Loko u ri karhi u hlaya broxara leyi, xana a swi ku hlamarisanga ku xiya leswaku Bibele yo kwatsa loko yi vulavula hi sayense? Vo tala swa va hlamarisa. Va tlhela va hlamarisiwa hi leswaku swin’wana swa leswi vukhongeri byo tala byi swi vulaka Bibele a yi vuli swona. Hi xikombiso, vukhongeri byin’wana byi vula leswaku Bibele yi dyondzisa leswaku Xikwembu xi endle tilo ni misava ni swilo hinkwaswo leswi nga eka yona hi masiku ya tsevu lama nga ni tiawara ta 24. Kahlekahle a xi kona ni xin’we eBibeleni lexi kanetaka sayense emhakeni ya leswaku tilo ni misava swi sungule rini. a

Nakambe, leswi Bibele yi swi vulaka mayelana ni ndlela leyi Xikwembu xi tumbuluxeke vutomi hayona laha misaveni yi endla hi lava ku kambisisa sayense ni tidyondzo ta yona. Bibele ya vula leswaku Xikwembu xi vumbe swilo hinkwaswo ni swilo leswi hanyaka hi ku ya hi “mixaka ya swona.” (Genesa 1:11, 21, 24) Tidyondzo leti ti nga va ti nga pfumelelani ni tidyondzo to karhi ta sayense kambe a ti kanetani ni tidyondzo ta sayense leti ku veke ni vumbhoni bya leswaku i ntiyiso. Hi ku ya hi matimu, tidyondzo ta sayense i ntiyiso namuntlha ivi mundzuku ti va mavunwa; kambe leswi tiyisekisiweke swi tshama swi ri ntiyiso.

Hambiswiritano, vanhu vo tala va kanakana ku kambisisa Bibele hikwalaho ko hetiwa matimba hi vukhongeri. Etikerekeni va vona vukanganyisi, vukungundzwana ni ku khutaza tinyimpi. Xana swa twala ku avanyisa Bibele hi ku ya hi mahanyelo ya vanhu lava vulaka leswaku va hanya hi ku ya hi yona? Van’wasayense lava nga ni musa va tsemeke nhlana hikwalaho ka vanhu lava nga ni tihanyi ni xihlawuhlawu lava tirhisaka dyondzo ya ivholuxini ku seketela mavonelo ya vona. Xana swa twala ku avanyisa dyondzo ya ivholuxini hi ku ya hi sweswo? I swinene, ku kambisisa dyondzo yoleyo kutani u yi pimanisa ni vumbhoni lebyi nga kona.

Hi ku khutaza leswaku u endla leswi fanaka hi Bibele. Swi nga ku hlamarisa swinene ku tiva leswaku leswi Bibele yi swi dyondzisaka swa hambana ni leswi tikereke to tala ti  swi vulaka. Bibele a yi khutazi tinyimpi ni ku lwa ka tinxaka kambe yi dyondzisa leswaku malandza ya Xikwembu ma fanele ma venga nyimpi naswona ma nga vengani, ku nga swona leswi vangaka madzolonga. (Esaya 2:2-4; Matewu 5:43, 44; 26:52) Bibele a yi khutazi ku hiseka ku tlula mpimo evukhongerini ni ku va ni ripfumelo leri nga riki ni vumbhoni. Kambe yi dyondzisa leswaku vumbhoni i bya nkoka leswaku vanhu va va ni ripfumelo ra ntiyiso ni leswaku va fanele va tirhisa matimba yo ehleketa loko va tirhela Xikwembu. (Varhoma 12:1; Vaheveru 11:1) Bibele a yi hi khutazi leswaku hi nga lavi ku tiva kambe yi hi khutaza ku kuma tinhlamulo ta swivutiso swo tsakisa ni leswi tikaka leswi vanhu va nga na swona.

Hi xikombiso, xana u tshame u tivutisa leswi, ‘Loko Xikwembu xi ri kona, hikwalaho ka yini xi pfumelela vubihi?’ Bibele ya xi hlamula xivutiso xexo, swin’we ni swin’wana swo tala hi ndlela leyi enerisaka. b Hi ku khutaza leswaku u lavisisa leswi nga ntiyiso hi Bibele. U nga kuma tinhlamulo leti tsakisaka ni leti nga ntiyiso, leti nga ni vumbhoni lebyi khomekaka. Naswona tinhlamulo ta kona ti kumeka eBibeleni.