hi mhaka leyi?

 Nikatsongo. Rito ra Xikwembu ku nga Bibele, ra hi tiyisekisa leswaku misava yi ta tshama hilaha ku nga riki na makumu. (Eklesiasta 1:4) Ematshan’weni yo va Xikwembu xi yi herisa, xi ta “lovisa lava onhaka misava.”—Nhlavutelo 11:18.

 Hi ku ya hi Bibele, “misava” leyi nga ta hela i ya vanhu lava yi baka hi makatla milawu ya Xikwembu kutani va ti endlela leswi va swi lavaka. Hilaha xi endleke hakona emasikwini ya Nowa, Xikwembu xi ta tisa makumu “emisaveni ya vanhu lava nga xiximiki Xikwembu.”—2 Petro 2:5; 3:7.

 Hilaha 1 Yohane 2:17 yi vulaka hakona, “misava ya hundza ni leswi vanhu va swi navelaka eka yona.” Ndzimana leyi yi kombisa leswaku Xikwembu a xi nge herisi misava hi ku kongoma kambe xi ta herisa vanhu lava yaka emahlweni va endla swilo swo biha.

 Bibele a yi hi byeli hi ku kongoma leswaku makumu ma ta fika rini. (Matewu 24:36) Hambiswiritano, ya hi byela leswaku makumu ma le kusuhi. Bibele yi vule ka ha ri emahlweni leswi landzelaka:

•   A ku ta va ni swiendlakalo swo tanihi tinyimpi, ku kayivela ka swakudya, mintungu ni ku tsekatseka lokukulu ka misava “etindhawini to hambanahambana.”—Matewu 24:3, 7, 14; Luka 21:10, 11; Nhlavutelo 6:1-8.

•   Vanhu a va ta va ni moya wa ku lava leswi vuyerisaka vona vini. Hi xikombiso, a va ta va “varhandzi va mali,” “lava nga khensiki” ni “lava nga tikhomiki.”—2 Timotiya 3:1-5.

 Vanhu vo tala va pfumela leswaku ku sukela hi lembe ra 1914, swiyimo leswi endlekaka laha misaveni swi fambisana ni leswi Bibele yi swi profeteke khale, nileswaku makumu ma le kusuhi. Leswaku u kuma vuxokoxoko lebyi engetelekeke, hlaya nhlokomhaka leyi nge, “I Yini Leswi Nxaxamelo Wa Minkarhi Ya Bibele Wu Swi Kombisaka Hi Lembe Ra 1914?” ni leyi nge “Hi Swihi Swikombiso Swa ‘Masiku Yo Hetelela’ Kumbe ‘Mikarhi Ya Makumu’?”

 Buku yo hetelela ya le Bibeleni, yi kombetela eka nkarhi wa ku ‘humelela ka Hosi Yesu’ lowu nga ta endleka loko a ta tanihi loyi a nga ni matimba yo herisa misava leyi nga ni minkucetelo hinkwayo yo homboloka kutani a hakela vanhu lava gandzelaka Xikwembu.—2 Vatesalonika 1:6, 7; 1 Petro 1:7, 13.

 Buku leyo ya Nhlavutelo yi vulavula hi swiendlakalo swa nkarhi lowu taka. (Nhlavutelo 1:1) Yi tamele mahungu lamanene ni rungula leri hi nyikaka ntshembo. (Nhlavutelo 1:3) Yi kombisa leswaku Xikwembu xi ta herisa ku pfumaleka ka vululami hinkwako ni ku endla misava yi va paradeyisi. Hi nkarhi wolowo, vanhu a va nge he vi na switlhavi, a va nge he xaniseki kumbe va fa.—Nhlavutelo 21:3, 4.

 Xana u nga tsakela ku dyondza swo tala hi switshembiso leswi swo tsakisa swa le Bibeleni? Timbhoni ta Yehovha ta ku rhamba eka nongonoko wa dyondzo ya Bibele ya mahala leyi nga ku pfunaka. U nga ha bi mariri, namba u tihlanganisa na tona.