Eka Vamakwerhu:

Ku rhandza Xikwembu ni vanhu swi hi susumetela ku ‘famba hi ya endla vanhu va matiko hinkwawo va va vadyondzisiwa, hi va khuvula.’ (Mat. 28:19, 20; Mar. 12:28-31) Rirhandzu ra xiviri ri ni matimba. Ri nga khumba timbilu ta vanhu lava “kombiseke leswaku va lava ku kuma vutomi lebyi nga heriki.”—Mit. 13:48.

Enkarhini lowu nga hundza, a hi tikarhatela ku tiva swingheniso hi nhloko ni ku siya mikandziyiso. Sweswi hi fanele hi tikarhatela ku antswisa vuswikoti bya hina byo vulavula ni vanhu. Hi lava ku kombisa vanhu leswaku ha va rhandza hi ku vulavula na vona hi timhaka leti va tsakisaka. Leswi vulaka leswaku hi fanele hi fambisana ni swiyimo hi tlhela hi va ni vuxiyaxiya hi ku kambisisa swilo leswi vilerisaka munhu ha un’we ni leswi n’wi tsakisaka. Xana broxara leyi yi ta hi pfuna njhani ku endla tano?

Broxara leyi yi ni tidyondzo ta 12 leti hi dyondzisaka vumunhu lebyi hi faneleke hi va na byona leswaku hi ta kota ku va ni rirhandzu hi tlhela hi endla vadyondzisiwa. Dyondzo ha yin’we yi huma eka rungula ra le Bibeleni laha Yesu kumbe muchumayeri un’wana wa le nkarhini wa vaapostola a kombiseke vumunhu byo karhi ensin’wini. Xikongomelo xa hina a hi ku nhlokohata swingheniso, kambe i ku lava tindlela leti hi nga kombisaka vanhu rirhandzu hatona. Hambileswi vumunhu ha byin’we byi lavekaka eka swiyenge hinkwaswo swa ntirho wa hina wo chumayela, hi ta kambisisa ndlela leyi vumunhu byo karhi byi tirhaka hakona loko hi sungula mabulo, hi endla maendzo yo vuyela kumbe hi fambisa tidyondzo ta Bibele.

Loko u ri karhi u kambisa dyondzo ha yin’we, ehleketisisa kahle mayelana ni ndlela leyi u nga byi kombisaka hayona vumunhu byebyo loko u vulavula ni vanhu va laha u tshamaka kona. Tiyimisele ku tiyisa ndlela leyi u rhandzaka Yehovha ni vanhu hayona. Rirhandzu ro tano, leri tlulaka nchumu wun’wana ni wun’wana, ri ta ku pfuna ku fikelela swo karhi leswaku u endla vadyondzisiwa.

Ha wu tlangela nkateko lowukulu wo tirha na n’wina. (Sof. 3:9) Onge Yehovha a nga mi katekisa swinene leswi mi yaka emahlweni mi rhandza vanhu ni ku endla vadyondzisiwa!