Ndzi kulele endhawini leyi nga fuwangiki leyi nga ekusuhi ni hlaluko leri nga edorobeni ra Turku. Tata wa mina a a ri mubi wa xibakele loyi a dumeke naswona mina na ntsongwana ya mina a hi rhandza ku ba xibakele. Eka malembe lawa ndzi sunguleke xikolo ha wona hakanyingi a ndzi katseka eka tinyimpi. Loko ndzi va eka malembe ya kondlo-a-ndzi-dyi, ndzi joyine ntlawa lowu karhataka, lowu endleke leswaku ndzi va ni tihanyi swinene. Ndzi tlhele ndzi sungula ku rhandza vuyimbeleri bya pongo naswona a ndzi lava ku va nghwazi ya rhok.

Ndzi xave swigubu kutani ndzi sungula ntlawa wa vuyimbeleri naswona hi ku hatlisa ndzi ve murhangeri wa ntlawa wolowo. A ndzi rhandza ku hanya hi ndlela leyi nga lawulekiki loko ndzi ri exitejini. Tanihi leswi ntlawa wa hina a wu ri na rigombo ni ku tlhela wu vonaka wu chavisa, hakatsongo-tsongo hi hatle hi xiyiwa. Hi sungule ku yimbelela emahlweni ka vanhu vo tala naswona hi rhekhode ko hlayanyana, loko hi rhekhoda ro hetelela hi tsakeriwe swinene. Eku heleni ka 1980, hi ye eUnited States ku ya endla leswaku ntlawa wa hina wu tiviwa. Hi yimbelele eNew York na le Los Angeles ko hlayanyana naswona hi tihlanganise ni vatshila va bindzu ra vuyimbeleri loko hi nga si tlhelela eFinland.

Hambileswi a ndzi tiphina hileswi a ndzi ri eka ntlawa wa vuyimbeleri, a ndzi lava vutomi lebyi nga ni xikongomelo. A ndzi venga moya wa ku phikizana lowu vayimbeleri ni lava a ndzi tirha na vona a va ri na wona naswona a ndzi pfilunganyiwe hi vutomi bya mina lebyi nga riki na xikongomelo. A ndzi titwa onge ndzi munhu loyi a nga ni mahanyelo yo biha naswona a ndzi chava ku hisiwa etiheleni. Ndzi ringete ku kuma tinhlamulo eka tibuku to tala to hambana-hambana ta vukhongeri naswona ndzi tlhele ndzi khongela eka Xikwembu hi mbilu hinkwayo leswaku xi ndzi pfuna, hambileswi a ndzi twa onge a ndzi nge he pfuki ndzi xi tsakisile.

Leswaku ndzi tiwundla, a ndzi tirha eposweni ya kwalaho. Siku rin’wana, ndzi kume leswaku munhu loyi a ndzi tirha na yena a ri Mbhoni ya Yehovha. Kutani ndzi n’wi tlhave hi swivutiso. Tinhlamulo takwe leti twisisekaka ta Matsalwa ti ndzi tsakisile, kutani ndzi pfumerile leswaku a dyondza na mina Bibele. Endzhaku ka loko ndzi ri karhi ndzi dyondza ku ringana  mavhiki, ntlawa wa mina wu komberiwe ku ya rhekhoda hi xikongomelo xo humesa albamu eUnited States. Ndzi twe onge leyi a ku ri njombo evuton’wini bya mina.

Ndzi byele Mbhoni leyi a yi dyondza na mina leswaku a ndzi lava ku endla albamu yin’wana naswona endzhaku ka sweswo, a ndzi ta hisekela ku tirhisa milawu ya Bibele evuton’wini bya mina. A yi nyikelanga mavonelo ya yona; kambe yi ndzi kombele leswaku ndzi hlaya marito ya Yesu lama tsariweke eka Matewu 6:24. Ndzimana yoleyo yi ri: “Ku hava loyi a nga vaka hlonga ra tihosi timbirhi.” A ndzi tsemeke nhlana loko ndzi twisisa nhlamuselo ya marito ya Yesu. Kambe endzhaku ka masiku ma nga ri mangani, mudyondzisi wa mina wa Bibele hi yena loyi se a tsemekeke nhlana! Ndzi n’wi byele leswaku leswi a ndzi lava ku landzela Yesu, ndzi sukile eka ntlawa wa vuyimbeleri!

Bibele a yi fana na xivoni lexi ndzi paluxelaka swihoxo swa mina. (Yakobo 1:22-25) Ndzi xiye leswaku a ndzi ri ni tihanyi: A ndzi tikukumuxa, ndzi tlhela ndzi navela ku va loyi a humelelaka swinene. A ndzi rhuketela, ndzi ri ni rigombo, ndzi dzaha ni ku va xindzendzele. Loko ndzi xiya ndlela leyi vutomi bya mina a byi nga fambisani ni milawu ya Bibele ha yona, ndzi sungule ku pfilunganyeka. Hambileswi a swi tika swinene, a ndzi tiyimiserile ku endla ku cinca loku a ku laveka.—Vaefesa 4:22-24.

Eku sunguleni, a ndzi tshamela ku kingindziwa hi ripfalo ra swihoxo leswi ndzi swi endleke khale. Kambe Mbhoni leyi a yi dyondza na mina yi ndzi pfunile swinene. Yi ndzi kombe leswi Bibele yi swi vulaka eka Esaya 1:18, leyi nge: “Hambiloko swidyoho swa n’wina swo va swa ribungu, swi ta endliwa swi basa ku fana ni gamboko.” Marito lawa ni tindzimana tin’wana ta Bibele swi ndzi khorwisile leswaku Tata wa hina wa le tilweni u ni tintswalo naswona u lava ku horisa timbanga ta lava va hundzukaka eka swihoxo swa vona.

Loko ndzi sungula ku tiva Yehovha ni ku n’wi rhandza, a ndzi lava ku nyiketela vutomi bya mina eka yena. (Pisalema 40:8) Ndzi khuvuriwe hi 1992 entsombanweni wa matiko yo hambana-hambana wa Timbhoni ta Yehovha lowu a wu khomeriwe eSt. Petersburg, le Rhaxiya.

Ndzi ve ni vanghana vo tala lavanene exikarhi ka vagandzeri va Yehovha. Nkarhi na nkarhi ha hlangana hi tlanga vuyimbeleri lebyi amukelekaka kutani hi tiphina hi nyiko leyi, leyi humaka eka Xikwembu. (Yakobo 1:17) Nkateko wo hlawuleka lowu ndzi veke na wona hileswi ndzi tekaneke ni nsati wa mina loyi a rhandzekaka, Kristina. Mina na yena hi avelana swilo swo tala—ntsako ni swiphiqo swa vutomi swin’we ni ndlela leyi ndzi titwaka ha yona.

Loko a ndzi nga vanga Mbhoni ya Yehovha a ndzi ta va ndzi file. Enkarhini lowu nga hundza, nkarhi na nkarhi a ndzi tihoxa eka swiphiqo. Sweswi ndzi ni xikongomelo xa xiviri naswona ndzi vona swilo hinkwaswo swi famba kahle.