Xana Hi Ta Kala Hi Wu Kuma Nsirhelelo Wa Xiviri?

A NGA kona la nga tsakisiwiki hi ku vona vana lava tsakeke loko va ri karhi va tlanga ni vatswari va vona lava va va rhandzaka. Vana va titwa va sirhelelekile hi ku helela loko va ri ni vatswari lava va khathalelaka. Kambe eka vana vo tala sweswo i norho. Siku ni siku va tivutisa leswaku va ta yi kuma kwihi ndhawu yo etlela eka yona. Xana vana vo tano lava nga riki na makaya kun’we ni van’wana lava nga sirhelelekangiki va nga wu kuma ntshembo?

Rito ra Xikwembu ri nyika ntshembo hambiloko vumundzuku byi vonaka byi nga tshembisi. Muprofeta Esaya u profete leswaku nkarhi wu ta fika lowu ha wona vanhu hinkwavo va nga ta hanya va sirheleleke hi ku helela. U tsale a ku: “Kunene va ta aka tindlu va tshama eka tona; kunene va ta rima masimu ya vhinya va dya mihandzu ya wona. A va nge aki kutani ku tshama un’wana; a va nge rimi kutani ku dya un’wana.”—Esaya 65:21, 22.

Kambe, xana ntshembo lowu wu ni xisekelo lexi tiyeke? Phela, rito leri nge “ntshembo” a hi nkarhi hinkwawo ri kombisaka ku tiyiseka. Hi xikombiso, le Brazil hakanyingi munhu u twa marito lama nge: “A esperança é a última que morre.” Hi ku kongoma swi vula leswaku, “Ntshembo i nchumu wo hetelela ku fa.” Leswi swi vula leswaku vanhu vo tala va tshama va ri ni ntshembo hambiloko va nga ri na nchumu lowu va nyikaka ntshembo. Hambiswiritano, ntshembo lowu Xikwembu lexi hanyaka xi hi nyikaka wona wu hambanile. Muapostola Pawulo u tsarile: “A nga kona loyi a pfumelaka eka [Xikwembu], loyi a nga ta khomisiwa tingana.” (Varhoma 10:11) Vuprofeta bya Bibele lebyi ana se byi hetisekeke byi hi nyika ntshembo wa leswaku switshembiso leswin’wana hinkwaswo leswi tshembisiweke hi Yehovha Xikwembu na swona swi ta hetiseka. Loko switshembiso swoleswo swi hetisekile, swiyimo leswi sindzisaka vana ku tshama eswitarateni swi ta va swi hundzile.

Ni namuntlha, ndzayo ya matimba leyi hi yi kumaka eBibeleni yi nga pfuna vanhu lava nga riki na ntshembo leswaku va antswisa vutomi bya vona kutani va kuma nsirhelelo wa xiviri. Xana sweswo swi nga endleka hi ndlela yihi? Timbhoni ta Yehovha ta le ndhawini ya ka n’wina ti nga tsakela ku ku pfuna leswaku u kuma nhlamulo ya xivutiso xexo.