“Bodlhela Rin’we Ntsena Ro Hetelela”

ALLEN, u sungule ku nwa byala ku tlula mpimo loko a ri ni malembe ya 11. * Yena ni vanghana vakwe a va tlangela etimhandzini, va tekelela vatlangi va tifilimi. Byala lebyi vatlangi volavo a va byi nwa a byi nga ri bya xiviri, kambe lebyi a byi nwiwa hi Allen ni vanghana vakwe a byi ri bya xiviri.

Tony a a ri ni malembe ya 40 loko hakatsongo-tsongo a engetela mabodlhela ya byala lawa a a ma nwa madyambu man’wana ni man’wana, ma suke eka rin’we kumbe mambirhi ma ya eka ntlhanu kumbe tsevu. Eku heteleleni se a nga ha swi tivi leswaku u nwa mabodlhela mangani hi siku.

Allen u lave mpfuno eka xiphiqo lexi a ri na xona xa ku nwa byala ku tlula mpimo. Tony u wu bakanyele etlhelo mpfuno lowu vandyangu ni vanghana vakwe va n’wi nyikeke wona. Allen wa ha hanya ninamuntlha naswona u hi hlamusele mhaka ya vutomi byakwe; kambe Tony u fe emalembeni yo hlayanyana lama nga hundza endzhaku ka loko a humeleriwe hi khombo ra movha hikwalaho ko nwa byala ku tlula mpimo.

Hambiloko munhu a nwa ku tlula mpimo a ri yexe, leswi a swi endlaka a swi khumbi yena ntsena, kambe swi khumba ni vutomi bya vanhu van’wana naswona hakanyingi swi vanga vuyelo byo biha. * Ku nwa ku tlula mpimo hi swona leswi endlaka leswaku vanhu va xanisa van’wana, ku nga va hi ku va karihela kumbe hi ku va twisa ku vava emirini, swi endla leswaku va endla van’wana nsele kumbe ku va dlaya, swi vanga makhombo emapatwini ni le mintirhweni naswona swi vanga ni swiphiqo swin’wana swa rihanyo. Ku nwa ku tlula mpimo swi dyela vanhu mali leyi endlaka tibiliyoni ta tirhandi lembe ni lembe, hi nga ha vuli ku xaniseka loku munhu yoloye a ku vangelaka vanhu van’wana, ndyangu ni vana.

Vandla ra Rihanyo ra Tiko ra le United States ri ri: “A hi vanhu hinkwavo lava nwaka nkarhi na nkarhi lava nga ni xiphiqo xa byala naswona leswi a swi vuli swona leswaku vanhu hinkwavo lava nga ni xiphiqo xa byala va nwa siku ni siku.” Vanhu vo tala lava a va ringanisela loko va ha ku sungula ku nwa, va sungule ku nwa ku tlula mpimo va nga swi xiyanga. Van’wana a va tshami va ri eku nweni kambe siku leri va nwaka ha rona va mukisana ni mabodlhela yo tlula ntlhanu hi nkarhi wun’we.

Loko u hlawula ku nwa byala, xana u va u nwe ku tlula mpimo loko swi te yini? U nga swi tivisa ku yini loko u nga ha fanelanga u engeta “bodlhela rin’we ntsena ro hetelela”? (Swivuriso 23:29, 30, Contemporary English Version) Swihloko leswi landzelaka swi ta nyikela rungula leri pfunaka emhakeni leyi.

[Tinhlamuselo ta le hansi]