Endzhaku ka mhangu leyi endlekeke hi April 2010 endhawini leyi ku tswongiwaka eka yona oyili, gasi ni oyili yo tala swinene yi khulukele elwandle ku ringana tin’hweti leti nga ehansinyana ka tinharhu. Eka nkambisiso wun’wana lowu endliweke hi ntlawa wun’wana wa valavisisi ku kumiwe leswaku endzhaku ka tin’hweti timbirhi ni hafu, tikhemikhali tin’wana leti thyakisaka ti dyiwe hi tibakheriya leti dyaka methane. Hambiswiritano, swidyondzeki swin’wana a swi yi tshembi kahle mhaka leyi. Swi tshemba leswaku yo tala ya oyili yoleyo yi nghene ehansi ka vuandlalo bya lwandle.

Phepha-hungu ra Rossiiskaya Gazeta ri vika leswaku hi ku ya hi nkambisiso wun’wana, 59 wa tiphesente ta Marhaxiya lama nga ni malembe ya 18 ku ya eka 35 ma pfumela leswaku “minkarhi yin’wana u fanele u tlula milawu ya wena ya mahanyelo leswaku u humelela evuton’wini.”

Yin’wana ya mimpupurha ya khale swinene leyi tshameke yi kumiwa (yo fana ni lowu kombisiweke laha henhla) yi kombisa leswaku vaaki va le n’walungwini wa Peru a va katinga mbhacha ni ku endla mapa emalembeni ya kwalomu ka 3 000 lama hundzeke.

Lucio Soravito De Franceschi, bixopo wa kereke ya Khatoliki ya le Adria-Rovigo, u vule leswaku rungula ra vukhongeri ri khutaza “ku vulavula ni vanhu hi ku kongoma” emakaya ya vona. U te: “Ndlela leyi hi khathalaka ha yona hi vanhu yi fanele yi hi susumetela ku va endzela emakaya ya vona ematshan’weni yo va rhambela ekerekeni hi ku ba xingelengele.”

Ntsengo lowu timhondzo ta timhelembe ti xavisiwaka ha wona swi nga ri enawini leswaku ku ta endliwa murhi wu tlakukile swinene lerova khilogiramu yin’we i R540 000. Hi 2011, eAfrika Dzonga ntsena, vahloti lava nga riki enawini va dlaye timhelembe ta 448. Timuziyamu ni tindhawu to xavisela eka tona swilo hi mphikizano ta le Yuropa ti tshoviwile hi tinsulavoya leti lavaka timhondzo ta timhelembe. Ku vuriwa leswaku hambi ku ri timhelembe leti nga emintangeni ya swiharhi ya le Yuropa ti le khombyeni.