LOKO a wu ri ni matimba yo pfuna munhu la nga emaxangwini, xana a wu ta endla tano? Vatirhi vo phalala hakanyingi va tsutsumela laha ku humeleleke mhangu ya ntumbuluko leswaku va ya pfuna lava nga emaxangwini ni ku ponisa vanhu vambe. Kutani munhu a nga ha tivutisa a ku, ‘Ha yini Xikwembu xi nga hatlisanga xi lovisa Diyavulosi, la vangelaka vanhu maxangu yo tala?’

Leswaku u kota ku hlamula xivutiso lexi, hi mahlo ya mianakanyo vona nandzu wa nkoka lowu tengiwaka ehubyeni. Leswi mudlayi a nga laviki ku tengisiwa, u vula leswaku muavanyisi a nga tshembekanga endleleni leyi a tengaka nandzu lowu ha yona naswona u tlhela a vula leswaku muavanyisi u fumbarherise vaseketeri vakwe lava hlawuriweke ku humesa xigwevo. Kutani timbhoni to tala ti pfumeleriwa ku nyikela vumbhoni eka nandzu wa kona.

Muavanyisi wa swi tiva leswaku magoza lama enteke yo tenga nandzu ma ta vanga swiphiqo swo tala naswona a nga tsakela leswaku nandzu lowu wu nga teki nkarhi wo leha. Kambe muavanyisi u xiya leswaku yena ni mudlayi va fanele va va ni nkarhi lowu eneleke wo hlamusela timhaka ta vona leswaku ku ta fikeleriwa xigwevo lexi nga ta va xikombiso lexi nga ta tirhisiwa eka milandzu leyi nga ha vaka kona enkarhini lowu taka.

Xifaniso lexi xi fana njhani ni swihehlo leswi Diyavulosi loyi nakambe a vuriwaka “dragona,” “nyoka” na “Sathana,” a n’wi hehleke ha swona Yehovha “La nge Henhla-henhla emisaveni hinkwayo”? (Nhlavutelo 12:9; Pisalema 83:18) Kahle-kahle Diyavulosi i mani? Hi swihi swihehlo leswi a hehleke Yehovha Xikwembu ha swona? Nakambe xana Xikwembu xi ta n’wi lovisa rini?

Eku sunguleni, yin’wana ya tintsumi ta Xikwembu leyi hetisekeke yi hundzukeke Diyavulosi. (Yobo 1:6, 7) U hundzeke Diyavulosi loko a sungule ku anakanyisisa swinene hi ku navela ka vutianakanyi ko lava ku gandzeriwa hi vanhu. Kutani u tlhontlhe mfanelo ya Xikwembu yo fuma a kala a vula leswaku a xi faneriwi hi ku gandzeriwa. U vule leswaku vanhu va tirhela Xikwembu ntsena loko xi va fumbarherisa hi mikateko. Sathana u vule leswaku vanhu hinkwavo va nga ‘rhukana’ Muvumbi wa vona loko va ri emaxangwini.—Yobo 1:8-11; 2:4, 5.

Swihehlo sweswo swa Sathana a swi lava tinhlamulo leti a ti nga ta nyikeriwa ntsena hi ku va Xikwembu xi n’wi lovisa xikan’we-kan’we. Entiyisweni, loko Xikwembu a xi lo n’wi lovisa entangeni wa Edeni, kumbexana van’wana a va ta ehleketa leswaku Diyavulosi u tiyisile. Xisweswo, leswi Xikwembu xi nga ni vulawuri lebyi tlakukeke, xi sungule ku teka magoza ya nawu leswaku xi lulamisa swihehlo leswi emahlweni ka vanhu hinkwavo lava hlaleleke.

Hi ku pfumelelana ni milawu ni vululami byakwe lebyi hetisekeke, Yehovha Xikwembu u kombise leswaku yena swin’we na Sathana va ta va ni vaseketeri lava nga ta nyikela vumbhoni eka njhekanjhekisano lowu. Nkarhi lowu a wu pfumeleleke wu hundza, wu endle leswaku vana va Adamu va kota ku hanya ni ku nyikela vumbhoni lebyi yimaka na yena hi ku hlawula hi ku swi rhandza ku tshama va tshembekile ku nga khathariseki maxangu hinkwawo lawa va langutanaka na wona.

Yehovha Xikwembu u swi tiva kahle leswaku loko swihehlo sweswo swa ha lulamisiwa, vanhu va ta hambeta va xaniseka. Kambe u tiyimisele ku humesa xigwevo hi ku hatlisa swinene hilaha a nga kotaka hakona. Bibele yi n’wi hlamusela tanihi “Tatana la nga ni tintswalo letikulu tlhelo Xikwembu xa nchavelelo hinkwawo.” (2 Vakorinto 1:3) Swi le rivaleni leswaku “Xikwembu xa nchavelelo hinkwawo” a xi nge n’wi pfumeleli Diyavulosi leswaku a hambeta a hanya nkarhi wo leha swi nga fanelanga hambi ku ri ku pfumelela nkucetelo wakwe wu hambeta wu va kona. Kambe Xikwembu a xi nge n’wi lovisi Diyavulosi nkarhi wu nga si fika naswona xi nga si wu herisa hi ku helela njhekanjhekisano lowu khumbaka vanhu hinkwavo.

Loko njhekanjhekisano wu herile, mfanelo ya Yehovha yo fuma yi ta va yi lweriwe hi ku helela. Nandzu wa le nawini wa Sathana wu ta va xikombiso xa le nawini xa hilaha ku nga heriki. Loko Yehovha o tlhela a tlhontlhiwa, ku nga ha kombeteriwa emhakeni ya Sathana tanihi xikombiso lexi nga ta ka xi nga phindhiwi.

Hi nkarhi lowu faneleke, Yehovha Xikwembu u ta lerisa N’wana wakwe la pfuxiweke leswaku a herisa Diyavulosi ni mintirho yakwe hinkwayo. Bibele yi hi byela hi nkarhi lowu Kreste a nga ta “nyiketa mfumo eka Xikwembu tlhelo Tata wakwe, loko a herise hulumendhe hinkwayo ni vulawuri ni vuhosi hinkwabyo. Hikuva u fanele a va hosi ku fikela loko Xikwembu xi veke valala hinkwavo ehansi ka milenge ya yena.”—1 Vakorinto 15:24-26.

Lexi tsakisa, Bibele yi tshembisa leswaku misava hinkwayo yi ta va Paradeyisi. Vanhu va ta hanya eparadeyisini leyi nga ni ku rhula hilaha Xikwembu a xi kunguhate hakona eku sunguleni. “Lavo rhula va ta dya ndzhaka ya misava, hakunene va ta kuma ntsako lowu heleleke eku rhuleni lokukulu. Lavo lulama va ta dya ndzhaka ya misava, va ta tshama eka yona hi masiku.”—Pisalema 37:11, 29.

Ehleketa hi ntshembo lowukulu wa malandza ya Xikwembu lowu hlamuseriwaka eBibeleni: “Waswivo! Ntsonga wa Xikwembu wu le vanhwini, xi ta tshama na vona, naswona vona va ta va vanhu va xona. Xikwembu hi xiviri xi ta va na vona. Kutani xi ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona. Swilo swo sungula swi hundzile.”—Nhlavutelo 21:3, 4.