LANGUTELO RA BIBELE
Vukati
Xana vukati i ku hlanganisiwa ka vanhu ntsena?
“Leswi Xikwembu xi swi paneke swin’we, ku nga tshuki ku va ni munhu la swi hambanisaka.”—Matewu 19:6.
LESWI BIBELE YI SWI VULAKA
Emahlweni ka Xikwembu, vukati a hi lunghiselelo leri hlanganisaka vanhu ntsena. I xiboho xo kwetsima exikarhi ka wanuna ni wansati. Bibele yi ri: “Ku sukela eku sunguleni ka ntumbuluko ‘[Xikwembu] xi endle waxinuna ni waxisati. Hikwalaho wanuna u ta siya tata wakwe ni mana wakwe, naswona lavambirhi va ta va nyama yin’we’ . . . Hikokwalaho leswi Xikwembu xi swi paneke swin’we, ku nga tshuki ku va ni munhu la swi hambanisaka.” *—Marka 10:6-9; Genesa 2:24.
Marito lama nge, “leswi Xikwembu xi swi paneke [kumbe xi swi hlanganiseke] swin’we,” a ma vuli swona leswaku vukati byi hleriwa etilweni. Ku ri na sweswo, loko Bibele yi vula leswaku Muvumbi wa hina hi yena Musunguri wa lunghiselelo ra vukati, yi kandziyisa leswaku lunghiselelo leri i ra nkoka. Mimpatswa leyi langutaka vukati hi ndlela yoleyo yi byi teka byi ri xiboho xo kwetsima, xa vutomi hinkwabyo, hi ndlela yoleyo yi tiyisa ku tiyimisela ka yona ku endla leswaku vukati bya yona byi humelela. Yi va ni vukati lebyi humelelaka loko yi lava nkongomiso wa le Bibeleni leswaku yi hetisisa vutihlamuleri bya yona bya le ndyangwini tanihi nuna ni nsati.
Hi byihi vutihlamuleri bya wanuna?
“Wanuna i nhloko ya nsati wakwe.”—Vaefesa 5:23.
LESWI BIBELE YI SWI VULAKA
Leswaku swilo swi famba kahle endyangwini, munhu wo karhi u fanele a endla swiboho hi timhaka to karhi. Bibele yi nyika wanuna vutihlamuleri byolebyo. Kambe sweswo a swi vuli swona leswaku u fanele a va makhonya. Naswona a yi n’wi pfumeleli ku nga hetisisi vutihlamuleri byakwe, ivi a endla leswaku nsati wakwe a nga ha n’wi xiximi ni ku tikisela nsati wakwe swi nga fanelanga. Ematshan’weni ya sweswo, Xikwembu xi langutele leswaku a tirha hi matimba leswaku a khathalela nsati wakwe a tlhela a n’wi xixima tanihi munghana wakwe lonkulu ni la n’wi tshembaka. (1 Timotiya 5:8; 1 Petro 3:7) Vaefesa 5:28 yi ri: “Vavanuna va fanele ku rhandza vasati va vona ku fana ni mimiri ya vona.”
Wanuna loyi entiyisweni a rhandzaka nsati wakwe u byi teka byi ri bya nkoka vuswikoti bya nsati wakwe naswona hi xichavo u ma tekela enhlokweni mavonelo yakwe, ngopfu-ngopfu etimhakeni leti nga ha khumbaka ndyangu. A nga fanelanga a sindzisa leswaku swilo swi endliwa hi ndlela yakwe hikwalaho ka leswi a nga nhloko ya ndyangu. Loko Abrahama wanuna loyi a a chava Xikwembu a ale ku yingisa xitsundzuxo xa nsati wakwe lexi twalaka etimhakeni leti khumbaka ndyangu, Yehovha Xikwembu u te: “Yingisa rito rakwe.” (Genesa 21:9-12) Hi ku titsongahata Abrahama u yingisile naswona ndyangu wakwe wu ve ni ku rhula ni vun’we wu tlhela wu katekisiwa hi Xikwembu.
Hi byihi vutihlamuleri bya wansati?
“Vavasati lava tekiweke, tivekeni ehansi ka vanuna va n’wina.”—1 Petro 3:1.
LESWI BIBELE YI SWI VULAKA
Loko Xikwembu xi nga si vumbela wanuna wo sungula nsati, xi te: “A hi swinene leswaku munhu a hambeta a tshama a ri yexe. Ndzi ta n’wi endlela mupfuni, a va muhetisisi wa yena.” (Genesa 2:18) Nchumu lowu hetisisaka wu endla leswaku xilo xi helela kumbe xi hetiseka. Xisweswo, Xikwembu xi vumbe wansati, ku nga ri leswaku a fana ni wanuna kumbe leswaku a phikizana na yena, kambe leswaku a va muhetisisi wa yena. Havumbirhi bya vona va hetisisa xileriso xa vona lexi Xikwembu xi va nyikeke xona xa leswaku va va ni vana va tlhela va tata misava hi vanhu.—Genesa 1:28.
Leswaku wansati a kota ku hetisisa vutihlamuleri byakwe, Xikwembu xi n’wi nyike miri lowunene, mianakanyo ni timfanelo letinene. Loko a tirhisa swilo leswi hi vutlhari ni hi rirhandzu, u ta va a hoxa xandla swinene eku endleni ka leswaku vukati byakwe byi va lebyi humelelaka naswona u ta endla leswaku nuna wakwe a titwa a enerisekile naswona a tsaka. Wansati wo tano lonene u faneriwa hi ku dzunisiwa ematihlweni ya Xikwembu. *—Swivuriso 31:28, 31.
^ ndzim. 5 Bibele yi pfumela ku dlaya vukati ntsena loko munghana lowun’wana wa vukati a endle vuoswi.—Matewu 19:9.
^ ndzim. 14 Mimpatswa yi nga kuma swiringanyeto swo tala leswi nga yi pfunaka evukatini ni le vuton’wini bya ndyangu eka swihloko leswi humaka nkarhi na nkarhi eka Xalamuka! leswi nge “Leswi Nga Pfunaka Ndyangu.”
U Nga Ha Tsakela
U NGA VA NI NDYANGU LOWU TSAKEKE
Titshege Hi Xikwembu Leswaku U Va Ni Vukati Lebyi Tsakisaka
Ku tirhisa swivutiso swimbirhi swo olova swi nga ku pfuna leswaku u antswisa vukati bya wena.
SWIVUTISO LESWI HLAMURIWAKA HI BIBELE
Bibele Yi Ri Yini Hi Wanuna Ni Wansati Lava Tshamaka Swin’we Va Nga Tekananga Hi Nawu?
Milawu ya Xikwembu yi pfuna vatekani ku tiva ndlela leyi va faneleke va hanyisana ha yona naswona mikarhi hinkwayo yi pfuna lava yi yingisaka.
SWIVUTISO LESWI HLAMURIWAKA HI BIBELE
Xana Bibele Yi Ri Yini Hi Ku Tekana Ka Vanhu Va Tinxaka To Hambana?
Kambisisa yin’wana ya milawu ya Bibele leyi kombisaka ku ringana ka tinxaka ni vukati.
SWIVUTISO LESWI HLAMURIWAKA HI BIBELE
Xana Bibele Ya Vulavula Hi Ku Tekana Ka Vanhu Va Rimbewu Leri Fanaka?
Musunguri wa vukati u fanela a yi tiva kahle ndlela yo va ni vukati lebyi tsakisaka ni lebyi khomelelaka.
SWIVUTISO LESWI HLAMURIWAKA HI BIBELE
Xana Ku Teka Tshengwe Swa Amukeleka?
Xana ku teka tshengwe swi huma eka Xikwembu? Xiya leswi Bibele yi swi vulaka hi ku teka tshengwe.
