Vanhu vo tala ku katsa ni lava va tivulaka Vakreste, va vona onge milawu ya mahanyelo ya le Bibeleni ya mayelana ni timhaka ta masangu ni vukati yi hundzeriwe hi nkarhi. Leswaku ti fambisana ni mikarhi, tikereke tin’wana ti cince leswi a ti swi dyondzisa mayelana ni matikhomelo lamanene kumbe lama nga riki manene. Xana milawu ya le Bibeleni ya leswinene ni leswi nga riki swinene ya ha ri ya nkoka? Ina. Nhlokomhaka leyi, yi hlamusela ndlela leyi hi swi tivaka hayona leswaku ya ha ri ya nkoka.

 Vanhu a va vumberiwe ku titshega hi Muvumbi wa vona leswaku a va kongomisa. Bibele yi ri: “Munhu la fambaka a nga ka a nga ma kongomisi magoza yakwe.” (Yeremiya 10:23) Hambileswi Yehovha a Xikwembu a hi vumbeke hi ri ni vuswikoti byo tiendlela swiboho, a nga hi nyikanga vuswikoti byo tihlawulela leswi nga swinene ni leswi nga riki swinene. Hikwalaho, u lava hi titshega hi yena.—Swivuriso 3:5.

 Hi kuma milawu ya Xikwembu ya mahanyelo eBibeleni. Kambisisa swivangelo swimbirhi leswi endlaka milawu leyi yi ri ya nkoka.

•   Hi vumbiwe hi Xikwembu. (Pisalema 100:3) Tanihi Muvumbi wa hina, Yehovha Xikwembu wa swi tiva leswi hi swi lavaka leswaku hi kota ku va ni rihanyo lerinene hi tlhela hi tsaka emirini ni le miehleketweni. U tlhela a tiva ni switandzhaku leswi nga vaka kona loko hi nga yingisi milawu yakwe ya mahanyelo. (Vagalatiya 6:7) Ku engetela kwalaho, Yehovha u lava hi tiphina hi vutomi. Hiyonamhaka Bibele yi hlamusela Xikwembu tanihi ‘lexi ku dyondziselaka ku ku pfuna, lexi ku kongomisaka endleleni leyi u faneleke u famba hi yona.’—Esaya 48:17.

•   Ku navela ka hina ku nga hi hambukisa. Vanhu vo tala va ehleketa leswaku va nga swi kota ku tiva leswi nga swinene kumbe leswi nga riki swinene hi ku va va endla leswi timbilu ta vona ti swi navelaka. Hambiswiritano, Bibele yi vula leswaku “mbilu yi kanganyisa ngopfu ku tlula swilo hinkwaswo naswona yi ni khombo.” (Yeremiya 17:9) Loko mbilu ya hina yi nga kongomisiwi hi vutlhari bya Xikwembu, yi ta endla leswaku hi tikhoma hi ndlela leyi hi ku famba ka nkarhi hi nga ta tisola.—Swivuriso 28:26; Eklesiasta 10:2.

 Doo! Bibele yi dyondzisa ntiyiso hi Xikwembu ni ndlela leyi xi lavaka leswaku hi tikhoma hayona. (1 Vakorinto 6:9-11; Vagalatiya 5:19-23) Xi lava leswaku vanhu va swi tiva swilo leswi. (1 Timotiya 2:3, 4) Hikwalaho, varhangeri lava nga Vakreste va fanele va dyondzisa leswi Rito ra Xikwembu ri swi vulaka.—Tito 1:7-9.

 Vanhu vo tala lava nga laviki ku yingisa milawu ya Bibele ya mahanyelo va landzela varhangeri va vukhongeri “leswaku va va byela leswi va lavaka ku swi twa.” (2 Timotiya 4:3, nhlamuselo ya le hansi) Kambe Rito ra Xikwembu ri na xilemukiso lexi xa nkoka: “Khombo eka lava vulaka leswaku leswinene swi bihile ni leswo biha i swinene.” (Esaya 5:20) Swi le rivaleni leswaku Xikwembu xi ta xupula varhangeri va vukhongeri, lava nga dyondzisiki vanhu ntiyiso wa leswi Xikwembu xi swi vulaka hi leswi nga swinene ni leswi nga riki swinene.

 Doo! Lava lavaka ku tsakisa Xikwembu va landzela xikombiso ni tidyondzo ta Yesu Kreste. U dyondzise valandzeri vakwe leswaku va nga avanyisi van’wana kambe va rhandza ni ku xixima vanhu hinkwavo.—Matewu 5:43, 44; 7:1.

 Yesu u dyondzise valandzeri vakwe ku hanya hi milawu ya Xikwembu ya mahanyelo evuton’wini bya vona. Hambiswiritano, u tlhele a va dyondzisa leswaku vanhu van’wana a va ta hlawula ku hanya hi ndlela leyi hambaneke. (Matewu 10:14) Yesu a nga va lerisanga vadyondzisiwa va yena leswaku va sindzisa van’wana ku yingisa milawu ya Xikwembu hi ku tirhisa tipolitiki kumbe swin’wana.—Yohane 17:14, 16; 18:36.

 Lava va ringetaka ku hanya hi milawu ya Xikwembu ya leswinene ni leswi nga riki swinene va ta vuyeriwa sweswi ni le nkarhini lowu taka. (Pisalema 19:8, 11) Leswi swi katsa:

•   Ntsako.—Swivuriso 29:6.

•   Ku va ni vuxaka ni Xikwembu.—Swivuriso 3:32.

•   Ku kuma mpfuno wa Xikwembu hi mikarhi yo tika.—Swivuriso 11:8.

•   Ntshembo wo hanya hilaha ku nga heriki laha misaveni.—Pisalema 37:29.