Papila Leri Humaka eTikweni Ra Bolivia

U Tsakile Naswona U Ni Ntshembo Hambileswi A Nga Xisiwana

HAMBILESWI ndzi tirhaka tanihi murhumiwa ematikweni lama ha endlaka nhluvuko, a ndzi swi toloveli ku vona vusweti ni vanhu lava heleriweke hi ntshembo. Ndzi lava ku vona un’wana ni un’wana a ntshunxekile eku xanisekeni kakwe. Kambe ndza swi tiva leswaku i Mfumo wa Xikwembu ntsena lowu nga ta tlhantlha swiphiqo leswi. Hambiswiritano, ndzi tshamela ku vona vanhu lava hanyaka hi Rito ra Xikwembu va tsakile ku nga khathariseki swiyimo swo tika leswi va langutanaka na swona. Sabina i un’wana wa vona.

Emalembeni lama hundzeke Sabina a a khome vana vakwe vambirhi loko a langute nuna wakwe a nghena ebazini rin’wana ra khale a ya etikweni rin’wana a ya lava ntirho lowu wu holelaka ku antswa. Loko a ha rindzele ku vuya kakwe, tin’hweti to hundzuka malembe, kambe a ko fana ni kwala a nga ha vuyanga. Ku sukela loko nuna wakwe a fambile, Sabina a a boheka ku tirha hi matimba leswaku a ta kota ku tikhathalela ni ku wundla swinhwanyetana swakwe swimbirhi Milena na Ghelian.

Ndzi hlangane na Sabina ro sungula nindzhenga a ri karhi a pfuna vanhu lava a va xava eka xitolo xa sesi wakwe. A ndzi swi vona ematihlweni yakwe lama a ma karhele leswaku Sabina u tirhe hi matimba siku hinkwaro. Ndzi kombele ku dyondza na yena Bibele swin’we ni swinhwanyetana swakwe. U te: “Ndzi nga swi tsakela kambe a ndzi na nkarhi. Hambiswiritano, ndzi nga swi tsakela leswaku u dyondza ni vana va mina.” Ndzi pfumerile ku dyondza na vona. Loko ndzi ya emahlweni ndzi dyondza ni swinhwanyetana leswi, ndzi sungule ku twisisa xiyimo xo tika lexi Sabina a a langutane na xona.

Sabina a a pfuka hi awara ya mune nimixo. Loko swinhwanyetana swakwe swa ha etlele ekamareni leyi va tshamaka eka yona, Sabina a a lumeka ndzilo leswaku a tseleka poto. A a sweka nyama leyi a a yi chela eka tiphayi leti a a ti xavisa leswaku a kota ku wundla ndyangu wakwe. Hi xa tolo wa kona Sabina u va a endle tiphayi kambe a nga ti cheli nyama ya kona.

Sabina u longa swilo hinkwaswo hi vukheta leswi a nga ta swi tirhisa siku hinkwaro kutani a swi nghenisa eka xikocikari lexi choviwaka lexi a xi lombeke, swilo leswi swi katsa xitofu, bodlela ra gasi, tafula, switulu, mapoto, mafurha, nyama ni tiphayi swin’we ni juzi leyi endliweke ekaya hi mihandzu leyi nga endlaka tilitara to hlayanyana.

Hi awara ya tsevu nimixo, Sabina ni swinhwanyetana swakwe a va lotlela rivanti va famba. Loko va ri karhi va famba a nga kona exikarhi ka vona loyi a a vulavula kumbe ku hleka. Miehleketo ya vona a yi dzike eka ntirho wo tika lowu a va fanele va wu endla. Hakanyingi nimixo loko ndzi ri endlwini ya varhumiwa a ndzi vona vanhu vo hambana-hambana va endla ntirho lowu fanaka. Sabina i un’wana wa vavasati vo tala lava humaka  emakaya ya vona nimixo leswaku va ya xavisa swakudya ni swakunwa eswitarateni swa Bolivia.

Hi hafu ku bile awara ya tsevu nimixo loko dyambu ri sungula ku huma, Sabina ni swinhwanyetana swakwe va va va fika endhawini leyi va xaviselaka eka yona. Handle ko dya nkarhi va humesa swilo eka xikocikari naswona va tlhela va lunghisa ndzhuti ni tafula ro xavisela eka rona. Sabina u sungula ku katinga phayi yo sungula. Phayi leyi nun’hwelaka yi sungula ku hangalaka ni moya wa nimixo, hi xihatla vanhu lava twaka ndlala va sungula ku tshinela.

Sabina u vutisa muxavi wo sungula leswaku u “lava tingani?” Wanuna loyi a ha twaka vurhongo, u yimisa tintiho timbirhi naswona Sabina u namba a n’wi xavisela tiphayi timbirhi leti ta ha hisaka. Kutani a amukela swimalana swa kona. Hi siku ku xava vanhu lava tlulaka dzana. Loko va xavisa phayi yo hetelela va namba va longa va kongoma ekaya. Hambileswi milenge ya Sabina a yi pandza hikwalaho ka ntirho lowu a wu endleke nimixo, a a tlhela a ya eka ntirho wun’wana exitolo xa sesi wakwe.

Loko ndzi fika exitolo leswaku ndzi ta dyondza Bibele ni vana vakwe, ana se ku vekiwe mabenci mambirhi lamatsongo. Milena loyi a a ri na malembe ya kaye na Ghelian loyi a a ri na malembe ya nkombo a va yi langutela hi mahlo-ngati dyondzo yin’wana ni yin’wana naswona a va lunghiselela kahle. Hakantsongo-ntsongo swinhwanyetana leswi leswi nga ni tingana swi sungule ku ntshunxeka naswona swi ndzi pfumelela leswaku ndzi va munghana wa swona. Swi n’wi tsakisile Sabina ku vona leswi. Ku nga khathariseki xiyimiso xakwe xo tika u pfumerile leswaku na yena u ta dyondza na mina Bibele.

Loko vutivi bya yena hi Yehovha Xikwembu byi ya byi engeteleka u ye a n’wi rhandza swinene. U sungule ku va ni ntsako. A a nga ha tshami a ri ni gome naswona a a nga ha ri na tingana. Sesi wakwe u ri: “Sabina u tshama a ri karhi a n’wayitela ku nga nchumu lowu a a nga wu endli.” Vanhu van’wana na vona va vone ku cinca lokukulu eka Sabina ni swinhwanyetana swakwe. Ku navela ka yena loku a a ri na kona ku ringana nkarhi wo leha ko lava ku tiva ntiyiso malunghana ni Xikwembu ni xikongomelo xa xona ku hetisekile.

U yi tsakerile dyondzo yakwe ya Bibele kambe leswi a a nga ri na nkarhi a a tsandzeka ku ya eminhlanganweni ya Vukreste. Eku heteleleni u pfumerile loko ndzi n’wi rhamba leswaku a ta eHolweni ya Mfumo. Ku sukela nkarhi wolowo u hambete a ta eminhlanganweni. Evandlheni u kume vanghana va ntiyiso. Naswona u swi vonile leswaku Yehovha wa va khathalela lava n’wi rhandzaka ni lava ti tsonaka swo karhi leswaku va n’wi tirhela.—Luka 12:22-24; 1 Timotiya 6:8.

Sabina u swi rhandzile leswi a a swi hlaya naswona u tsakele ku swi byela van’wana. Kambe u te: “Ndzi khoma hi rhumbyana loko ndzi fanele ndzi chumayela erivaleni.” A a tivutisa leswaku, ‘Xana munhu la nga ni tingana tlhelo la nga dyondzekangiki a a ta pfuka a swi kotile ku chumayela vanhu van’wana?’ Kambe hikwalaho ka musa lowu a kombisiweke wona swin’we ni ku cinca loku hlamarisaka loku a ku endleke evuton’wini byakwe swi n’wi susumetele leswaku a teka goza leri ra nkoka. Naswona u swi xiyile leswaku swinhwanyetana swakwe a swi langute yena tanihi xikombiso xa swona. Kutani u sungule ku byela van’wana mahungu lamanene. Swinhwanyetana swakwe naswona swi chumayele na yena hi ku hiseka.

Namuntlha Sabina a nga ha ri yena wansati loyi a a tshamela ku endla ntirho lowu tikaka ni lowu nga n’wi tiseriki ntsako. Xiyimo xakwe xa timali a xi cincanga ngopfu. Lexi cinceke i ndlela leyi a byi langutaka ha yona vutomi. Leswi se a khuvuriweke u byela van’wana mahungu lamanene ya Mfumo wa Xikwembu, ku nga wona ntsena lowu nga ta herisa vusiwana ni gome.—Matewu 6:10.

Hi awara ya ntlhanu nimixo Sabina u va a lunghekele ku huma ekamareni leri va tshamaka eka rona. Kambe sweswi a nga yi ku xaviseni ka tiphayi. U ya hlangana ni ntlawa wa Vakreste van’wana leswaku va endla ntirho wo chumayela exitarateni. Ku tirhisa nkarhi wun’wana wakwe hi ku tirhandzela leswaku a pfuna van’wana, swi engetele ntsako wakwe. U lotlela rivanti rakwe a tsakile a kongoma exitarateni. Ematshan’weni yo chovha xikocikari, u khoma nkwama wakwe. Endzeni ka wona ku na Bibele ni tibuku leti sekeriweke eBibeleni leti a nga ta tinyika vanhu leswaku a hangalasa mahungu lama nga ta nyika vanhu ntshembo. A ri karhi a n’wayitela, Sabina u ri: “ A ndzi nga tshembi leswaku ndzi nga kala ndzi vulavula ni vanhu van’wana hi Bibele.” U tlhela a ku: “Ndza wu rhandza ntirho lowu!”