Hi kombela u hi hlamusela leswaku ha yini a wu pfumela eka dyondzo ya ku tiendlekela ka swilo.

Hambileswi ndzi kuleke ndzi nghena kereke ya Khatoliki, a ndzi nga pfumeli leswaku Xikwembu xi kona. Hi xikombiso, a ndzi nga ta pfumela eka Xikwembu lexi hisaka vanhu etiheleni. Loko vadyondzisi va mina eyunivhesiti va ndzi dyondzisa leswaku swilo leswi hanyaka swi lo tiendlekela a swi endliwanga hi Xikwembu, ndzi yi tshembile mhaka yoleyo a ndzi ehleketa leswaku ku ni vumbhoni lebyi yi tiyisekisaka. Ekerekeni a va nga yi kaneti mhaka leyi kambe a va vula leswaku Xikwembu hi xona xi endlaka leswaku swilo swi tiendlekela.

I yini lexi ku endleke u tsakela Bibele?

Nsati wa mina Susana, u sungule ku dyondza Bibele ni Timbhoni ta Yehovha naswona hi ku tirhisa Bibele ti n’wi kombe leswaku Xikwembu a xi xanisi vanhu etiheleni.¹ Ti tlhela ti n’wi komba xitshembiso xa Xikwembu xa ku endla misava leyi yi va paradeyisi.² Eku heteleleni hi kume dyondzo leyi twisisekaka. Hi 1989 ndzi endzeriwe hi Mbhoni leyi vuriwaka Nick. Loko hi ri karhi hi bula hi miri wa munhu, ndzi tsakisiwe hi marito lama twisisekaka hi ku olova lama kumekaka eBibeleni eka Vaheveru 3:4 lama nge, “yindlu yin’wana ni yin’wana yi akiwa hi munhu, kambe loyi a akeke swilo hinkwaswo i Xikwembu.”

Xana ku dyondza ka wena hi miri wa munhu swi ku pfunile u twisisa leswaku ku ni mutumbuluxi?

Ina. Hi xikombiso, ndlela leyi miri wa hina wu kotaka ku tihorisa ha yona wu kombisa leswaku wu endliwe hi vutlhari. Hi xikombiso, ku va xilondza xi hola ku va ku endleke swo tala naswona sweswo hinkwaswo swi endle leswaku ndzi kota ku yi twisisa kahle mhaka leyi tanihi hi leswi ndzi nga muendli wa vuhandzuri.

 Hi byele leswaku ku endleka yini loko miri wa hina wu vavisekile?

Loko u heta ku vaviseka, ku nga si hundza tisekoni to hlaya, ku sungula ku tirha endlelo ra ku yimisa ngati leswaku yi nga humi. Endlelo leri ri rharhangane ngopfu naswona i ra nkoka. Ndzi nga vula leswaku fambiselo ra hina ra ngati leri eka rona misiha ya ngati yi tsutsumaka tikhilomitara ta kwalomu ka 100 000, vanjhiniyara lava tirhaka hi tiphayiphi ta mati va nga navela ku ri tekelela hikuva ri kota ku pfala leswaku ku nga humi nchumu ri tlhela ri lulamisa.

Ku endleka yini loko miri wu ri karhi wu hola?

Ngati ya yima yi nga humi ivi u sungula ku twa ku vava. Sweswo swi katsa swilo swo tala leswi hlamarisaka. Xo sungula, misiha ya ngati leyi eku sunguleni yi katsekeke eku endleni leswaku ngati yi nga humi ngopfu, yi endla leswi hambaneke. Yi andzisa ku famba ka ngati endhawini leyi vavisekeke. Xin’wana hileswaku mati ya tiprotheyini ma endla leswaku ndhawu yoleyo yi pfimba. Mati wolawo i ya nkoka hikuva ma lwa ni switsongwatsongwana, chefu ma tlhela ma susa swiphemu leswi onhakeke. Endlelo rin’wana ni rin’wana leri katsekaka kwalaho, ri lava timolekhuli ta timiliyoni ni tisele. Kasi rin’wana ri pfuna loko se ku horile, xiya leswi landzelaka.

Xana ku hola koloko ku endleka njhani?

Endzhaku ka masiku ma nga ri mangani, miri wa hina wu sungula ku humesa swilo leswi horisaka naswona sweswo swi endleka kwalomu ka mavhiki mambirhi. Ku va ni tisele leti horisaka laha u vavisekeke kona naswona ta andza. Misiha leyitsongo ya ngati ya andza yi tlhela yi ya laha ku nga ni xilondza yi susa thyaka ivi yi xi horisa. Eka xiphemu xin’wana ku va ni tisele to hlawuleka leti hlanganisaka ndhawu leyi vavisekeke.

Swi tikomba ku ri ntirho wo tala hakunene! Xana swi teka nkarhi wo tanihi kwihi xi nga si hola?

Eka xiphemu xo hetelela xo endla leswaku ku pfaleka, swi nga ha teka tin’hweti. Hi nkarhi wolowo, marhambu lama tshovekeke ma tlhelela exiyin’weni xa wona naswona tisele leti vumbaka misiha ti tlhela ti va kona naswona ti va ti tiyile nakambe. Ku hola ka ndhawu leyi vavisekeke i xikombiso lexi hlamarisaka swinene.

Xana wa ha wu tsundzuka nchumu lowu ku tsakiseke swinene?

Ina. Ndzi tsundzuka loko ndzi khathalela xinhwanyatana xa malembe ya 16, lexi a xi vaviseke eka mhangu yo chavisa ya movha. Xiyimo xa xona a xi tika hikuva a xi vaviseke rivengo naswona ngati a yi wele endzeni. Emalembeni lama hundzeke a hi ta va hi xi endle vuhandzuri leswaku hi xi lulamisa kumbe hi susa rivengo. Namuntlha madokodela yo tala ma tshemba ngopfu leswaku matimba ya miri hi wona ma nga ta endla leswaku wu tlhelela exiyin’weni xa wona. Ndzi lo kota ku tshungula leswi a swi ta nyanyisaka xiyimo xa xona, ku lahlekeriwa hi mati, ku kayivela ka tisele to tshwuka ta ngati ni switlhavi. Endzhaku ka mavhiki manharhu, xinhwanyatana lexi xi kamberiwile kutani mbanga ya xona yi kumiwe yi horile. Swi ndzi hlamarise ngopfu ku vona ndlela leyi miri wu tihorisaka ha yona. Nakambe swi ndzi endle ndzi khorwiseka swinene leswaku hi vumbiwe hi Xikwembu.

I yini lexi endleke leswaku u rhandza Timbhoni ta Yehovha?

Ndzi xiye leswaku ti ni xinghana naswona minkarhi hinkwawo a ti hlamula swivutiso swa mina hi ku tirhisa Bibele. Ndzi tlhela ndzi rhandza xivindzi lexi ti xi kombisaka loko ti vulavula hi ripfumelo ra tona ni ku pfuna van’wana leswaku va dyondza hi Xikwembu.

Xana ku va Mbhoni ya Yehovha swi ku pfunile eka ntirho wa wena?

Ina. Xo sungula, swi ndzi pfunile leswaku ndzi kota ku langutana ni ntshikilelo lowu hlaselaka madokodela ni vaongori lava tshamelaka ku tirha hi vanhu lava vabyaka ngopfu kumbe lava vavisekeke swinene. Nakambe loko vavabyi va lava ku vulavula hi mhaka yo karhi, a ndzi swi kota ku va hlamusela hi ntshembo lowu humaka eka Xikwembu wa ku herisa mavabyi ni maxangu³ ivi xi endla leswaku emisaveni ku nga vi na loyi a nga ta ku, “Ndza vabya.”⁴