Dyondza Eka Rito Ra Xikwembu

Xana Wu Kona Ntshembo Hi Lava Feke?

Xihloko lexi xi tlakusa swivutiso leswi u nga ha vaka u tivutisa swona ni ku ku komba laha tinhlamulo u nga ti kumaka kona eBibeleni ya wena. Timbhoni ta Yehovha ti ta swi tsakela ku bula na wena hi tinhlamulo ta kona.

1. Hi wihi ntshembo lowu nga kona hi lava feke?

Loko Yesu a fika eBetaniya ekusuhi ni le Yerusalema, munghana wakwe Lazaro se a ri ni masiku ya mune a file. Yesu u ye esirheni a ri na Marta na Mariya, vasesi va mufi. Hi ku hatlisa, ntshungu wu hlengeletanile. Ehleketa ndlela leyi Marta na Mariya a va tsake ha yona loko Yesu a pfuxa Lazaro!—Hlaya Yohane 11:20-24, 38-44.

Marta a a ri ni ntshembo wa leswaku vafi va ta pfuxiwa. I khale malandza yo tshembeka ya Yehovha ma ri karhi ma swi tiva leswaku enkarhini lowu taka, Xikwembu xi ta pfuxa vafi leswaku va tlhela va hanya laha misaveni.—Hlaya Yobo 14:14, 15.

2. Hi xihi xiyimo xa lava feke?

Hambileswi matimba ya vutomi, kumbe “moya,” ma endlaka leswaku vanhu ni swiharhi va hambeta va hanya, hina a hi mimoya leyi nga ambala miri wa nyama. (Eklesiasta 3:19; Genesa 7:21, 22) Hi swivumbiwa swa nyama leswi endliweke hi ntshuri. (Genesa 2:7; 3:19) Loko hi fa, mianakanyo ya hina ya lova. Xisweswo, endzhaku ka loko Lazaro a pfuxiwile, a nga vulanga nchumu malunghana ni rifu rakwe hikuva vafi a va tivi nchumu.—Hlaya Pisalema 146:4; Eklesiasta 9:5, 10.

Swi le rivaleni leswaku vafi a va xaniseki. Kutani dyondzo ya leswaku Xikwembu xi xanisa vanhu loko va file a hi ntiyiso. Yi onha Xikwembu vito. Mhaka ya leswaku xi xanisa vanhu endzilweni wa tihele ya xi nyenyetsa.—Hlaya Yeremiya 7:31.

  3. Xana hi nga vulavula ni lava feke?

Vafi a va swi koti ku vulavula. (Pisalema 115:17) Kambe loko tintsumi leto homboloka ti vulavula ni vanhu, ti nga ha va kanganyisa ti tiendla onge i moya wa munhu la feke. (2 Petro 2:4) Yehovha wa yi yirisa mhaka yo va hi ringeta ku vulavula ni lava feke.—Hlaya Deteronoma 18:10, 11.

4. I vamani lava nga ta pfuxiwa?

Emisaveni leyintshwa leyi taka, vanhu va timiliyoni lava nga emasirheni va ta pfuxiwa. Hambi ku ri van’wana lava a va hanya hi swilo swo biha hileswi a va nga n’wi tivi Yehovha va ta pfuxiwa.—Hlaya Luka 23:43; Mintirho 24:15.

Vanhu lava pfuxiweke va ta dyondzisiwa leswaku va tiva Xikwembu ni ku kombisa ripfumelo eka Yesu hi ku va va n’wi yingisa. (Nhlavutelo 20:11-13) Lava nga ta pfuxiwa kutani va endla swilo leswinene va ta tiphina hi vutomi hilaha ku nga heriki laha misaveni. Hambiswiritano, vanhu van’wana lava pfuxiweke va ta ya emahlweni va endla swilo swo biha. Leswi vanhu vo tano va nga ta avanyisiwa hi ku ya hi mahanyelo ya vona yo biha, va ta “pfukela eku avanyisiweni.”—Hlaya Yohane 5:28, 29.

5. Xana ku pfuxiwa ka lava feke swi hi byela yini hi Yehovha?

Ku pfuxiwa ka vafi swa koteka hikuva Xikwembu xi rhumele N’wana wa xona leswaku a ta nyikela vutomi byakwe hikwalaho ka hina. I xikombiso xa rirhandzu ni musa wa Yehovha lowu nga faneriwiki.—Hlaya Yohane 3:16; Varhoma 6:23.

Leswaku u kuma rungula leri engetelekeke, vona ndzima 6 na 7 ta buku leyi nge Xana Bibele Yi Dyondzisa Yini Hakunene?, leyi kandziyisiweke hi Timbhoni ta Yehovha.

[Xifaniso lexi nga eka tluka 16]

Adamu u vumbiwe hi ntshuri