“Ndzi ta anakanyisisa hi mintirho ya wena hinkwayo, ndzi ta ehleketa hi ntirhisano wa wena.” —Pisalema 77:12.

LESWI VANHU VA SWI VULAKA

Vanhu va anakanyisisa hi tindlela to tala, tin’wana ta tona ti huma eka vukhongeri bya khale bya le matikweni ya le Vuxeni. Mutsari un’wana loko a vulavula hi mhaka leyi u te: “Mianakanyo a yi fanelanga yi kavanyetiwa leswaku yi ta kota ku anakanyisisa kahle.” Marito yakwe ma kombisa leswaku loko munhu a nga kavanyetiwi loko a ri karhi a anakanyisisa hi marito kumbe swifaniso swo karhi, swi ta endla leswaku a va ni ku rhula ka mianakanyo ni ku titwa a phyuphyile.

LESWI BIBELE YI SWI VULAKA

Bibele yi kandziyisa nkoka wa ku anakanyisisa. (1 Timotiya 4:15, nhlamuselo ya le hansi ya NW) Hambiswiritano, ku anakanyisisa loku yi ku khutazaka, a ku katsi ku susa swo karhi emianakanyweni kumbe ku phindha-phindha rito ro karhi kumbe xivulwa. Kambe, ku anakayisisa loku Bibele yi vulavulaka hakona ku katsa ku ehleketisisa hi tinhloko-mhaka to karhi u ri ni xikongomelo, to tanihi ta timfanelo ta Xikwembu ni ta ntumbuluko. Wanuna un’wana loyi a a tshembekile eka Xikwembu u khongerile a ku: ‘Ndzi anakanyisisa hi ntirho wa wena hinkwawo, ndzi anakanyisisa hi ntirho wa mavoko ya wena hi ku hiseka.’ (Pisalema 143:5) U tlhele a ku: ‘Ndzi ku tsundzuka ndzi ri ehenhla ka sangu ra mina, ndzi anakanyisisa ha wena exikarhi ka ku rindza ka nivusiku.’—Pisalema 63:6.

‘Mbilu ya lowo lulama ya anakanyisisa a nga si hlamula.’—Swivuriso 15:28.

LESWI BIBELE YI SWI VULAKA

Ku anakanyisisa lokunene ku antswisa vumunhu bya hina, ku endla leswaku hi va ni vuswikoti byo lawula mintlhaveko ya hina ni ku va ni mahanyelo lamanene—leswi, swi engetela eka vutivi ni ku twisisa mavulavulelo ni mahanyelo ya hina. (Swivuriso 16:23) Ku anakanyisisa loku ku tlhela ku endla leswaku hi va ni vutomi lebyi tsakisaka byi tlhela byi vuyerisa. Loko Pisalema 1:3 yi vulavula hi munhu loyi a anakanyisisaka hi Xikwembu nkarhi ni nkarhi, yi ri: ‘U ta fana ni murhi lowu byariweke etlhelo ka swinambyana swa mati, lowu humesaka mbhandzu wa wona hi nguva ya kona, lowu switluka swa wona swi nga vuniki. Kutani hinkwaswo leswi a swi endlaka swi ta humelela.’

Ku anakanyisisa swi hi pfuna ku antswisa ndlela leyi hi twisisaka swilo ha yona ni ku swi tsundzuka. Hi xikombiso, loko hi hlaya hi mhaka yo karhi mayelana ni ntumbuluko kumbe nhloko-mhaka yo karhi ya le Bibeleni, hi dyondza timhaka to tala leti tsakisaka. Kambe loko hi anakanyisisa hi timhaka toleto, hi vona ndlela leyi ti hlanganaka ha yona nileswi hi swi dyondzeke enkarhini lowu hundzeke. Ku fana ni muvatli loyi a hundzulaka swilo swo karhi a endla nchumu wo saseka, ku anakanyisisa ku hi pfuna leswaku hi hlanganisa timhaka ti va leti twisisekaka.

“Mbilu yi kanganyisa ngopfu ku tlula hinkwaswo naswona yi ni khombo. I mani la nga yi tivaka?”—Yeremiya 17:9.

LESWI BIBELE YI SWI VULAKA

“Endzeni, etimbilwini ta vanhu, hi kona laha ku humaka ku anakanya ko biha, vumbhisa, vukhamba, ku dlaya hi vomu, vuoswi, ku navela, swiendlo swa vuhomboloki, vuxisi, ku tikhoma ko biha, tihlo ro xondzolota, . . . ku pfumala ku anakanyela.” (Marka 7:21, 22) Ina, ku fana ni ndzilo, ku anakanyisisa ku fanele ku kongomisiwa! Loko swi nga ri tano, mianakanyo yo biha yi nga pfuxa ku navela ko biha loku nga endlaka munhu a tsandzeka ku tilawula ivi a sungula swiendlo swo biha.—Yakobo 1:14, 15.

Hikwalaho, Bibele yi hi khutaza ku anakanyisisa hi ‘swilo leswi nga ntiyiso, leswo tenga, leswi rhandzekaka ni leswi dzunekaka.’ (Vafilipiya 4:8, 9) Loko hi dyondza hi swilo swo tano hi tlhela hi anakanyisisa hi swona, hi ta va ni timfanelo letinene, mavulavulelo lamanene ni ku va ni vuxaka lebyinene ni van’wana.—Vakolosa 4:6.