ESierra Leone, Crystal loyi a nga murhumiwa u tirha ensin’wini ya ririmi ra mavoko, naswona u pfuke a khongela leswaku a kuma vanhu lava feke tindleve. Mixo wolowo loko a ya endla riendzo ro vuyela, u fambe hi gondzo rin’wana ku nga ri lera ntolovelo. U vutise vaakelani loko va tiva vanhu vo karhi lava feke tindleve endhawini yoleyo naswona va n’wi yise endlwini yin’wana. Kwalaho u kume nhwanyana un’wana loyi a nga ni xinghana  loyi a amukeleke rungula kutani a kombisa leswaku wa swi tsakela ku ya eminhlanganweni ya ririmi ra mavoko. Kutani vanhu va ximutana xexo va vutise Crystal loko a ta swi tsakela ku hlangana ni munhu un’wana loyi a feke tindleve. Hi ndlela yoleyo u tlhele a hlangana ni munhu un’wana la titsongahataka loyi a a lava ntiyiso. Hambileswi a tirheke exitarateni xolexo minkarhi yo hlaya, a nga si tshama a hlangana ni vanhu volavo vambirhi lava feke tindleve lava a hlanganeke na vona mixo wolowo. Crystal wa tiyiseka leswaku a a ta va a nga va kumanga vanhu volavo lava tsakelaka loko a nga pfuniwanga hi Yehovha.

Emmanuel loyi a tshamaka eLiberia a a ri karhi a ya eHolweni ya Mfumo eka minhlangano ya vona ya mahelovhiki. Etlhelo ka gondzo a ku ri ni jaha leri a ri ambale kahle leri a ri vonaka ri tshikilelekile swinene. Leswi Emmanuel a a tsakisiwa hi ndlela leyi a ri languteka ha yona, u yimise movha wakwe ku vona loko a ta swi kota ku pfuna. U kume leswaku vito ra jaha rero i Moses. Tolo nivusiku u yiveriwe mali hinkwayo naswona se a a anakanya hi ku tidlaya. Emmanuel u rhiye ndleve loko Moses a tiphofula kutani a ku eka yena: “Ndzi kombela u famba na mina eHolweni ya Mfumo.” Hiloko va famba swin’we. Leswi Moses a swi tweke swi n’wi ririsile. Endzhaku ka loko a yingisele nkulumo, Moses u te: “Nkulumo leyi yi ndzi khumbile! Timbhoni ta Yehovha ti hlawulekile.” Loko minhlangano yi hela, Moses u pfumele ku dyondzeriwa Bibele naswona sweswi, u va kona eminhlanganweni ya vandlha nkarhi ni nkarhi.

Aminata i mudyondzi loyi a nga ni malembe ya 15, la tshamaka eGuinea-Bissau. Loko a ri ni malembe ya 13, mudyondzisi wakwe u kombele vadyondzi leswaku va dirowa ti-mask kumbe swilo swin’wana leswi fambisanaka ni minkhuvo. Ematshan’weni ya sweswo, Aminata u dirowe xifaniso lexi nga ni swiharhi ni swimilana kutani a xi tsala “Paradeyisi.” Loko mudyondzisi a hlengeleta leswi va swi diroweke, u byele Aminata leswaku leswi a nga swi dirowa a hi swona kutani a nge n’wi nyiki timaraka. Endzhaku ka dyondzo yoleyo, Aminata u ye eka mudyondzisi a n’wi vutisa a ku: “Minkhuvo leyi yi sunguriwe hi va mani?”

Mudyondzisi u te: “Yi sunguriwe hi vahedeni.”

Aminata u hlamule a ku: “A ndzi muhedeni, kutani a ndzi katseki eka minkhuvo yoleyo. Ndzi tshemba leswaku ku nga ri khale Xikwembu xi ta hundzula misava leyi yi va paradeyisi kutani leswi hi swona ndzi nga swi dirowa.” Mudyondzisi u vule leswaku va ta tlhela va tsala xikambelo hi ku tirhisa swivutiso. Vuyelo byi ve byihi? Aminata u kume timaraka ta 18 eka ta 20.

Ntlawa lowu nga woxe wa le ximutanini xa le Malawi wu ni vahuweleri va nkombo. Va hlangana endhawini leyi endliweke hi timhandzi, byanyi ni tinhlanga. Leswi vamakwerhu va tsakisiweke hi riendzo ra mulanguteri wa muganga, va kombise leswaku va hiseka swinene hi ku rhamba vanhu leswaku va ta eXitsundzuxweni xa rifu ra Kreste. Xivulavuri xi swi kotile ku nyikela nkulumo ya Xitsundzuxo  hi ku tirhisa timboni leti a ti hayekiwe ehenhla. Kambe a swi xi tikela ku fambafamba tanihi leswi ekusuhi na xona a ku ri ni vanhu vo tala lava tsakelaka. Vona ntsako lowu vahuweleri va nkombo va veke na wona loko ku ve ni vanhu va 120!

Tsima ro hlawuleka ro chumayela emadorobeni lamakulu hakanyingi ri ni vuyelo kambe vuyelo bya kona a byi vonaki hi nkarhi wolowo. ELomé, ku nga ntsindza wa le Togo, wansati un’wana u ye etafuleni ro veka minkandziyiso a ri karhi a kanakana kutani a teka broxara leyi nge U Nga Va Ni Ndyangu Lowu Tsakeke. Va bule katsongo hi Vaefesa 5:3. Wansati yoloye ni Timbhoni va nyikane tinomboro ta tinqingho. Endzhaku ka mavhiki mambirhi, wansati yoloye u be riqingho kutani a ku: “A ndzi nga tirhandzi Timbhoni ta Yehovha. Hambiswiritano, ndzi yi hlayile broxara naswona ya tsakisa. Yi ndzi pfune ku tlhantlha swiphiqo swa vukati bya mina naswona yi tlhele yi pfuna vatekani van’wana vambirhi. Langutelo leri a ndzi ri na rona hi Timbhoni ta Yehovha a ri hoxile. Ndzi kombela mi ta leswaku mi ta dyondza na mina Bibele.” Wansati yoloye u sungule ku dyondza ku katsa ni vatekani van’wana lava a va pfuneke.

Ankasie i xidorobana xa le Ghana. Vaxavisi vo tala va veka swilo swa vona exitarateni. Musumbhunuku wun’wana ni wun’wana vamakwerhu va chumayela hi ku tirhisa xigolonyana xa minkandziyiso. Endzhaku ka loko makwerhu loyi a vuriwaka Samuel a chumayele Enoch ni ku n’wi nyika broxara leyi nge Yingisa Xikwembu, Enoch u vutise Samuel loko a ri ni nkandziyiso hi ririmi ra Xikusaal.

 Samuel u hlamule a ku: “Ndzi khomele, a hi na wona. Kambe hi ni broxara ya Xifrafra,” ku nga ririmi leri yelanaka na rona. Endzhakunyana, loko Enoch a nga si ya ekaya rakwe leri nga en’walungu, u kombele minkandziyiso leswaku a ta nyika maxaka yakwe.

Loko a vuya eAnkasie, u nyike Samuel buku. Enoch u hundzuluxele broxara leyi nge Yingisa Xikwembu! hi ririmi ra Xikusaal! U ya emahlweni a va kona eminhlanganweni naswona u dyondza Bibele nkarhi na nkarhi.