Bibele Yi Nga Ku Pfuna Leswaku U Kuma Ntsako

HAMBILESWI yi nga riki buku ya swa vutshunguri, Bibele yi hlamusela ndlela leyi mintlhaveko—leyinene kumbe yo biha—yi nga khumbaka rihanyo ra munhu ha yona emianakanyweni ni le mirini. Bibele yi ri: “Mbilu leyi tsakeke i muhanyisi lonene, kambe moya lowu tshovekeke wu omisa marhambu.” Nakambe yi ri: “Xana u tikombise u hele matimba hi siku ra maxangu? Matimba ya wena ma ta va matsongo.” (Swivuriso 17:22; 24:10) Gome ri nga endla leswaku hi titwa hi hele matimba naswona hi nga sirhelelekanga, lerova hi nga endli matshalatshala ya ku cinca kumbe ku lava mpfuno.

Nakambe gome ri nga khumba vumoya bya munhu. Vanhu lava titwaka va nga pfuni nchumu hakanyingi va vona onge swi nge koteki leswaku va va ni vuxaka lebyinene na Xikwembu naswona a xi nge va amukeli. Simone, loyi ku vulavuriweke ha yena eka xihloko lexi hundzeke, a a anakanya leswaku “a nge pfuki a ve munhu loyi Xikwembu xi nga n’wi amukelaka.” Hambiswiritano, loko hi kambisisa Rito ra Xikwembu, Bibele, hi kuma leswaku Xikwembu xa tsaka hi vanhu lava ringetaka ku xi tsakisa.

Xikwembu Xa Khathala Hakunene

Bibele yi hi byela leswaku “Yehovha u le kusuhi ni lava va tshovekeke mbilu; ni lava va pfotlokeke emoyeni wa va ponisa.” Xikwembu a xi yi languteli ehansi “mbilu leyi tshovekeke yi tlhela yi pfotloseka,” kambe xi tshembisa ku “hanyanyisa moya wa lava va titsongahataka ni ku hanyanyisa mbilu ya lava va pfotlosiwaka.”—Pisalema 34:18; 51:17; Esaya 57:15.

Siku rin’wana Yesu N’wana wa Xikwembu u vone swi fanerile ku tsundzuxa vadyondzisiwa vakwe mhaka ya leswaku Xikwembu xi vona leswinene eka malandza ya xona. Ku kombisa  mhaka leyi, u hlamusele leswaku Xikwembu xa swi vona loko xindzingiri xi wela ehansi—ku nga nchumu lowu vanhu vo tala wu nga va toviki helo. U tlhele a kandziyisa leswaku Xikwembu xi tiva vuxokoxoko hinkwabyo bya miri wa munhu, hambi ku ri nhlayo ya misisi ya le nhlokweni yakwe. Yesu u gimete xifaniso xakwe hi marito lama nge: “Hikokwalaho mi nga chavi: Mi ni risima ku tlula swindzingiri swo tala.” (Matewu 10:29-31) * Yesu u kombise leswaku ku nga khathariseki ndlela leyi vanhu va nga titwaka ha yona, loko va ri ni ripfumelo i va nkoka emahlweni ka Xikwembu. Kahle-kahle, muapostola Petro u hi tsundzuxa leswaku “Xikwembu a xi yi hi nghohe, kambe eka tiko rin’wana ni rin’wana munhu loyi a xi chavaka a tlhela a endla ku lulama wa amukeleka eka xona.”—Mintirho 10:34, 35.

Hlakulela Langutelo Leri Faneleke

Rito ra Xikwembu ri hi khutaza ku hlakulela langutelo leri faneleke hi ndlela leyi hi tilangutaka ha yona. Muapostola Pawulo u huhuteriwe ku tsala a ku: “Hi musa lowu nga faneriwiki lowu ndzi nyikiweke wona ndzi byela un’wana ni un’wana kwalaho exikarhi ka n’wina leswaku a nga tiehleketeleli ku tlula mpimo lowu a faneleke ku tiehleketelela ha wona; kambe a a ehlekete hi xikongomelo xo va ni mianakanyo leyi hlutekeke, un’wana ni un’wana hilaha Xikwembu xi n’wi aveleke ripfumelo hakona.”—Varhoma 12:3.

Kunene, a hi lavi ku anakanya ngopfu hi hina vini ku fikela laha hi vaka ni manyunyu; naswona a hi lavi ku titekela ehansi ngopfu lerova hi tibyela leswaku a ho va nchumu. Ku ri na sweswo, hi fanele hi lwela ku tilanguta hi ndlela leyi faneleke, hi ri karhi hi tsundzuka leswaku ku ni leswi hi swi kotaka ni leswi swi hi tsandzaka. Wansati un’wana wa Mukreste u swi veka hi ndlela leyi: “A ndzi munhu wo homboloka; naswona a ndzi munhu wo hlawuleka ngopfu eka Xikwembu ku tlula van’wana. Ndzi endla swilo leswinene ni leswi nga riki swinene, hilaha swi nga hakona hi vanhu hinkwavo.”

Kunene, ku va ni langutelo rero leri faneleke a hi mhaka ya matlangwana. Swi nga lava matshalatshala lamakulu ku simula ndlela leyi hoxeke leyi hi tilangutaka ha yona leyi nga ha vaka ni malembe yo tala yi dzime timitsu. Hambiswiritano, Xikwembu xi nga hi pfuna ku cinca vumunhu ni langutelo ra hina hi vutomi. Kahle-kahle, sweswo hi leswi Rito ra Xikwembu ri hi khutazaka ku swi endla. Ha hlaya: “Mi cukumeta vumunhu bya khale lebyi fambisanaka ni ndlela ya n’wina yo sungula ya ku tikhoma ni lebyi onhiwaka hi ku ya hi ku navela ka byona loku xisaka; kambe . . . mi endliwa mi va lavantshwa ematimbeni lama susumetaka mianakanyo ya n’wina, kutani mi fanele mi ambala vumunhu lebyintshwa lebyi tumbuluxiweke hi ku ya hi ku rhandza ka Xikwembu hi ku lulama ka ntiyiso ni vutshembeki.”—Vaefesa 4:22-24.

Loko hi tikarhatela ku hundzula ‘matimba lama susumetaka mianakanyo ya hina,’ ku nga mboyamelo lowu lawulaka mianakanyo ya hina, hi nga swi kota ku tshika mukhuva wa ku tilangutela ehansi ngopfu, ivi hi tilanguta hi ndlela leyinene. Lena, loyi a boxiweke eka xihloko lexi hundzeke, u xiye leswaku a swi nga ta koteka ku cinca ndlela leyi a tilangutaka ha yona, ku fikela loko a simula mianakanyo ya leswaku a ku na munhu loyi a nga n’wi rhandzaka kumbe ku  n’wi pfuna. Hi yihi ndzayo leyi pfunaka leyi kumekaka eBibeleni, leyi pfuneke Lena, Simone ni van’wana leswaku va hundzula mianakanyo ya vona?

Misinya Ya Milawu Ya Bibele Leyi Kondletelaka Ntsako

“Lahlela ndzhwalo wa wena eka Yehovha, u ta ku seketela.” (Pisalema 55:22) Ngopfu-ngopfu xikhongelo xi nga hi pfuna ku kuma ntsako wa ntiyiso. Simone u ri: “Nkarhi wihi ni wihi loko ndzi titwa ndzi hele matimba, ndzi ya eka Yehovha ndzi kombela mpfuno wakwe. Eka swiyimo hinkwaswo ndzi kume leswaku wa ndzi tiyisa naswona wa ndzi kongomisa.” Loko mupisalema a hi khutaza leswaku hi lahlela ndzhwalo wa hina eka Yehovha, kahle-kahle u hi tsundzuxa leswaku Yehovha wa khathala hi hina naswona u teka un’wana ni un’wana wa hina a lulameriwa hi mpfuno ni nseketelo wakwe. Hi madyambu ya Paseka ya 33 C.E., vadyondzisiwa va Yesu a va ri ni gome hileswi Yesu a swi vuleke malunghana ni nkarhi lowu tshineleke wa leswaku a va siya. Yesu u va khutazile leswaku va khongela eka Tatana, kutani a ya emahlweni a ku: “Kombelani mi ta swi kuma, leswaku ntsako wa n’wina wu tatiwa.”—Yohane 16:23, 24.

“Ku nyika swi tisa ntsako lowukulu ku tlula ku amukela.” (Mintirho 20:35) Hilaha Yesu a dyondziseke hakona, ku nyika swi pfula ndlela yo kuma ntsako wa ntiyiso evuton’wini. Ku tirhisa ntiyiso lowu wa Bibele swi hi pfuna ku dzikisa mianakanyo ya hina eka swilaveko swa van’wana ematshan’weni ya ku titshandza hi leswi hi nga riki na swona. Loko hi pfuna van’wana kutani hi vona ndlela leyi va tlangelaka ha yona, hi titwa hi endle swo karhi. Lena wa tiyiseka leswaku ku vulavula nkarhi na nkarhi ni vaakelani vakwe hi mahungu lamanene lama humaka eBibeleni swi n’wi pfuna hi tindlela timbirhi. U ri: “Yo sungula, swi ndzi nyika ntsako ni ku eneriseka loku Yesu a vulavuleke ha kona. Ya vumbirhi, vunyingi bya vaakelani va mina byi angula kahle swinene, kutani sweswo swi ndzi pfuna ku kuma ntsako.” Loko hi tinyikela hi mbilu hinkwayo, hi ta vona ku hetiseka ka marito ya Swivuriso 11:25 lama nge: “Loyi a cheletaka van’wana mahala na yena u ta cheletiwa mahala.”

“Hinkwawo masiku ya la xanisekaka ma bihile; kambe loyi a nga ni mbilu leyinene u tshama a ri ni nkhuvo.” (Swivuriso 15:15) Swi le ka un’wana ni un’wana wa hina leswaku u ni langutelo rihi hi yena n’wini ni hi swiyimo swa yena. Hi nga fana ni loyi a vonaka hinkwaswo swi bihile kutani hi tivona hi ri lava xanisekaka, kumbe hi nga hlawula ku va ni vonelo lerinene, hi titwa hi ri ni “mbilu leyinene,” kutani hi khana onge hiloko hi ri enkhubyeni. Simone u ri: “Ndzi ringeta ku tshama ndzi ri ni langutelo lerinene. Ndzi tshama ndzi khomekile hi dyondzo ya mina n’wini ni hi ntirho wa nsimu, naswona ndza phikelela exikhongelweni. Nakambe ndzi ringeta ku dzumba ni vanhu lava nga ni vonelo lerinene, naswona ndzi ringeta ku pfuna lava lavaka mpfuno.” Langutelo rero ri tisa ntsako, hilaha Bibele yi khutazaka hakona loko yi ku: “Tsakani eka Yehovha mi tsakisisa, n’wina lavo lulama; huwelelani hi ku tsaka, n’wina hinkwenu lava lulameke embilwini.”—Pisalema 32:11.

“Nakulorhi wa ntiyiso u ni rirhandzu nkarhi hinkwawo, naswona i makwerhu la velekiweke loko ku ri ni maxangu.” (Swivuriso 17:17) Ku tiphofula eka munhu loyi hi n’wi rhandzaka kumbe eka  mutsundzuxi loyi hi n’wi tshembaka swi nga hi pfuna ku lwisana ni mintlhaveko ya ku titekela ehansi, hi yi simula yi nga si hi tlatlalata ehansi. Ku vulavula ni van’wana swi nga hi pfuna ku vona swilo hi ndlela leyinene. Simone u ri: “Ku tiphofula swi pfuna ngopfu. U fanele u hlamusela un’wana hi ndlela leyi u titwaka ha yona. Hakanyingi hi sweswo ntsena leswi lavekaka.” Ku endla tano swi ta ku pfuna ku vona ku hetiseka ka marito ya xivuriso lexi nge: “Ku vilela embilwini ya munhu hi kona loku nga ta yi tshova, kambe rito lerinene ra yi tsakisa.”—Swivuriso 12:25.

Leswi U Nga Swi Endlaka

Hi lo kambisisa misinya ya milawu ya Bibele yi nga ri yingani ntsena eka yo tala leyi nga hi pfunaka ku hlula mintlhaveko ya ku tilangutela ehansi, kutani hi kuma ntsako wa ntiyiso. Loko u ri un’wana wa lava va lwisanaka ni mintlhaveko ya ku tivona va nga faneleki, hi ku khutaza leswaku u ri kambisisa swinene Rito ra Xikwembu, ku nga Bibele. Ringeta ku va ni langutelo leri faneleke hi wena n’wini ni hi vuxaka bya wena ni Xikwembu. Ha tshemba leswaku Rito ra Xikwembu ri ta ku kongomisa leswaku u kuma ntsako wa ntiyiso eka hinkwaswo leswi u swi endlaka.

[Nhlamuselo ya le hansi]

[Swifaniso leswi nga eka tluka 7]

Ku hanya hi misinya ya milawu ya Bibele swi kondletela ntsako