Loko Yesu a vutisiwe leswaku hi xihi xileriso lexikulu eka hinkwaswo, u te: “U fanele u rhandza Yehovha Xikwembu xa wena hi mbilu ya wena hinkwayo ni hi moya-xiviri wa wena hinkwawo ni hi mianakanyo ya wena hinkwayo.” (Matewu 22:37) Hambiswiritano, emahlweni ko va vanhu va rhandza Xikwembu, va fanele va kuma vutivi lebyi kongomeke ha xona. (Yohane 17:3) Xana vanhu hinkwavo va ta va na rona lunghelo rero?

Buku leyi nga ni vutivi bya Xikwembu i Bibele. (2 Timotiya 3:16) Etindhawini to tala leti vanhu va tshamaka eka tona yi kona. Nakambe swi nga ha endleka leswaku vanhu volavo va komberiwe ko tala ku dyondzeriwa Bibele leswaku va ta kuma vutivi lebyi kongomeke hi Xikwembu. (Matewu 28:19) Van’wana va kurisiwe hi vatswari lava nga Vakreste, lava siku ni siku va va dyondzisaka hi Xikwembu.—Deteronoma 6:6, 7; Vaefesa 6:4.

Nilokoswiritano, vanhu van’wana va kulele ehansi ka swiyimo swo tika. Van’wana va kulele emindyangwini leyi nga riki na rirhandzu naswona vatswari va vona va nga khathaliki. (2 Timotiya 3:1-5) Lava kuleleke emindyangwini yo tano swi nga ha va tikela ku languta Xikwembu tanihi Tata wa le tilweni la nga ni rirhandzu. Vo tala a va dyondzanga, xisweswo swa va tikela ku hlaya Bibele. Van’wana va pfariwe mahlo hi ku dyondzisiwa tidyondzo ta mavunwa ta vukhongeri, kumbe va tshama emindyangwini, emugangeni ni le matikweni lawa eka wona swi nga pfumeleriwiki ku dyondza Bibele. (2 Vakorinto 4:4) Xana swiyimo leswi, swi nga endla leswaku va nga ri kumi lunghelo ro dyondza hi Xikwembu leswaku va ta xi rhandza?

Yesu a a swi tiva leswaku swiphiqo leswi vanhu van’wana va langutanaka na swona swi ta endla leswaku swi va tikela ku rhandza Xikwembu ni ku xi yingisa. (Matewu 19:23, 24) U tsundzuxe vadyondzisiwa vakwe leswaku hambiloko swiphiqo swin’wana swi tikomba swi nga ta tlhantlheka eka vanhu, “eka Xikwembu swilo hinkwaswo swa koteka.”—Matewu 19:25, 26.

Xiya leswi landzelaka: Yehovha Xikwembu u tiyisekise leswaku Rito rakwe ku nga Bibele, ri hangalasiwa emisaveni hinkwayo ku tlula tibuku hinkwato. Bibele yi vule ka ha ri emahlweni leswaku mahungu lamanene ya Xikwembu ni xikongomelo xa xona hi misava swi ta chumayeriwa “emisaveni hinkwayo leyi akiweke.” (Matewu 24:14) Namuntlha, Timbhoni ta Yehovha ti chumayela mahungu lamanene ematikweni yo tlula 230 naswona ti kandziyisa minkandziyiso leyi sekeriweke eBibeleni hi tindzimi ta kwalomu ka 500. Hambi ku ri vanhu lava nga ri kumangiki lunghelo ro dyondza Bibele, va nga ha dyondza swo tala hi Xikwembu xa ntiyiso hi ku xiyisisa leswi xi swi tumbuluxeke.—Varhoma 1:20.

Ku engetela kwalaho, Rito ra Xikwembu ri ri: “Yehovha u kambisisa timbilu hinkwato, naswona u xiya mboyamelo wun’wana ni wun’wana wa miehleketo. Loko u n’wi lavisisa, u ta endla leswaku u n’wi kuma.” (1 Tikronika 28:9) Hambileswi Yehovha a nga vuliki leswaku vanhu hinkwavo va ta kuma lunghelo leri fanaka, u ta tiyisekisa leswaku hinkwavo lava nga ni timbilu letinene va ri kuma lunghelo leri. Hi hala tlhelo, u ta endla leswaku vanhu lava nga fa va nga ri kumanga lunghelo ro dyondza hi yena, va ri kuma loko va pfuxiwa emisaveni leyintshwa yo lulama.—Mintirho 24:15.