Swivutiso Swa Vahlayi . . .

Xana Tincece Ti Fanele Ti Khuvuriwa?

▪ Victoria u ri: “A ndzi chava leswaku makwerhu wa mina John u ta xanisiwa eLimbo. Ha yini a a ri ni ku chava koloko? Victoria wa hlamusela: “John u fe a nga si khuvuriwa naswona muprista wa Mukhatoliki u vule leswaku hikwalaho ka xivangelo lexi, John u ta tshama eLimbo hilaha ku nga heriki.” Hakunene vonelo rero ra chavisa, kambe, xana dyondzo leyi yi sekeriwe eBibeleni? Xana Bibele yi dyondzisa leswaku vana lava feke va nga si khuvuriwa va ta tshama hilaha ku nga heriki eLimbo?

Bibele yi dyondzisa leswaku Vakreste va fanele va khuvuriwa. Yesu u lerise valandzeri vakwe a ku: “[Endlani] vanhu va matiko hinkwawo va va vadyondzisiwa, mi va khuvula hi vito ra Tatana ni ra N’wana ni ra moya lowo kwetsima, mi va dyondzisa ku hlayisa swilo hinkwaswo leswi ndzi mi leriseke swona.” (Matewu 28:19, 20) Xiya leswaku lava khuvuriwaka va fanele va va vadyondzisiwa va Yesu. Leswi swi vula leswaku i vanhu lava dyondzeke malunghana na Yesu va tlhela va hlawula ku n’wi landzela—a swi koteki leswaku tincece ti endla xiboho lexi.

Hambiswiritano, vanhu vo tala va sindzisa leswaku xileriso xa Yesu xi tirha ni le ka vana. Richard P. Bucher mufundhisi wa kereke ya Lutere u te: “Un’wana ni un’wana u fanele a khuvuriwa, ku katsa ni tincece.” U ye emahlweni a ku: “Ku va va khuvuriwa i ku endlela leswaku va rivaleriwa ni ku endla leswaku va nga xanisiwi hilaha ku nga heriki etiheleni.” Kambe, entiyisweni tinhlamuselo to tano a ti fambisani ni tidyondzo ta Yesu hi tindlela tinharhu ntsena.

Yo sungula, Yesu a nga dyondzisanga leswaku tincece ti fanele ti khuvuriwa. Ha yini mhaka yoleyo yi ri ya nkoka? Xiya: Yesu u dyondzise vadyondzisiwa vakwe hi mbilu hinkwayo malunghana ni swilaveko swa Xikwembu. Minkarhi yin’wana, u phindha-phindhe dyondzo leyikulu. Ha yini? Ku va a tiyiseka leswaku vadyondzisiwa vakwe va twisise yinhla. (Matewu 24:42; 25:13; Marka 9:34-37; 10:35-45) Kambe, ku hava ni kan’we laha a nga tshama a dyondzisa leswaku tincece ti fanele ti khuvuriwa. Xana minkarhi yin’wana Yesu a pfa a rivala ku boxa xilaveko? Nikatsongo! Hakunene, loko ku ri hileswaku tincece a ti fanele ti khuvuriwa, Yesu a ta va a vurile.

Ya vumbirhi, Yesu a nga dyondzisanga leswaku un’wana ni un’wana wa xaniseka endzhaku ka rifu. A a tshemba Matsalwa, lama swi vekaka erivaleni leswaku: “Lava hanyaka va swi tiva leswaku va ta fa; kambe loko ku ri lava feke, a va tivi nchumu nikatsongo.” (Eklesiasta 9:5) Yesu a swi tiva leswaku vafi a va xanisiwi epagatori, eLimbo, endzilweni wa tihele kumbe endhawini yin’wana. Ematshan’weni ya sweswo, u dyondzise leswaku a va twi nchumu, onge hiloko va etlele.—Yohane 11:1-14.

Ya vunharhu, Yesu u dyondzise leswaku “hinkwavo lava nga eka masirha-bako ya xitsundzuxo” va ta pfuxiwa. (Yohane 5:28, 29) Handle ko kanakana, vanhu lava va ta katsa vo tala va timiliyoni lava a va nga khuvuriwanga. Handle ka ku pfuxiwa, va ta va ni nkarhi wo dyondza hi swilaveko swa Xikwembu naswona va ta hanya hilaha ku nga heriki eParadeyisini laha misaveni. *—Pisalema 37:29.

Swi le rivaleni leswaku Bibele a yi dyondzisi leswaku tincece ti fanele ti khuvuriwa.

[Nhlamuselo ya le hansi]