LOKO Yesu a ri eNtshaveni ya Mitlhwari, laha a a kota ku wu vona kahle muti wa Yerusalema ni tempele ya wona, vaapostola vakwe va mune va n’wi kombele leswaku a va byela nhlamuselo ya leswi a tshameke a swi vula. Yesu a a vule leswaku tempele ya le Yerusalema yi ta lovisiwa, naswona a a tshame a va byela hi ‘makumu ya mafambiselo ya swilo.’ (Matewu 13:40, 49) Kutani vaapostola va n’wi vutisile va ku: “Xi ta va xihi xikombiso xa vukona bya wena ni xa makumu ya mafambiselo ya swilo?”—Matewu 24:3.

Loko a va hlamula u va byele leswi a swi ta endleka loko muti wa Yerusalema wu nga si lovisiwa. Kambe u tlhele a vula ni swin’wana. Vuprofeta byakwe a byi ta hetiseka hi ndlela leyikulu emisaveni hinkwayo enkarhini lowu taka. Yesu u profete leswaku ku ta va ni swiendlakalo leswi nga ta humelela hi ku landzelelana ni swiyimo swa misava leswi a swi ta vumba xikombiso xo karhi. Xikombiso xolexo a xi ta kombisa lava nga laha misaveni leswaku Yesu se u sungurile ku fuma tanihi Hosi etilweni. Hi marito man’wana, xikombiso xolexo a xi ta kombisa leswaku Yehovha Xikwembu u endle Yesu Hosi ya Mfumo lowu a wu tshembisiwe khale. Leswi a swi ta vula leswaku Mfumo wa Xikwembu wu ta herisa vubihi hinkwabyo kutani wu tisa ku rhula eka vanhu hinkwavo. Swilo leswi Yesu a nga profeta ha swona a swi ta va xikombiso xa masiku ya makumu—ku nga timhaka ta vukhongeri, swiyimo swa tipolitiki ni swiyimo swa misava leyi hi hanyaka eka yona—ni xa masungulo ya misava leyintshwa.

Loko Yesu a hlamusela leswi a swi ta endleka emisaveni loko a sungula ku fuma tanihi Hosi etilweni, u vule leswaku a ku ta va ni tinyimpi ematikweni yo hambana-hambana, ku kayivela ka swakudya, ku tsekatseka lokukulu ka misava ni mavabyi yo tala. Naswona vuhomboloki a byi ta andza. Hi nkarhi wolowo, vadyondzisiwa va ntiyiso va Yesu a va ta chumayela mahungu lamanene ya Mfumo wa Xikwembu emisaveni hinkwayo. Swilo leswi hinkwaswo swi ta nyanya loko ku fika “nhlomulo lowukulu” lowu ku nga si tshamaka ku humelela lowu fanaka na wona.—Matewu 24:21.

Xana valandzeri va Yesu a va ta swi tivisa ku yini loko nhlomulo wolowo se wu tshinerile? Yesu u te: “Dyondzani mhaka leyi hi xifaniso xa nkuwa.” (Matewu 24:32) Loko murhi wa nkuwa wu hluka, sweswo swi vula leswaku ximumu xi tshinele. Hilaha ku fanaka, loko munhu a vona swilo hinkwaswo leswi Yesu a nga profeta leswaku swi ta endleka hi nkarhi wun’we, a swi ta va erivaleni leswaku makumu ma tshinele. A ku na munhu loyi a tivaka siku ni nkarhi lowu nhlomulo lowukulu wu nga ta sungula ha wona handle ka Yehovha. Hikwalaho Yesu u khutaze vadyondzisiwa vakwe a ku: “Tshamani mi hitekile, hikuva a mi swi tivi leswaku nkarhi lowu vekiweke wu fika rini.”—Marka 13:33.

—Xi sekeriwe eka Matewu ndzima 24 na ndzima 25; Marka ndzima 13; Luka ndzima 21.