Vuhundzuluxeri “Lebyinene Ngopfu”

HI KU ya hi ndzinganyeto wun’wana, ku sukela hi 1952 ku ya eka 1990, ku humesiwe minkandziyiso leyintshwa yo fika eka 55 ya vuhundzuluxeri bya Xinghezi bya Matsalwa ya Vukreste ya Xigriki. Ndlela leyi vahundzuluxeri va hundzuluxelaka ha yona yi swi veka erivaleni leswaku a swi nge koteki leswaku minkandziyiso yimbirhi ya vuhundzuluxeri yi hlayeka hi ndlela leyi fanaka. Jason BeDuhn loyi a nga un’wana wa vaprofesa va nkambisiso wa swa vukhongeri le Yunivhesiti ya Arizona N’walungu, eFlagstaff, eArizona le U.S.A., u teke vuhundzuluxeri bya nhungu lebyi dumeke, ku katsa ni Vuhundzuluxeri Bya Misava Leyintshwa Bya Matsalwa Yo Kwetsima (bya Xinghezi), lebyi kandziyisiwaka hi Timbhoni ta Yehovha, a byi kambisisa leswaku a vona ndlela leyi byi hlayekaka ni ku pakanisa ha yona. Xana vuyelo byi ve byihi?

Hambileswi a soleke mahundzuluxelelo man’wana lama tirhisiweke, BeDuhn u vule leswaku Vuhundzuluxeri Bya Misava Leyintshwa i vuhundzuluxeri “lebyinene ngopfu,” “byi veka mhaka kahle” naswona “bya antswa swinene” ku tlula byin’wana lebyi kambisisiweke. Loko a gimeta, BeDuhn u vule leswaku hi ku angarhela Vuhundzuluxeri Bya Misava Leyintshwa “byi hlayiwa exikarhi ka vuhundzuluxeri bya Xinghezi lebyi pakanisaka swinene eka vuhundzuluxeri bya Testamente Leyintshwa lebyi nga kona namuntlha” naswona “loko byi ringanisiwa ni lebyin’wana lebyi tirhisiweke eka nkambisiso lowu, hi byona byi humaka emahlweni hi ku pakanisa.”—Truth in Translation: Accuracy and Bias in English Translations of the New Testament.

BeDuhn u tlhele a vula leswaku vahundzuluxeri vo tala va lave ku tsakisa vanhu hi ku “veka mhaka hi ndlela ya vona kumbe va hlamusela marito ya Bibele hi ku ya hi leswi vahlayi va manguva lawa va lavaka leswaku yi vula swona.” Hi hala tlhelo, Vuhundzuluxeri Bya Misava Leyintshwa a byi tano, hikuva, hi ku vula ka BeDuhn, “NW yi hundzuluxela marito yo sungula ya vatsari va Testamente Leyintshwa hi ndlela leyi pakanisaka swinene, hi ku kongoma ni hi vukheta.”

Hilaha Komiti ya Vuhundzuluxeri bya Bibele bya Misava Leyintshwa yi kombisaka hakona eka rito ro rhanga ra vuhundzuluxeri bya yona, ku hundzuluxela Matsalwa yo Kwetsima ku suka eka tindzimi to sungula ma yisiwa eka tindzimi tin’wana leti vanhu va ti vulavulaka i “mhaka leyi lavaka vutihlamuleri.” Komiti leyi yi ya emahlweni yi ku: “Vahundzuluxeri va buku leyi, lava va chavaka ni ku rhandza Mutsari la nga ni Vukwembu wa Matsalwa yo Kwetsima, eka Yena va titwa va ri ni vutihlamuleri byo hlawuleka byo andlala mianakanyo yakwe ni marito yakwe hi ku pakanisa hilaha swi kotekaka hakona.”

Vuhundzuluxeri Bya Misava Leyintshwa Bya Matsalwa Yo Kwetsima lebyi sunguleke ku kandziyisiwa hi 1961, se byi kumeka hi tindzimi ta 32 kun’we ni hi minkandziyiso yimbirhi ya Braille. Matsalwa ya Vukreste ya Xigriki ya Vuhundzuluxeri Bya Misava Leyintshwa kumbe “Testamente Leyintshwa” ma kumeka hi tindzimi tin’wana ta 18 kun’we ni hi nkandziyiso wun’we wa Braille. Ha ku khutaza leswaku u hlaya Rito ra Xikwembu hi ku tirhisa vuhundzuluxeri bya manguva lawa “lebyinene ngopfu” loko byi ri kona hi ririmi ra wena.