HI Ravunharhu, September 23, 2015, Huvo leyi Fumaka yi tivise mindyangu ya Bethele emisaveni hinkwayo hi ku cinca loku endliweke enhlengeletanweni ku endlela leswaku mali leyi nyikeriweke yi ta tirhisiwa hi vutlhari. Kutani, hi Mugqivela, October 3, 2015, xitiviso xa Huvo leyi Fumaka xi hlamusele xi ku: “Eka Vafilipiya 1:10, hi byeriwa leswaku hi fanele hi ‘tiyiseka hi swilo swa nkoka swinene.’ Hi ku pfumelelana ni ndzayo leyi ya vutlhari, hi [Huvo leyi Fumaka] tsakela ku rhangisa mintirho leyi hoxaka xandla swinene leswaku vanhu va Xikwembu va va ni vuxaka na xona swin’we ni ku yisa ntirho wo chumayela emahlweni emisaveni hinkwayo.”

 Stephen Lett xirho xa Huvo leyi Fumaka u ye emahlweni a hlamusela eka JW Broadcasting, a ku: “Huvo leyi Fumaka yi swi teka swi ri swa nkoka ku rhangisa ntirho wa Mfumo ensin’wini, lerova yi endle xiboho xo hunguta vanhu emarhavini hinkwawo leswaku mali yo tala yi ta tirhisiwa eka ntirho wo chumayela. Hi xikombiso, mintirho yin’wana leyi a yi endliwa eBethele yi hungutiwile kumbe yi nga ha endliwi. Kutani sweswo swi endle leswaku ku laveka vatirhi vatsongo eBethele.”

Hikwalaho, ku sukela hi September 2015, swirho swa ndyangu wa Bethele emisaveni hinkwayo swa kwalomu ka 5 500 swi komberiwe ku ya ensin’wini. Hambileswi ku cinca ko tano a ku lava mindzulamiso yo tala, nkateko wa Yehovha wu ye emahlweni wu vonaka naswona sweswo swi endle leswaku ntirho wo chumayela ni ku dyondzisa wu ya emahlweni.

Vatekani van’wana va le Sri Lanka lava a va ri eBethele kambe va komberiweke ku ya ensin’wini, va teke sweswo ku ri nkarhi wo kombisa leswaku va ni ripfumelo eka Yehovha ni ku tlhela va tshemba nhlengeletano yakwe. Va tsale va ku: “A hi nga tiyiseki leswaku swilo swi ta famba njhani. Kambe a hi tiyiseka leswaku Yehovha a nge hi fularheli. Kutani hi khongele hi ku, ‘Yehovha ha ku kombela leswaku eka xiyimo xin’wana ni xin’wana lexi hi nga ta langutana na xona, u hi pfuna ku endla mindzulamiso leswaku havumbirhi bya hina hi va maphayona ya nkarhi hinkwawo.’ Eka n’hweti yo sungula, a hi nga ri na swilo swo tala swo tihanyisa hi swona. Hambiswiritano, hi vone rirhandzu ra Yehovha ni nkhathalelo wakwe naswona sweswi hi ni mali leyi hi pfunaka ku xava swilo leswi hi swi lavaka. Hi khomekile swinene hi ntirho wa le kaya, wo tihanyisa ni ku  phayona. Kambe ha swi kota ku tirhisa nkarhi wa hina hi vutlhari hikwalaho ka ndzetelo lowu hi wu kumeke eBethele. A wu kona nchumu lowu tsakisaka ku tlula ku pfuna vanhu leswaku va tiva ntiyiso naswona hi tsakile swinene tanihi leswi hi endlaka tano hi ku va maphayona.”

Swirho swin’wana swa le Bethele ya le Colombia leswi komberiweke ku ya ensin’wini, swi dyondze ririmi lerintshwa naswona swi rhurhele etindhawini ta le kule leswaku swi ya chumayela rungula ra Mfumo eka vanhu lava tshamaka kwalaho. Vamakwerhu lava va tlhele va va mpfuno eka mavandlha lawa va yeke eka wona. Mulanguteri wa muganga u tsale leswi hi vatekani lava a va averiwe evandlheni leri nga emugangeni lowu a wu endzelaka: “Vamakwerhu evandlheni va wu tlangela swinene mpfuno wa vona. Vandlha se ri hlanganyela hi xitalo ensin’wini naswona vamakwerhu va kwalaho va leteriwe ku endla swiavelo swo hambanahambana evandlheni.” Vo tala va vamakwerhu lava a va ri eBethele va ya va ya pfuneta eBethele siku rin’we kumbe yo hlayanyana evhikini.

Makwerhu wa xinuna loyi a ri eBethele ya le Japani ku ringana malembe ya 31 u averiwe ku ya evandlheni leri a ri ri ni vakulu vambirhi. Leswi vandlha rero a ri fanele ri pfuxeta Holo ya Mfumo, a endle xiboho xa leswaku u ta rhanga a tshama mavhiki mambirhi a nga si kuma ntirho. Loko va nga si sungula ku yi pfuxeta, ku ve ni ku tsekatseka ka misava loku endlaka mpimo wa 7,0 loku onheke ndhawu ya le Kumamoto, laha a ku ri ni vandlha leri a hlanganyela eka rona. Tanihi leswi a nga si tirha, u swi kotile ku rhangela eka ntirho wo phalala ni ku tlhela a endla maendzo ya vurisi endzhaku ka ku tsekatseka ka misava. U ri: “Loko ndzi anakanya hi nkarhi wolowo, ndza swi vona leswaku  Yehovha u ndzi yisa etindhawini leti ku nga ta va ni xilaveko lexikulu.”

Phil na Sugar, lava a va ri erhavini ra le Australasia va hlamusela: “Loko hi komberiwa ku ya ensin’wini, a hi tiyimisele ku hanya vutomi byo olova. Hi khongele eka Yehovha leswaku a hi nyika nkongomiso lowu nga ta hi pfuna ku endla swiboho swa vutlhari ni ku tlhela a katekisa swiboho swin’wana ni swin’wana leswi a hi swi endla. Lexi a hi xi lava a ku ri ku ya chumayela evandlheni ra ririmi rin’wana. Hakunene Yehovha u swi katekisile swiboho swa hina ni ku endla leswaku swilo swi hi fambela kahle leswaku hi ta n’wi tirhela hi mbilu hinkwayo!” Sweswi va hlanganyela eka ntlawa wa Xinghezi lowu nga eXihlaleni xa Samal, eDavao, le Philippines, laha ku nga ni vahuweleri va 34 ni maphayona ya nkarhi hinkwawo ya kaye. Sweswi va ni tiadirese ta vanhu lava tsakelaka lava ringanaka 120, lava faneleke va tlhelela eka vona. Va ya emahlweni va ku: “Ku ni ntirho wo tala wo tsakisa lowu faneleke wu endliwa. Ha tsaka hikwalaho ka leswi hi tshembeke Yehovha hi ku helela. Hakunene swi endle leswaku hi va ni ripfumelo leri tiyeke ni ku tlhela hi n’wi rhandza!”

Makwerhu wa xisati loyi a nga tekiwangiki wa le Rhaxiya loyi a komberiweke ku ya va phayona ro hlawuleka u ri: “Ku phayona swi ndzi nyika nkarhi wo hlanganyela hi xitalo eka ntirho wa nkoka, lowu nga taka wu nga ha endliwi nakambe, wo chumayela hi Mfumo wa Xikwembu. Ndza tsaka swinene hi leswi ndzi tirhisiwaka hi Yehovha.” Sweswinyana u fambisa tidyondzo ta Bibele ta tsevu. U dyondza ni vanhu lava humaka eIraq, Nigeria, Sri Lanka, Syria ni le Zambia.

Swirho swo tala swa ndyangu wa Bethele eZambia swi komberiwe ku va maphayona ya nkarhi hinkwawo.  Swa tsaka swinene ku hlanganyela hi xitalo ensin’wini. Andrew loyi a nga phayona swin’we ni nsati wakwe u ri: “Endzhaku ka loko ha ha ku huma eBethele hi pfune vanhu vambirhi lava a va nga swi koti ku hlaya ni ku tsala. Un’wana wa swichudeni swa hina, ku nga jaha leri nga ni malembe ya khume, ku nga ri khale ri ta nyikela nkulumo ya rona yo sungula eka minhlangano ya le xikarhi ka vhiki. Vatekani van’wana lava hi va chumayeleke va ve kona eXitsundzuxweni naswona ku sukela siku rero a va si tshama va xwa eminhlanganweni. Va le ku endleni ka nhluvuko eka dyondzo ya vona ya Bibele. Ha swi xiya leswaku swilo leswi hinkwaswo a swi ta va swi nga kotekanga loko a hi nga landzelanga nkongomiso wa Yehovha, nseketelo wakwe ni ku tlhela hi rindzela nkateko wakwe.”

Edson na Artness lava na vona va tshamaka eZambia, a va ri ni tin’hweti ti nga ri tingani va tekanile loko va komberiwa ku ya ensin’wini. Artness u ri: “Ndzetelo lowu hi wu kumeke eBethele wu hi pfune ku tirhisa swilo leswi hi nga na swona hi vutlhari, ku tshama hi tsakile ni ku tlhela hi nga vi na swikweleti. A hi tisoli hi leswi hi yeke eBethele. Hi dyondze ndlela yo tiendlela tipakani to tirhela Yehovha ni ku tlhela hi ti fikelela hikwalaho ko pfuniwa hi yena. Ripfumelo ra hina eka Yehovha ri tiyile naswona hi lunghekele ku ya emahlweni hi tshembeka eka yena.”