“Ku Twarisa Vito Ra Yehovha”

EMISAVENI hinkwayo, magazini wa Xihondzo xo Rindza swin’we ni nakulobye wa wona ku nga Xalamuka!, ti tlangeriwa swinene hikwalaho ka rungula ra tona ra timhaka ta moya swin’we ni ndlela leyi ti dyondzisaka ha yona. Malunghana ni mhaka leyi, muhlayi wa le Furwa wa ha ku tsala papila leri landzelaka:

“Ndzi wansati loyi a humaka eAfrika, naswona a ndzi dyondzanga ku ya kwihi. A hi khale ndzi sungule ku hlaya timagazini ta n’wina. Leswi ndzi kokiweke hi timhaka leti ti vulavulaka ha tona, ndza swi xiya leswaku i swa nkoka ku ti hlaya. Hi ku pfuniwa hi timagazini leti, ndzi antswise mavulavulelo ya mina naswona ndzi kota ku tsala papila leri kumekaka ri ri na swihoxo switsongo.

“Ndzi hlamarisiwa hi leswi mi humesaka swihloko swo tala leswi vulavulaka hi vanhu, pulanete ni Muvumbi. Swihloko leswi swi twisiseka hi ku olova lerova swi endla munhu a hisekela ku hlaya. A ku na munhu un’wana la nga kotaka ku dyondzisa vanhu va swiyimo hinkwaswo hi nkarhi wun’we.

“Ndzi tlhela ndzi hlamarisiwa hi ku vona leswaku leswi hinkwaswo a swi endleriwi ku bindzula, kambe swi endleriwa ku twarisa vito ra Yehovha. Ndza swi tiva leswaku ma amukeleka eka yena, naswona ndza mi nkhensa. Ndzi kombela leswaku mi ya emahlweni mi kuma matimba eka Muvumbi leswaku mi hambeta mi dyondzisa vanhu.”

Sweswi Timbhoni ta Yehovha ti endla ntirho wa tona wo dyondzisa Bibele ematikweni ya 235. Xihondzo xo Rindza xi kandziyisiwa hi tindzimi ta 148 kasi Xalamuka! yi kandziyisiwa hi tindzimi ta 87. Timagazini leti a ti kandziyiseriwi ku dzunisa munhu wo karhi wa laha misaveni. Ndzayo leyi sekeriweke eBibeleni ni rungula leri nga enkarhini leri kumekaka eka tona ri endleriwe ku dzunisa Muvumbi, loyi a nge: “Mina Yehovha, ndzi . . . Loyi a ku dyondziselaka ku ku pfuna.” (Esaya 48:17) Onge u nga vuyeriwa hi ku hlaya Matsalwa yo Kwetsima nkarhi na nkarhi hi ku tirhisa timagazini leti ti pfunaka ku twisisa Bibele.