Yehovha Wa Tsaka Loko U Tshembeka
Yehovha Wa Tsaka Loko U Tshembeka
“N’wananga, tlhariha u tsakisa mbilu yanga, leswaku ndzi ta angula loyi a ndzi tlhontlhaka.”—SWIV. 27:11.
1, 2. (a) Buku ya Yobo yi hlamusela hi xihehlo xihi lexi vuriweke hi Sathana? (b) Hi byihi vumbhoni bya leswaku Sathana a nga tshikanga ku tlhontlha Yehovha hi nkarhi wa Yobo?
YEHOVHA u pfumelele Sathana leswaku a ringa Yobo nandza wa yena la tshembekeke. Hikwalaho ka sweswo, Yobo u feriwe hi swifuwo swa yena, vana va yena a tlhela a vabya. Kambe loko Sathana a ringa Yobo, a a nga tiyimiselanga ku ringa yena ntsena. Sathana u te: “Nhlonge hi nhlonge, hinkwaswo leswi munhu a nga na swona u ta swi humesa leswaku a ponisa moya-xiviri wakwe.” Marito wolawo ma pfuxe ntlhontlho lowu khumbeke Yobo naswona wu ye emahlweni nkarhi wo leha endzhaku ka loko a file.—Yobo 2:4.
2 Kwalomu ka malembe ya 600 endzhaku ka loko Yobo a ringiwile, Solomoni u huhuteriwe ku tsala a ku: “N’wananga, tlhariha u tsakisa mbilu yanga, leswaku ndzi ta angula loyi a ndzi tlhontlhaka.” (Swiv. 27:11) Swi le rivaleni leswaku hi nkarhi wolowo Sathana a a nga si tshika ku tlhontlha Yehovha. Nakambe, eka xivono xa muapostola Yohane, u vone Sathana a hehla malandza ya Xikwembu endzhaku ka loko a hlongoriwe etilweni loko Mfumo wa Xikwembu wu heta ku simekiwa hi 1914. Hakunene, Sathana wa ha tlhontlha vutshembeki bya malandza ya Xikwembu ninamuntlha laha mafambiselo lawa yo biha ya swilo ma nga le kusuhi ni ku hela!—Nhlav. 12:10.
3. Hi tihi tidyondzo ta nkoka leti hi ti dyondzaka ebukwini ya Yobo?
3 Kutani xiya tidyondzo tinharhu leti hi ti dyondzaka ebukwini ya Yobo. Yo sungula, miringo ya Yobo yi paluxa loyi hakunene a nga nala wa vanhu ni lomu nkaneto wa vanhu va Xikwembu wu humaka kona. Nala yoloye i Sathana Diyavulosi. Ya vumbirhi, ku nga khathariseki leswaku hi langutana ni miringo ya njhani, loko hi ri ni vuxaka lebyi tiyeke ni Xikwembu hi ta kota ku tshama hi tshembekile. Ya vunharhu, loko hi ringiwa, Xikwembu xi ta hi seketela hilaha xi endleke hakona eka Yobo. Namuntlha Yehovha u hi seketela hi ku tirhisa Rito ra yena, nhlengeletano ya yena ni moya wa yena lowo kwetsima.
Tshama U Ri Karhi U Tiva Loyi Hakunene A Nga Nala Wa Hina
4. I mani muvangi wa swiyimo leswi hi swi vonaka emisaveni?
4 Vanhu vo tala a va pfumeli leswaku Sathana u kona. Kutani, hambiloko swiyimo swa misava swi nga va dyisi byi rhelela, a va swi xiyi leswaku muvangi wa swona i Sathana Diyavulosi. I ntiyiso leswaku maxangu yo tala vanhu vo tivangela hi voxe. Vatswari va hina vo sungula, Adamu na Evha, va hlawule ku fularhela Muvumbi wa vona. Kutani ku sukela hi nkarhi wolowo swilo swi fambe ximatsi eka switukulwana swa vona hi ku landzelelana ka swona. Kambe, muvangi wa mpfilumpfilu wolowo hinkwawo i Diyavulosi hileswi a xiseke Evha leswaku a xandzukela Xikwembu. Hi yena la endleke leswaku ku va ni misava leyi lawuriwaka hi yena exikarhi ka vanhu lava nga hetisekangiki lava faka. Hikwalaho ka leswi Sathana a nga “xikwembu xa mafambiselo lawa ya swilo,” vanhu va tekelele timfanelo ta yena to fana ni ku tikukumuxa, ku rhandza timholovo, mavondzo, makwanga, vuxisi ni ku xandzuka. (2 Kor. 4:4; 1 Tim. 2:14; 3:6; hlaya Yakobo 3:14, 15.) Timfanelo teto ti endle leswaku ku va ni madzolonga ya tipolitiki ni ya vukhongeri, rivengo, vungungundzwana ni makwanga, leswi nyanyisaka mbitsi lowu vanhu va mbombomeleke eka wona.
5. Xana hi lava ku endla yini hi vutivi bya nkoka lebyi hi nga na byona?
5 Kambe hina tanihi malandza ya Yehovha hi ni vutivi bya nkoka swinene. Ha swi tiva leswaku i mani muvangi wa swiyimo leswi yaka swi onhaka emisaveni. Kutani hi titwa hi ri ni vutihlamuleri bya ku byela van’wana ensin’wini leswaku i mani loyi hakunene a vangaka maxangu lawa! Naswona ha tsaka leswi hi yimaka na Yehovha, Xikwembu xa ntiyiso ni ku hlamusela van’wana ndlela leyi ha yona a nga ta herisa Sathana ni maxangu lama hi karhataka.
6, 7. (a) I mani la vangaka leswaku vagandzeri va ntiyiso va xanisiwa? (b) Hi nga xi tekelela njhani xikombiso xa Elihu wa khale?
6 Sathana a hi muvangi wa swilo swo tala leswi tiselaka vanhu nhlomulo ntsena kambe i muvangi wa nkaneto lowu vanhu va Xikwembu va langutanaka na wona. U tiyimisele ku hi ringa. Yesu Kreste u byele muapostola Petro a ku: “Simoni, Simoni, waswivo, Sathana u lava hi matimba leswaku a mi sefa kukotisa koroni.” (Luka 22:31) Hilaha ku fanaka, un’wana ni un’wana la fambaka emikondzweni ya Yesu u ta langutana ni ndzingo wo karhi. Petro u fanise Diyavulosi ni “nghala leyi vombaka, yi lava wa ku n’wi dya.” Kasi Pawulo u te: “Hinkwavo lava navelaka ku hanya hi ku tinyiketela loku nga ni vukwembu hi ku fambisana na Kreste Yesu na vona va ta xanisiwa.”—1 Pet. 5:8; 2 Tim. 3:12.
7 Hi nga kombisa hi ndlela yihi leswaku hi swi tiva kahle leswaku i mani loyi hakunene a nga nala wa hina loko mupfumeri-kulorhi a weriwa hi khombo? Ematshan’weni ya ku fambela ekule na yena, hi ta endla hilaha Elihu wa khale a endleke hakona, loyi a vulavuleke na Yobo tanihi munghana wa yena lonkulu. Hi pfuna makwerhu leswaku a kota ku langutana ni ndzingo wa nala wa hina, Sathana. (Swiv. 3:27; 1 Tes. 5:25) Xikongomelo xa hina i ku pfuna nandza-kulorhi leswaku hambi ko ba lexi dumaka, a tshama a tshembekile kutani a tsakisa Yehovha.
8. Ha yini Sathana a nga swi kotanga ku tshikisa Yobo leswaku a gandzela Yehovha?
8 Loko Sathana a hlasela Yobo u rhange hi ku lovisa swifuwo swa yena. Swifuwo sweswo a swi ri swa nkoka eka yena kumbexana a a tihanyisa hi swona. Kambe Yobo a a tlhela a endla switlhavelo hi swona. Endzhaku ka loko Yobo a kwetsimise vana vakwe, “[u pfuke] nimpundzu swinene a humesa switlhavelo swo hisiwa hi ku ya hi nhlayo ya vona hinkwavo; hikuva, Yobo u te, ‘kumbexana vana va mina va majaha va dyohile kutani va rhukana Xikwembu etimbilwini ta vona.’ Hi yona ndlela leyi Yobo a a endla ha yona minkarhi hinkwayo.” (Yobo 1:4, 5) Kutani Yobo a a tolovele ku endlela Yehovha switlhavelo. Loko a sungula ku weriwa hi miringo, a nga ha swi kotanga ku swi endla. Yobo a a nga ha ri na ‘swilo swa nkoka’ leswi a a ta xixima Yehovha ha swona. (Swiv. 3:9) Kambe leswi a a nga pfalekanga nomu, u dzunise Yehovha ha wona!
Tiyisa Vuxaka Bya Wena Na Yehovha
9. Hi wihi nchumu wa nkoka lowu hi nga na wona?
9 Hi nga swi kota ku tiyisa vuxaka bya hina na Yehovha ku nga khathariseki leswaku hi fuwile kumbe hi swisiwana, ha ha ri vantshwa kumbe se hi dyuharile, hi hanye kahle kumbe ha vabya. Ku nga khathariseki leswaku hi yihi miringo leyi hi langutanaka na yona, ku va ni vuxaka lebyi tiyeke na Xikwembu swi ta hi pfuna leswaku hi tshama hi tshembekile kutani hi xi tsakisa. Hambi ku ri vanhu lava vutivi bya vona bya ntiyiso a byi nga nyawuli, va swi kotile ku va ni xivindzi kutani va tshama va tshembekile.
10, 11. (a) Xana makwerhu un’wana u endle njhani loko a langutane ni miringo? (b) Xana makwerhu loyi u angurise ku yini eka xihehlo xa Sathana?
10 Hi xikombiso, Makwerhu wa xisati Valentina Garnovskaya, i un’wana wa Timbhoni to tala eRhaxiya leti tshameke ti tshembekile ku fana na Yobo hambiloko ti langutane ni miringo leyikulu. Hi 1945, loko a ri ni malembe ya 20, makwerhu un’wana u n’wi chumayerile. Makwerhu loyi u tlhelele eka yena kambirhi leswaku va ta burisana hi Bibele kambe endzhaku ka sweswo a va ha tlhelanga va vonana. Hambiswiritano, Valentina u sungule ku chumayela vaakelani va yena. Hiloko a khomiwa a gweviwa ku tshama malembe ya nhungu ekampeni ya nxaniso. Hi 1953 u ntshunxiwile kutani hi ku hatlisa a sungula ku chumayela. U tlhele a khomiwa a pfaleriwa—enkarhini lowu u gweviwe malembe ya khume. Endzhaku ka loko a hete malembe yo hlayanyana ekampeni yin’wana, u rhurhiseriwe eka yin’wana. Ekampeni yoleyo a ku ri ni vamakwerhu va xisati lava a va ri ni Bibele. Siku rin’wana makwerhu un’wana u kombe Valentina Bibele yoleyo. Sweswo swi n’wi tsakisile! Phela Valentina a a hetelele ku vona Bibele eka makwerhu loyi a nga n’wi chumayela hi 1945!
11 Hi 1967, Valentina u ntshunxiwile ekampeni kutani a hetelela a kombise ku tinyiketela ka yena eka Yehovha hi ku khuvuriwa. U ye emahlweni a hisekela ku chumayela a ntshunxekile ku fikela hi 1969. Khombo ra kona u tlhele a khomiwa hi lembe rero kutani a gweviwa ku tshama malembe manharhu ekhotsweni. Hambiswiritano, Valentina a nga tshikanga ku chumayela. Loko a nga si fa hi lembe ra 2001, se a a pfune vanhu va 44 leswaku va tiva ntiyiso. U hete malembe ya 21 emakhotsweni ni le tikampeni ta nxaniso. A a tiyimisele ku lahlekeriwa hi swilo hinkwaswo ku katsa ni ntshunxeko wa yena leswaku a ta tshama a tshembekile. Loko Valentina a nga si lova u te: “A ndzi kalanga ndzi va ni ndhawu ya mina yo tshama eka yona. Nhundzu ya mina hinkwayo a yi helela enkwameni wun’we kambe a ndzi tsakile naswona a ndzi enerisekile hi ku tirhela Yehovha.” Valentina u nyumise Sathana hi ndlela leyi khomisaka tingana eka xihehlo xa yena xa leswaku vanhu a va nge swi koti ku tshama va tshembekile eka Xikwembu loko va langutane ni miringo! (Yobo 1:9-11) A swi kanakanisi leswaku Valentina u tsakise Yehovha nileswaku Yehovha u tiyimisele ku n’wi pfuxa swin’we ni vanhu lavan’wana hinkwavo lava feke va tshembekile.—Yobo 14:15.
12. Ha yini rirhandzu ri ri ra nkoka eka vuxaka bya hina na Yehovha?
12 Vuxaka bya hina na Yehovha byi sekeriwe eka rirhandzu leri hi n’wi rhandzaka ha rona. Hi rhandza timfanelo ta yena naswona hi ta endla hinkwaswo leswi hi nga swi kotaka leswaku hi pfumelelana ni swikongomelo swa yena. Hambileswi Diyavulosi a vulaka leswaku a hi nge tshembeki loko hi ringiwa, hi rhandza Yehovha swi huma embilwini naswona rirhandzu rolero a ri na swipimelo. Rirhandzu rero ri hi pfuna leswaku hi tshama hi tshembekile hambiloko hi ringiwa. Kutani Yehovha u “ta rindza ndlela ya lavo tshembeka va yena.”—Swiv. 2:8; Ps. 97:10.
13. Xana Yehovha u swi teka njhani leswi hi n’wi endlelaka swona?
13 Rirhandzu ri endla leswaku hi dzunisa vito ra Yehovha hambiloko hi tivona hi nga ri nchumu. Yehovha u vona leswi nga etimbilwini ta hina kutani a nga hi avanyisi loko hi nga swi koti ku endla leswi a hi tiyimisele ku swi endla. Xa nkoka a hi leswi hi swi endlaka kambe i xivangelo lexi hi susumetaka ku endla tano. Hambiloko Yobo a ri ni gome naswona a tiyisele miringo yo tala, u vulavule ni vahehli va yena hi ndlela leyi a rhandzaka tindlela ta Yehovha ha yona. (Hlaya Yobo 10:12; 28:28.) Eka ndzima yo hetelela ya buku ya Yobo, Xikwembu xi hlundzukele Elifazi, Bilidadi na Sofara hileswi va vulavuleke mavunwa. Nakambe Yehovha u bumabumele Yobo hi ku n’wi vula “nandza wa mina” ka mune ni hi ku n’wi lerisa leswaku a kombelela vachaveleri va yena va vunwa ndzivalelo. (Yobo 42:7-9) Onge na hina hi nga tikhoma hi ndlela leyi nga ta endla leswaku Yehovha a hi tsakela.
Yehovha U Seketela Malandza Ya Yena Yo Tshembeka
14. Yehovha u n’wi pfune njhani Yobo leswaku a lulamisa mianakanyo ya yena?
14 Yobo u tshame a tshembekile hambileswi a a nga hetisekanga. Minkarhi yin’wana loko a ri ni gome u teriwe hi mianakanyo yo biha. Hi xikombiso u byele Yehovha a ku: ‘Ndzi kombele mpfuno eka wena, kambe a wu ndzi hlamulanga; hi voko ra wena ra matimba u ni vulala eka mina.’ Nakambe Yobo u hundzelete ndlela leyi a titekaka a ri wa nkoka ha yona, hi ku vula a ku: “A ndzi endlanga xihoxo,” a tlhela a ku: ‘A ku na madzolonga exandleni xa mina ni xikhongelo xa mina xi tengile.’ (Yobo 10:7; 16:17; 30:20, 21) Hambiswiritano, Yehovha u pfune Yobo hi musa hi ku n’wi vutisa swivutiso swo hlayanyana leswaku a tshika ku titeka a ri wa nkoka. Swi tlhele swi endla leswaku Yobo a swi vona kahle leswaku munhu a hi nchumu loko a pimanisiwa ni ndlela leyi Xikwembu xi tlakukeke ha yona. Yobo u wu amukerile nkongomiso ni ndzayo yoleyo kutani a lulamisa langutelo ra yena.—Hlaya Yobo 40:8; 42:2, 6.
15, 16. Xana Yehovha u pfuna malandza ya yena hi tindlela tihi?
15 Nakambe Yehovha u nyika malandza ya yena ya namuntlha. Ku engetela kwalaho hi tiphina vuyelo lebyinene. Hi xikombiso, Yesu Kreste u nyikele hi vutomi bya yena leswaku byi va nkutsulo leswaku vanhu va rivaleriwa swidyoho swa vona. Hikwalaho ka nkutsulo wolowo, hi kota ku va ni vuxaka lebyi tiyeke ni Xikwembu hambileswi hi nga hetisekangiki. (Yak. 4:8; 1 Yoh. 2:1) Nakambe loko hi langutane ni miringo, hi nga khongela hi kombela moya lowo kwetsima wa Xikwembu leswaku wu hi tiyisa. Ku engetela kwalaho, hi ni Bibele kutani loko hi yi hlaya hi tlhela hi anakanyisisa hi leswi hi swi dyondzaka eka yona, hi tilunghiselela ku langutana ni miringo ya ripfumelo ra hina. Loko hi dyondza, hi kota ku twisisa mintlhontlho ya ku soriwa ka mfanelo ya Xikwembu yo fuma misava ni matilo ni hinkwaswo leswi nga eka swona ku katsa ni ku tshembeka ka hina.
16 Nakambe, hi vuyeriwa swinene hi ku va swirho swa ndyangu wa Yehovha wa laha misaveni, lowu a wu phamelaka swakudya swa moya hi ku tirhisa “hlonga ro tshembeka ni ro tlhariha.” (Mat. 24:45-47) Emavandlheni ya kwalomu ka 100 000 ya Timbhoni ta Yehovha, ku khomiwa minhlangano eka rin’wana ni rin’wana ra wona, leyi hi dyondzisaka yi tlhela yi hi tiyisa leswaku hi kota ku langutana ni miringo ya ripfumelo ra hina. Sweswo swi vonaka eka xikombiso xa Sheila, muntshwa la nga Mbhoni leyi tshamaka eJarimani.
17. Kombisa leswaku ha yini swi ri vutlhari ku yingisa ndzetelo wa nhlengeletano ya Yehovha namuntlha.
17 Siku rin’wana loko Sheila a ri exikolweni vana va tlilasi leyi a dyondzaka eka yona va siyiwe va nga ri na thicara swa xinkarhana. Hiloko vana volavo va hlangana va lava ku bvumba vumundzuku bya vona hi ku tirhisa bodo ya Ouija. Sheila u hatle a huma etlilasini naswona leswi nga sala swi humelela swi endle leswaku a nga tisoli hi leswi a humeke etlilasini. Loko vana van’wana va ri karhi va tirhisa bodo ya Ouija va sungule ku twa leswaku ku ni madimona kutani va huma va baleka hileswi a va chuhile. Kambe, i yini lexi pfuneke Sheila leswaku a hatla a huma etlilasini? U ri: “Mavhiki ma nga ri mangani lama hundzeke emahlweni ka kwalaho, a ha ha ku bula hi khombo ra tibodo ta Ouija eminhlanganweni eHolweni ya Mfumo. Kutani a ndzi swi tiva kahle leswi ndzi faneleke ndzi swi endla. A ndzi lava ku tsakisa Yehovha hilaha Bibele yi vulaka hakona eka Swivuriso 27:11.” Sheila u tipfunile hi ku va kona eminhlanganweni a tlhela a rhiya ndleve!
18. Xana u tiyimisele ku endla yini?
18 Onge un’wana ni un’wana wa hina a nga tiyimisela ku namarhela swiletelo leswi hi swi kumaka eka nhlengeletano ya Xikwembu. Loko hi nga xwi eminhlanganweni, hi hlaya Bibele, hi dyondza minkandziyiso leyi sekeriweke eBibeleni, hi khongela naswona hi hlangana ni Vakreste lava nga ni vuxaka lebyi tiyeke na Yehovha, hi kuma nkongomiso ni nseketelo lowu hi wu lavaka. Yehovha u lava leswaku hi hlula naswona wa tiyiseka leswaku hi ta tshama hi tshembekile. Hi ni lunghelo ro dzunisa vito ra Yehovha, ro tshama hi tshembekile ni ra ku tsakisa Yehovha!
Wa Tsundzuka Xana?
• Hi swihi swiyimo ni miringo leyi vangiwaka hi Sathana?
• I yini xa nkoka swinene lexi hi nga na xona?
• Xana vuxaka bya hina na Yehovha byi sekeriwe eka yini?
• Hi tihi tindlela tin’wana leti Yehovha a hi seketelaka ha tona namuntlha?
[Swivutiso Swa Dyondzo]
[Xifaniso lexi nga eka tluka 8]
Xana u titwa u ri ni vutihlamuleri bya ku byela van’wana hi vutivi bya nkoka lebyi u nga na byona?
[Xifaniso lexi nga eka tluka 9]
Hi nga pfuna vapfumeri-kulorhi leswaku va tshama va tshembekile
[Xifaniso lexi nga eka tluka 10]
Valentina a a tiyimisele ku lahlekeriwa hi swilo hinkwaswo leswaku a ta tshama a tshembekile