U NGA ha pfumela leswaku ku tshama u xalamukile loko u ri exikolweni i swa nkoka. Vana vo tala va etlela loko va ri etlilasini, kambe leswaku u dyondza, u fanele u tshama u xalamukile. Kumbexana u tlhela u ya eminhlanganweni leyi eka yona u dyondzaka Bibele.

U ehleketa leswaku i yini leswi u nga swi endlaka leswi nga ta ku pfuna leswaku u tshama u xalamukile?— * Xin’wana lexi u nga xi endlaka i ku etlela ka ha ri ni nkarhi. Kumbexana ku ba xithongwana ninhlikanhi swi nga ha pfuna na swona. A hi voneni leswaku i yini leswi hi nga swi dyondzaka eka leswi humeleleke muntshwa un’wana loyi a etleleke exikarhi ka vusiku hi nkarhi lowu muapostola Pawulo a nyikela nkulumo. Hlaya Mintirho ndzima 20, tindzimana 7 ku ya eka 12 eBibeleni kutani u vona leswi endlekeke.

Pawulo a endzela vandlha leri nga ekusuhi ni hlaluko ra muti wa Trowasi. Bibele yi vula leswaku Pawulo “a a ta famba esikwini leri tlhandlamaka” hi xikepe. Kutani “[u ndlandlamuxe] ku vulavula kakwe ku fikela exikarhi ka vusiku.” Ha hlaya: “Ri tshame efasitereni, jaha rin’wana leri vuriwaka Yutiko ri khomiwa hi vurhongo lebyikulu loko Pawulo a ha vulavula.” I yini leswi landzeleke?—

Yutiko u we efasitereni kutani a “wela ehansi ku suka eka xithezi xa vunharhu.” Pawulo ni van’wana va tsutsumele ehansi ka xithezi hi ku hatlisa hilaha va nga kotaka hakona. Yutiko a ri ehansi—a file! Xana wa ri ehleketa gome leri hinkwavo va veke na rona?— Bibele yi vula leswaku Pawulo u angarhe Yutiko. Hi ku hatlisa Pawulo u huwelele hi ntsako a ku: ‘Mi nga karhateki, wa hanya!’ Xikwembu xi pfuxe Yutiko!

Hi nga dyondza yini hi Xikwembu eka leswi humeleleke  eka Yutiko?— Nchumu wun’wana hi leswaku Yehovha, Tata wa hina wa le tilweni, a nga pfuxa vanhu lava feke, ku katsa ni vana. Yehovha wa ku twisisa naswona wa ku rhandza, ku tlula leswi vatswari va wena va ku rhandzisaka xiswona. Loko Yesu a ha ri emisaveni, u kombise leswi Yehovha a nga xiswona hi ku angarha vana kutani a va katekisa. U tlhele a pfuxa vantshwa, ku katsa ni xinhwanyetana xa malembe ya 12.

Xana ku tiva leswaku Tata wa wena wa le tilweni wa ku rhandza swi endla leswaku u titwa njhani?— I ntiyiso leswaku swi hi endla hi rhandza Yehovha naswona hi lava ku yingisa leswi A swi vulaka. Xana wa swi tiva leswaku hi nga swi kombisa njhani leswaku ha n’wi rhandza?— Ndlela yin’wana i ku vula leswaku ha n’wi rhandza. Yesu u te: “Ndza n’wi rhandza Tatana.” Kambe Yesu u endle swo tala ku nga ri ku vula ntsena leswaku wa xi rhandza Xikwembu. U swi kombise hileswi a swi endleke.

Yesu u yingise Xikwembu. U te: “Nkarhi hinkwawo ndzi endla swilo leswi n’wi tsakisaka.” Loko hi endla leswi fanaka leswaku hi tsakisa Yehovha ni N’wana wakwe Yesu, hi ta ringeta ku endla leswi nga ematimbeni ya hina leswaku hi tshama hi xalamukile hilaha hi nga kotaka hakona loko swi fanerile.