Xana Ku Rhandza Ka Xikwembu Ku Karhi Ka Endleka?

“Ku rhandza ka wena a ku endleke emisaveni, hilaha ku endlekaka hakona etilweni.”—Matewu 6:10.

JULIO na Christina a va vaviseke ngopfu loko va vona vana va vona va mune va tshwa va hela hi ndzilo va ri karhi va va langutile. Movha wa vona lowu a wu yimile wu himiwe hi movha wun’wana lowu a wu chayeriwa hi munhu loyi a pyopyiwile kutani wu khoma ndzilo wu vuvumela. N’wana wa vona wa vuntlhanu, Marcos, u humesiwile endzilweni, kambe ndzilo se a wu vavule miri wa yena wu n’wi siya a lamale mavoko ni milenge. A a ri ni malembe ya kaye. Tata wakwe a a karhatekile swinene. U tichavelele hi marito lawa swin’we ni ndyangu wa yena: “Hi fanele hi swi twisisa leswaku leswi i ku rhandza ka Xikwembu, hambi i swinene, i swo biha kumbe i swa njhani.”

Loko ku humelela khombo ro fana ni leri, vanhu vo tala va angula hi ndlela leyi fanaka. Va vula leswaku ‘loko Xikwembu xi ri ni matimba lamakulu naswona xi khathala ha hina, kutani khombo leri ri hi weleke ri fanele ri ri ra ku pfuna hina hi ndlela yo karhi hambileswi swi tikaka ku swi amukela.’ Xana u pfumelelana na wona marito lawa?

Miehleketo ya leswaku xin’wana ni xin’wana lexi humelelaka, lexinene kumbe xo biha, i ku rhandza ka Xikwembu hakanyingi yi sekeriwa eka marito ya Yesu lama kumekaka eka leswi swi vuriwaka Xikhongelo xa Hosi, lexi boxiweke laha henhla. Ku rhandza ka Xikwembu ka endliwa etilweni, a hi swona ke? Loko hi khongela hi ku “ku rhandza ka wena a ku endleke emisaveni,” xana hi va hi nga vuli swona leswaku leswi swi endlekaka emisaveni i ku rhandza ka Xikwembu?

Vo tala a va swi twisisi leswi. Eka vona langutelo leri ri endla Xikwembu xi va munhu la nga riki na mhaka ni swivumbiwa swa xona leswi nga vanhu. Va vutisa va ku: ‘Ha yini Xikwembu lexi nga ni rirhandzu xi navela leswaku vanhu lava nga riki na nandzu va humeleriwa hi swilo swo biha? Loko ku ri ni dyondzo yo karhi leyi xi lavaka leswaku hi yi dyondza, hi yihi dyondzo ya kona?’ Kumbexana leyi i ndlela leyi u titwaka ha yona.

Malunghana ni mhaka leyi, mudyondzisiwa Yakobo, loyi a nga makwavo wa Yesu hi manana u tsarile a ku: “Loko a ri endzingweni, munhu a nga vuli a ku: ‘Ndzi ringiwa hi Xikwembu.’ Hikuva Xikwembu xi nga ka xi nga ringiwi hi swilo swo biha naswona xona a xi ringi munhu.” (Yakobo 1:13) Xikwembu a hi xona xi vangaka swilo swo biha. Kutani ke, swi le rivaleni leswaku a hi swilo hinkwaswo leswi humelelaka laha misaveni namuntlha, leswi nga ku rhandza ka Xikwembu. Matsalwa ma tlhela ma vula leswaku ku ni ku rhandza ka munhu, ku rhandza ka matiko hambi ku ri ku rhandza ka Diyavulosi. (Yohane 1:13; 2 Timotiya 2:26; 1 Petro 4:3) Xana wa pfumela leswaku leswi swi weleke ndyangu wa Julio na Christina a ku nga ri ku rhandza ka Tata wa le tilweni la nga ni rirhandzu?

Kutani ke, xana Yesu a a vula yini loko a dyondzisa vadyondzisiwa va yena ku khongela va ku: “Ku rhandza ka wena a ku endleke”? Xana lexi a xi ri xikombelo xa leswaku Xikwembu xi nghenelela etimhakeni to karhi, kumbe xana Yesu a a hi dyondzisa ku khongelela nchumu wo karhi lowukulu ni wo antswa, ku nga ku cinca loku hinkwerhu hi nga ku langutelaka? A hi kambisiseni leswi Bibele yi swi vulaka.

[Laha Swifaniso Swi Humaka Kona eka tluka 3]

Car: Dominique Faget-STF/AFP/Getty Images; child: FAO photo/B. Imevbore