Swivutiso Swa Vahlayi

Xana madimona ma ta va ma ri kwihi hi nkarhi wa Mfumo wa Kreste wa Gidi ra Malembe?

Bibele a yi xi hlamuli hi ku kongoma xivutiso lexi. Hambiswiritano, hi nga fikelela makumu lama twalaka malunghana ni laha madimona ma nga ta va ma ri kona hi nkarhi wa Mfumo wa Kreste wa Gidi ra Malembe.

Loko a hlamusela xivono xa leswi nga ta humelela eku sunguleni ni le ku heleni ka Mfumo wolowo wa Gidi ra Malembe, muapostola Yohane u ri: “Ndzi vona ntsumi yi xika hi le tilweni yi ri ni xilotlelo xa khele ro enta ni nketana leyikulu evokweni ra yona. Kavaloko yi khoma dragona, nyoka ya khale, ku nga Diyavulosi na Sathana, yi n’wi boha ku ringana malembe ya 1000. Kutani yi n’wi lahlela ekheleni ro enta, yi ri pfala yi ri tiyisa, leswaku a nga ha tshuki a hambukisa matiko kukondza ku hela malembe ya 1000. Endzhaku ka swilo leswi, u fanele ku ntshunxiwa nkarhinyana.” (Nhlavutelo 20:1-3) Tindzimana leti ti vulavula ntsena hi ku pfaleriwa ka Sathana ekheleni ro enta na hi ta ku ntshunxiwa ka yena nkarhinyana eku heteleleni. Hambileswi madimona ma nga boxiwiki, swa twala ku anakanya leswaku loko ntsumi leyi nga ni xilotlelo xa khele ro enta—ku nga Yesu Kreste la kwetsimisiweke—yi khoma Diyavulosi yi n’wi pfalela ekheleni ro enta, yi ta pfalela ni madimona.—Nhlavutelo 9:11.

Loko a va Hosi etilweni hi 1914, Yesu Kreste u teke goza leri tiseke ku cinca lokukulu eka xiyimo xa Sathana ni xa madimona. Nhlavutelo 12:7-9 yi ri: “Ku tlhekeka nyimpi etilweni: Mikayele ni tintsumi ta yena va lwa ni dragona, dragona yona yi lwa yi ri ni tintsumi ta yona [madimona] kambe a yi hlulanga, naswona ndhawu ya vona a ya ha kumekanga etilweni. Hiloko dragona leyikulu yi lahleriwa ehansi, nyoka ya khale, leyi vuriwaka Diyavulosi na Sathana, leyi xisaka misava hinkwayo leyi akiweke; yi lahleriwa ehansi emisaveni, ni tintsumi ta yona ti lahleriwa ehansi na yona.” Ku sukela hi nkarhi wolowo, Sathana ni madimona yakwe va lahleriwe emisaveni. Swi le rivaleni leswaku loko Yesu Kreste a ya emahlweni a sivela Sathana ku endla mintirho ya yena, leswaku vanhu emisaveni va ntshunxeka eka nkucetelo wakwe wo homboloka, U ta endla leswi fanaka ni le ka madimona.

Nakambe xiya vuprofeta byo sungula-sungula bya le Bibeleni. Byi hlayeka hi ndlela leyi: “Ndzi [Xikwembu] ta veka vulala exikarhi ka wena [Sathana] ni wansati [nhlengeletano ya Yehovha ya le tilweni] ni le xikarhi ka mbewu ya wena [Sathana] ni mbewu ya yena [Yesu Kreste]. Yi ta ku pfotlosa nhloko kutani wena u ta yi luma xirhendze.” (Genesa 3:15) Ku pfotlosiwa ka nhloko ya nyoka ku katsa ku pfaleriwa ka Sathana ekheleni ro enta hi nkarhi wa Mfumo wa Kreste wa Gidi ra Malembe. Vuprofeta lebyi byi ya emahlweni byi vula leswaku ku ni vulala exikarhi ka Loyi a pfotlosaka ni mbewu ya Sathana. Mbewu leyi, kumbe nhlengeletano, yi katsa xiphemu lexi nga vonakiki lexi vumbiwaka hi tintsumi to homboloka, kumbe madimona. Hikwalaho swa twala ku gimeta hileswaku loko Yesu a pfalela Sathana ekheleni ro enta, u ta boha ni madimona a ma pfalela. Mhaka ya leswaku mimoya leyo homboloka yi kombise leswaku yi swi chava swinene ku pfaleriwa ekheleni ro enta yi kombisa leswaku ya ti tiva ta ku siveriwa ka yona loku tshineleke.—Luka 8:31.

 Kambe, xana leswi Nhlavutelo 20:1-3 yi nga vulavuliki hi madimona swi nga va swi kombisa leswaku ma ta va ma lovisiwile eArmagedoni swin’we ni xiphemu lexi vonakaka xa mbewu ya Sathana? Bibele a yi kombisi tano. Malunghana ni laha Sathana a nga ta helela kona, yi ri: “Diyavulosi loyi a a va hambukisa a lahleriwa etiveni ra ndzilo ni xivavula, leri xivandzana ni muprofeta wa mavunwa havambirhi a va ri eka rona; kutani va ta xanisiwa vusiku ni nhlikanhi hi masiku ni masiku.” (Nhlavutelo 20:10) Xivandzana ni muprofeta wa mavunwa i minhlangano ya tipolitiki naswona i xiphemu xa nhlengeletano ya Sathana leyi vonakaka. (Nhlavutelo 13:1, 2, 11-14; 16:13, 14) Minhlangano yoleyo yi ta lovisiwa eArmagedoni, loko Mfumo wa Xikwembu wu pfotlosa ni ku herisa mimfumo hinkwayo ya misava. (Daniyele 2:44) Bibele yi vulavula hi “[ndzilo] lowu nga heriki lowu lunghiseleriweke Diyavulosi ni tintsumi takwe.” (Matewu 25:41) Sathana ni madimona yakwe va ta lahleriwa “etiveni ra ndzilo ni xivavula” leri xivandzana ni muprofeta wa mavunwa va nga ta va va loviseriwe eka rona. Loko xiphemu xa moya xa matimba swinene lexi nga vonakiki xa mbewu ya Sathana a xi lovisiwe eArmagedoni, ingi swi vekiwe erivaleni leswaku madimona se ma le tiveni rolero ro fanekisela swin’we ni xivandzana ni muprofeta wa mavunwa. Leswi madimona ma nga boxiwiki eka Nhlavutelo 20:10 swi kombisa leswaku a ma nge lovisiwi eArmagedoni.

Tanihi leswi ku nga vuriwiki hi ku kongoma leswaku madimona ma lahleriwa ekheleni ro enta, a ku vuriwi hi ku kongoma leswaku ma ta ntshunxiwa ekheleni ro enta. Hambiswiritano, ma ta helela endhawini yin’we na Diyavulosi. Endzhaku ko ntshunxiwa na Diyavulosi ivi ma tirhisana na yena eku ringiweni ka vanhu ko hetelela eku heleni ka malembe ya gidi, madimona na wona ma ta lahleriwa etiveni ra ndzilo, ma loviseriwa makumu.—Nhlavutelo 20:7-9.

Hikwalaho, hambileswi Nhlavutelo 20:1-3 yi vulavulaka ntsena hi ku khomiwa ka Sathana ni ku lahleriwa ka yena ekheleni ro enta laha a nga ta va a nga endli nchumu, swa twala loko hi gimeta hileswaku ni tintsumi takwe ti ta bohiwa ti pfaleriwa na yena ekheleni ro enta. Sathana ni valandzeri vakwe va madimona a va nge pfumeleriwi ku kavanyeta ku hetiseka ka xikongomelo xa Xikwembu xo hundzula misava yi va paradeyisi ni ku endla leswaku vanhu va va lava hetisekeke hi nkarhi wa Mfumo wa Kreste wa Gidi ra Malembe.