BULO NI MUAKELANI
Xana Xikwembu Xa Khathala Loko Hi Xaniseka?
Bulo leri landzelaka ri kombisa ndlela leyi Mbhoni ya Yehovha yi nga bulaka ha yona ni muakelani. A hi nge Mbhoni ya Yehovha leyi vuriwaka Michelle yi endzele wansati loyi a vuriwaka Sophia ekaya kakwe.
HA YINI XI PFUMELELA LESWI LESWAKU SWI ENDLEKA?
Michelle: Namuntlha ndzi nyika vanhu hinkwavo va le ndhawini leyi xiphephana lexi. Xi ni nhloko-mhaka leyi nge Xana Wa Swi Lava Ku Kuma Tinhlamulo Ta Swivutiso Swa Nkoka Swinene eVuton’wini? Hi lexi xa wena.
Sophia: Xana xi vulavula hi vukhongeri?
Michelle: Ina. Xiya swivutiso swa tsevu leswi longoloxiweke eka xifunengeto. Hi xihi eka swivutiso leswi—
Sophia: U nge ndzi ku nghena enon’wini. Ku bula na mina ko va ku tidyela nkarhi.
Michelle: Ha yini u vula tano?
Sophia: Mhaka hileswaku a ndzi tshembi leswaku Xikwembu xi kona.
Michelle: Ndza nkhensa leswi u ndzi byeleke ntiyiso. Ndzi kombela ku ku vutisa, Xana i khale u titwa hi ndlela yoleyo?
Sophia: Doo, ndzi kule ndzi ri karhi ndzi nghena kereke. Kambe ndzi tshike ku yi nghena khale swinene.
Michelle: Ndza ku twa. Ndzi nga si rivala, u nge ndzi titivisa. Hi mina Michelle.
Sophia: Hi mina Sophia.
Michelle: Ndza tsaka ku ku tiva Sophia.
Sophia: Na mina.
Michelle: Sophia, a ndzi telanga ku ta ku hundzula. Kambe ndzi kombela ku tiva. Xana ku ni xilo lexi endleke leswaku u kanakana leswaku Xikwembu xi kona?
Sophia: Ina. Mana wa mina u we hi movha eka malembe ya 17 lama hundzeke.
Michelle: I mhaka yo vava yoleyo. Xana u vavisekile?
Sophia: Ina, u lamarile naswona a nga ha koti ku endla nchumu.
Michelle: I mhaka yo biha. U fanele u tsemeke nhlana.
Sophia: Wa vurisa. Leswi hi swona swi endlaka ndzi tivutisa leswaku, Loko Xikwembu xi ri kona, ha yini xi pfumelela leswi leswaku swi endleka? Ha yini Xikwembu xi pfumelela leswaku hi xaniseka hi ndlela leyi?
XANA SWI HOXILE KU VUTISA LESWAKU HA YINI?
Michelle: A yi hoxanga ndlela leyi u titwaka ha yona naswona swivutiso swa wena swa twisiseka. Loko hi xaniseka, swa twala ku vutisa leswaku ha yini. Entiyisweni, hambi ku ri malandza man’wana yo tshembeka ya xinuna ni ya xisati ya le minkarhini ya Bibele ma tivutisile malunghana ni ku xaniseka!
Sophia: Hakunene?
Michelle: Ina. Xana swi lulamile loko ndzi ku komba xikombiso xa le Bibeleni?
Sophia: Ndzi nga swi tsakela.
Michelle: Xiya leswi muprofeta wo tshembeka Habakuku a swi vutiseke Xikwembu, hilaha swi tsariweke hakona eka Habakuku ndzima 1, tindzimana 2 na 3: “Oho Yehovha, xana ndzi ta kombela ku pfuniwa ku fikela rini, kambe u nga yingisi? Xana ndzi ta kombela leswaku u ndzi pfuna emadzolongeni ku fikela rini, kambe u nga ndzi ponisi? Ha yini u ndzi endla ndzi vona leswo biha?” Xana swivutiso sweswo swa fana ni swa wena?
Sophia: Swa fana.
Michelle: Xikwembu a xi n’wi solanga Habakuku hileswi a vutiseke swivutiso sweswo naswona a xi n’wi byelanga leswaku a a fanele a va ni ripfumelo leri engetelekeke.
Sophia: Swa tsakisa.
YEHOVHA U VENGA KU XANISEKA
Michelle: Bibele yi vula leswaku Xikwembu xa ku vona ku xaniseka ka hina naswona xa khathala.
Sophia: U vula njhani?
Michelle: U nge ndzi ku komba xikombiso lexi nga eka Eksoda 3:7. Xana u nga tsakela ku yi hlaya?
Sophia: Swi lulamile. Yi ri: “Yehovha a engeta a ku: ‘Entiyisweni ndzi vone ku xaniseka ka vanhu va mina lava nga aEgipta, naswona ndzi twe xirilo xa vona hikwalaho ka lava va va sindzisaka ku tirha; hikuva ndza ku tiva swinene ku vava loku va ku twaka.’”
Michelle: Ndza nkhensa. Hi ku ya hi tsalwa leri, xana Xikwembu xa swi vona loko vanhu va xona va xaniseka?
Sophia: Swi tikomba xi swi vona.
Michelle: Naswona a xo swi vonela ekule leswi endlekaka. Tlhela u languta xiphemu xo hetelela xa ndzimana leyi. Xikwembu xi te: “Ndza ku tiva swinene ku vava loku va ku twaka.” Xana wolawo ya twala ya ri marito ya Xikwembu lexi nga khathaliki?
Sophia: A swi tano.
Michelle: I ntiyiso, Xikwembu a xo vona swiphiqo swa hina ntsena kambe xi tlhela xi va ni gome loko hi ri ni swiphiqo.
Sophia: I ntiyiso.
Michelle: Ha ha ri ni yinhla yoleyo emianakanyweni, a hi hlaye hi xiyimo xin’wana loko vanhu va Xikwembu va ri eku xanisekeni. Xi tsariwe eka Esaya 63:9. Loko ndzima yoleyo yi sungula yi ri: “Enkarhini wa maxangu ya vona hinkwawo, na yena a a ri emaxangwini.” Kutani xana u nga vula leswaku Xikwembu a xi khumbeka hi ku xaniseka ka vanhu va xona?
Sophia: Ina, swi tikomba swi ri tano.
Michelle: Sophia, ntiyiso hileswaku Xikwembu xa khathala swinene hi hina naswona a xi tsaki loko xi hi vona hi xaniseka. Loko hi twa ku vava, na xona xi twa ku vava.
HA YINI XI NGA TEKI GOZA?
Michelle: Ndzi nga si famba, ka ha ri ni yinhla yin’wana leyi ndzi lavaka leswaku hi bula ha yona.
Sophia: Swi lulamile.
Michelle: Xiya leswi Bibele yi swi vulaka malunghana ni matimba ya Xikwembu. Ndzimana leyi ndzi lavaka hi bula ha yona i Yeremiya 10:12. Ndzi kombela u yi hlaya.
Sophia: Swi lulamile. Yi ri: “I Muendli wa misava hi matimba yakwe, Loyi a simekaka tiko leri noneke ri tiya hi vutlhari byakwe, Loyi a andlaleke matilo hi ku twisisa kakwe.”
Michelle: Ndza nkhensa. A hi anakanyisise hi ndzimana leyi. Xana Xikwembu a xi ta lava matimba yo tala ku va xi tumbuluxa vuako hinkwabyo ni hinkwaswo leswi nga eka byona?
Sophia: Swi tano.
Michelle: Kutani loko Xikwembu xi ri ni matimba ya ku endla swilo hinkwaswo leswi nga kona, xana a hi nga ta langutela leswaku xi na wona matimba ya ku lawula leswi xi swi tumbuluxeke?
Sophia: A swi ta va tano.
Michelle: Tlhela u anakanya hi mana wa wena. Ha yini swi ku vavisa ku n’wi vona a xaniseka?
Sophia: Hikuva ndza n’wi rhandza. I mana wa mina.
Michelle: Loko a wu ri ni matimba yo n’wi horisa namuntlha, xana a wu ta n’wi horisa?
Sophia: Ina.
Michelle: Anakanya hileswi sweswo swi vulaka swona. Bibele yi vula leswaku Xikwembu xa ku vona ku xaniseka ka hina, xa hi twela naswona xi ni matimba lama nga ringanisiwiki na nchumu. Xana u nga anakanya ndlela leyi Xikwembu xi faneleke xi tikhoma ha yona leswaku xi nga ngheneleli xi herisa ku xaniseka hinkwako hi ku copeta ka tihlo?
Sophia: A ndzi nga si tshama ndzi swi anakanya hi ndlela yoleyo.
Michelle: Xana ku nga va ku ri leswaku xi ni xivangelo lexi twalaka xa ku va xi nga ngheneleli xi herisa swiphiqo swa hina? *
Sophia: Swi tikomba xi ri na xona.
Michelle: Ndzi twa riqingho ra wena ri ri eku rileni, kutani ndzi ta vuya nkarhi wun’wana hi ta yisa bulo ra hina emahlweni.
Sophia: Ndza nkhensa. Ndzi nga swi tsakela sweswo. *
Xana ku ni mhaka yo karhi eBibeleni leyi u tshameke u tivutisa yona? Xana ku ni leswi u lavaka ku swi tiva hi tidyondzo to karhi ni leswi Timbhoni ta Yehovha ti swi pfumelaka? Loko swi ri tano, u nga kanakani ku ti vutisa loko u hlangana na tona. Ti ta swi tsakela ku ku pfuna.
^ ndzim. 61 Leswaku u kuma rungula leri engetelekeke, hlaya ndzima 11 ya buku leyi nge, Xana Bibele Yi Dyondzisa Yini Hakunene? leyi kandziyisiweke hi Timbhoni ta Yehovha.
^ ndzim. 64 Xihloko lexi landzelaka eka swihloko leswi swa ntlhandlamano xi ta vulavula hi leswaku ha yini Xikwembu xi pfumelela ku xaniseka.
U Nga Ha Tsakela
XIHONDZO XO RINDZA
Ha Yini Xikwembu Xi Pfumelela Ku Xaniseka?
Buku yo sungula ya Bibele yi hlamusela leswaku ha yini Xikwembu xi pfumelela swilo swo biha swi humelela loko ku ri hileswaku xi ni matimba yo swi herisa?
