Xiviko Xa Vahuweleri Va Mfumo

‘Pelelani Haleno Mi Ta Hi Pfuna’

HI JULY 2000, eAustria, Jarimani ni le Switzerland ku rhambiwe Timbhoni leti vulavulaka Xijarimani leswaku ti rhurhela eBolivia. Hikwalaho ka yini? Hikuva emapurasini lama rhendzeleke doroba ra Santa Cruz le Bolivia, lama tlhengukeke hi mpfhuka lowu fikaka eka tikhilomitara ta 300 ku suka edorobeni rero, Ma-mennonite lama vulavulaka Xijarimani a ma ri ni torha ra ku dyondza Bibele.

Timbhoni ta kwalomu ka 140 ti amukele xirhambo lexi. Van’wana va tshame mavhiki yo hlayanyana, kasi van’wana va tshame lembe kumbe ku tlula. Hi ku endla tano, va kombise moya wo fana ni wa varhumiwa va lembe-dzana ro sungula lava amukeleke xirhambo lexi nge: ‘Pelelani eMakedoniya mi ta hi pfuna.’—Mintirho 16:9, 10.

Xana swi njhani ku tirha ensin’wini yoleyo? Nkulu wa le vandlheni ra kwalaho u ri: “Ku ya eka yin’wana ya tindhawu ta Ma-mennonite ta 43 swi nga teka tiawara to ringana nhungu hi patu leri nga riki na xikontiri loko u famba hi movha lowu kokaka hi mavhilwa ya mune. Ku endzela tindhawu ta le kulenyana hakanyingi swi teka masiku ya mune, naswona swi lava leswaku vusiku byin’wana u etlela ematendeni. Kambe sweswo a hi ku fukamela mandza yo bola hikuva vanhu lava hinkwavo a va si tshama va twa mahungu lamanene.”

Eku sunguleni, Ma-mennonite yo tala a ma nga swi tsakeli ku endzeriwa. Kambe matshalatshala lama endliweke hi ku phindha-phindha ma va pfune ku tlangela leswi Timbhoni a ti va tisela swona. Hi xikombiso, n’wamapurasi un’wana u vule leswaku se u na lembe a hlaya magazini wa Xalamuka! Loko a ya emahlweni u te: “Ndza swi tiva leswaku vanhu vo tala laha a va pfumelelani na n’wina, kambe mina ndza swi vona leswaku leswi mi swi vulaka i ntiyiso.” Endhawini yin’wana, wanuna un’wana u te: “Van’wana va vaakelani va mina va vula leswaku mi vaprofeta va mavunwa, van’wana va vula leswaku mi ni ntiyiso. Mina ndzi lava ku swi kumisisa hi ndzexe.”

Sweswi eBolivia ku ni vandlha ra Xijarimani leri nga ni vahuweleri va 35, ku katsa ni vavuri va evhangeli va nkarhi hinkwawo vo ringana 14. Ku ta fikela sweswi, 14 wa lava a va ri Ma-mennonite se i vahuweleri va Mfumo naswona van’wana va 9 va va kona eminhlanganweni nkarhi na nkarhi. Wanuna un’wana la dyuhaleke la ha ku khuvuriwaka u te: “Se hi wu vona kahle nkongomiso wa Yehovha. U rhumele vamakwerhu lava kotaka ku vulavula Xijarimani lava nga ni ntokoto leswaku va ta hi pfuna. Ha swi tlangela swinene.” N’wana wa nhwanyana wa wanuna loyi, la nga ni malembe ya 17 hi vukhale, loyi na yena a khuvuriweke, u te: “Ku hiseka ka vamakwerhu lavantshwa lava teke laha ka khutaza. Vo tala va vona i maphayona, lama tirhisaka nkarhi ni mali ya wona leswaku ma pfuna van’wana. Ndzi titwa ndzi lava ku endla leswi fanaka.”

Entiyisweni, lava va endlaka matshalatshala yo “pelela” kun’wana va ya pfuna, va kuma ntsako lowukulu ni ku eneriseka.