Xana U Nga Ma Tshemba Masingita Lama Nga eBibeleni?

LOKO u byeriwe mhaka yo hlamarisa, xana vutshembeki bya munhu loyi a ku byelaka yona a byi nga ta khumba ndlela leyi u faneleke u tshemba mhaka yoleyo ha yona kumbe u nga yi tshembi? Vutshembeki byo tano a byi katsi ndlela leyi munhu a hlamuselaka mhaka ha yona ntsena kambe ni ndhuma yakwe yo vulavula ntiyiso. Phela, loko ku ri leswaku eka malembe lama nga hundza a a ku byela ntiyiso nkarhi na nkarhi naswona a nga si tshama a ku hembela hi vomu, u nga va ni xivangelo lexi twalaka xo tshemba leswi a ku byelaka swona.

Swi tano ni hi masingita lama tsariweke eBibeleni. Ku hava ni un’we wa hina loyi a a hanya loko swiendlakalo leswi swi humelela. Kambe hi nga tiyiseka loko rungula ra Bibele ri tshembeka—ni loko ri ri ntiyiso. Njhani? Hi leswi swivangelo swin’wana leswi engetelaka vutshembeki bya marungula ya le Bibeleni lama vulavulaka hi masingita.

Masingita yo tala ma endliwe etindhawini ta mani na mani. Minkarhi yin’wana, a ma voniwa hi magidi loko ku nga ri timiliyoni ta vahlaleri. (Eksoda 14:21-31; 19:16-19) A ma endleriwanga exihundleni, ekule ni vanhu.

Masingita ya kona a ma endliwa hi ndlela yo olova. A ku nga ri ni switirhisiwa swo hlawuleka kumbe switeji leswi kokaka mahlo kumbe swiendlo swa vukanganyisi. Etindhawini to tala, masingita lama nga eBibeleni ma humelele swi nga hleriwanga naswona i vanhu lava a va ma kombela. (Marka 5:25-29; Luka 7:11-16) Eswiyin’weni swo tano, munhu loyi a endlaka masingita a a nga ta swi kota ku hlela swilo ka ha ri emahlweni.

Xikongomelo xa vanhu lava a va endla masingita a ku nga ri leswaku va tikumela ndhuma, ku dzunisiwa ni rifuwo. Ematshan’weni ya sweswo, a ku ri ku vangamisa Xikwembu. (Yohane 11:1-4, 15, 40) Matshalatshala man’wana ni man’wana ya vanhu yo lava ku pindzula rifuwo eka masingita yo tano ya matimba ma soriwile.—2 Tihosi 5:15, 16, 20, 25-27; Mintirho 8:18-23.

Masingita yo hambana-hambana lama nga eBibeleni ma kombisa leswaku vanhu a va nga ta ma endla hi matimba ya vona. Hi xikombiso, lwandle ni moya swi miyetiwile, mati ma cinciwe ma va vhinyo, mpfula yi yimisiwile yi tlhela yi na, vanhu lava vabyaka va horisiwile naswona vanhu lava nga voniki va tlhele va vona. Masingita lawa hinkwawo ni man’wana yo tala ma kombisa leswaku matimba lama tlulaka ya munhu lama nga tirhaka eka mixaka hinkwayo ya timhaka ma fanele ma tirhe eka masingita yo tano.—1 Tihosi 17:1-7; 18:41-45; Matewu 8:24-27; Luka 17:11-19; Yohane 2:1-11; 9:1-7.

Hambi ku ri vakaneti lava voneke masingita a va kalanga va vula leswaku a ma endlekanga. Loko Yesu a pfuxe munghana wakwe Lazaro, valala va Yesu va vukhongeri a va kanetanga leswaku Lazaro a a file. Xana a va ta kaneta njhani? Lazaro a a ri  ni masiku ya mune a lahliwile. (Yohane 11:45-48; 12:9-11) Hambi ku ri eka malembe-xidzana endzhaku ka loko Yesu a file, vatsari va Talmud ya Xiyuda va hambete va pfumela leswaku Yesu a a ri ni matimba yo endla masingita. Va vutise laha matimba wolawo a a ma kuma kona. Hilaha ku fanaka, loko valandzeri va Yesu va yisiwa ehubyeni ya Vayuda, a va vutisiwanga xivutiso lexi nge “Xana mi endle singita?” Kambe va vutisiwe leswi: “Xana leswi mi swi endle hi matimba ya mani kumbe hi vito ra mani?”—Mintirho 4:1-13.

Kutani, xana u nga swi tshemba leswi Bibele yi hi byelaka swona malunghana ni masingita? Leswi hi swi kambisiseke swi swi kombisa kahle leswaku marungula ya Bibele malunghana ni masingita ya tshembeka. Ku ni swivangelo swin’wana swo tshemba marungula lawa ya le Bibeleni. Hi xikombiso, loko Bibele yi vulavula hi xiendlakalo xo karhi, hakanyingi yi hi byela nkarhi, ndhawu ni mavito ya vanhu lava katsekeke. Hambi ku ri vaxopaxopi va Bibele va hlamarisiwe hi ku pakanisa ka vuxokoxoko bya matimu lama kumekaka eBibeleni. Vuprofeta bya madzana lebyi nga eBibeleni byi hetisekile. Ku engetela kwalaho, Bibele yi ni nkongomiso wo tala malunghana ni ndlela ya ku va ni vuxaka lebyinene exikarhi ka vanhu—nkongomiso lowu pfuneke vanhu vo tala va malembe yo hambana-hambana ni va swiyimo swo hambana-hambana. Loko swi ta eka vuxaka bya vanhu, nkongomiso lowu humaka eBibeleni wu tikombe wu nga ringanisiwi na nchumu.

Loko ku ri hileswaku a wu si yi tshemba hi ku helela Bibele, ha yini u nga tinyiki nkarhi wo yi kambisisa hi vukheta? Loko u ya u yi tiva, u ta ya u yi tshemba. (Yohane 17:17) U ta swi xiya leswaku u nga tshemba leswi yi ku byelaka swona malunghana ni masingita lama endlekeke enkarhini lowu hundzeke. Loko u kala u tshemba marungula wolawo, u ta va ni xisekelo lexinene xo tshemba leswi Bibele yi vulaka leswaku swi ta humelela enkarhini lowu taka.

[Xifaniso lexi nga eka tluka 7]

Vakaneti va Yesu a va kanetanga leswaku Lazaro a a file