Mupatriyaka Yobo u hlamuseriwa tanihi “loyi a a pfumala xisandzu naswona a a lulamile.” (Yobo 1:1) Lota a a vitaniwa ‘munhu wo lulama.’ (2 Petro 2:8) Kasi Davhida yena ku vuriwa leswaku a a endla “leswi a swi lulamile” ematihlweni ya Xikwembu (1 Tihosi 14:8) Hambiswiritano, a hi kambisiseni vutomi bya vanhu lava, lava ku vulavuriwaka ha vona eBibeleni. Hi ta swi xiya leswaku (1) va endle swihoxo (2) hi nga dyondza swo tala eka swikombiso leswi va hi vekeleke swona, naswona (3) vanhu lava nga hetisekangiki va nga swi kota ku tsakisa Xikwembu hakunene.

Yobo u langutane ni swiyimo swo tala swo tika leswi a swi nga n’wi fanelanga. U ve ni langutelo leri hoxeke, a vula leswaku Xikwembu a xi nga khathali hi leswi a a kombisa ripfumelo eka xona. (Yobo 9:20-22) Yobo a a tivona a lulamile lerova eka van’wana a a tivula loyi a lulameke ku tlula Xikwembu.—Yobo 32:1, 2; 35:1, 2.

Lota u hlwele ku endla xiboho lexi a xi ri erivaleni  xi tlhela xi twisiseka. A a tshikileriwe swinene hi ku tikhoma loko biha ka vanhu lava a a hanya na vona eSodoma na Gomora, lerova “a a xaniseka eka moya-xiviri wakwe wo lulama” hikwalaho ka mahanyelo ya vona. (2 Petro 2:8) Xikwembu xi vule leswaku xi ta lovisa miti yoleyo yo homboloka kutani xi nyike Lota nkarhi wa leswaku a ponisiwa ni ndyangu wakwe. Kunene Lota loyi a a karhatekile a ku ta va ku ri yena wo sungula ku famba. Hambiswiritano, hi nkarhi wolowo wo tika u nonokile. Tintsumi leti a ti rhumiwile leswaku ti ta n’wi ponisa ti boheke ku va khoma hi mavoko yena ni ndyangu wakwe ti va humesela ehandle ka muti.—Genesa 19:15, 16.

Davhida yena u tshame a tsandzeka ku tikhoma kutani a endla vuoswi ni nsati wa munhu un’wana. Lexi tsemaka nhlana hi leswaku u ringete ku tumbeta xidyoho xakwe hi ku endla kungu ro dlaya nuna wa wansati loyi. (2 Samuwele ndzima ya 11) Bibele yi vula leswaku leswi Davhida a swi endleke ‘a swi bihile ematihlweni ya Yehovha.’—2 Samuwele 11:27.

Yobo, Lota na Davhida va endle swihoxo, swin’wana swa swona a ku ri swidyoho leswikulu. Kambe hi ta swi xiya leswaku a va rhandza ku tirhela Yehovha hi ku titsongahata ni hi timbilu ta vona hinkwato. Va kombise leswaku va tisola va tlhela va hundzuka. Hikwalaho, Xikwembu xi va rivalerile naswona Bibele yi va vula vavanuna vo tshembeka.

Leswi hi nga hetisekangiki, hi ta swi endla swihoxo. (Varhoma 3:23) Kambe hi fanele hi tisola hi tlhela hi hundzuka.

Xana Yobo, Lota na Davhida va ringetise ku yini ku lulamisa swihoxo swa vona? Yobo a a ri wanuna wo tshembeka. Endzhaku ka loko Xikwembu xi  n’wi kombise xihoxo xakwe, u lulamise mianakanyo yakwe kutani a tisola. (Yobo 42:6) Ndlela leyi Lota a a ku languta ha yona ku tikhoma ko biha ka vanhu va le Sodoma na Gomora, a yi pfumelelana ni milawu ya Xikwembu. Xiphiqo xakwe a ku ri ku nonoka. U hetelele a balekele emitini leyi a yi fanele yi lovisiwa leswaku a pona vuavanyisi bya Xikwembu. U yingisile kutani a nga languti ni swilo leswi a swi siyeke endzhaku. Hambileswi Davhida a endleke xidyoho lexikulu hi ku tlula nawu wa Xikwembu, u kombise leswaku wa tisola hi mbilu hinkwayo kutani a kombela leswaku Xikwembu xi n’wi rivalela.—Pisalema 51.

Ndlela leyi Xikwembu xi va rivaleleke ha yona vavanuna lava, yi kombisa ndlela leyi xi tirhisanaka ha yona ni vanhu lava nga hetisekangiki. Xikwembu ‘xi ku tiva kahle ku vumbeka ka hina, xa tsundzuka leswaku hi ntshuri.’ (Pisalema 103:14) Loko Xikwembu xi swi tiva leswaku hi ta swi endla swihoxo, xi lava leswaku hi endla yini?

Ndzayo leyi Davhida a yi nyikeke n’wana wakwe Solomoni yi hi kombisa ndlela leyi hi nga tsakisaka Xikwembu ha yona. “Wena Solomoni n’wananga, tiva Xikwembu xa tata wa wena u xi tirhela hi mbilu leyi heleleke.” (1 Tikronika 28:9) Mbilu leyi heleleke i yini? I mbilu leyi rhandzaka Xikwembu naswona yi tiyimiseleke ku endla ku rhandza ka xona. A hi mbilu leyi hetisekeke kambe hi leyi navelaka ku tirhela Xikwembu hi ku titsongahata naswona yi tiyimiseleke ku lulamisiwa. Ku rhandza Xikwembu ni ku titsongahata swi endle leswaku Yobo a “pfumala xisandzu,” Lota a va la ‘lulameke’ naswona Davhida a ‘endla ntsena leswi lulameke’ ematihlweni ya Xikwembu. Hambileswi va endleke swihoxo, va swi kotile ku tsakisa Xikwembu.

Loko hi anakanya swilo swo biha leswi hi navelaka onge a hi nga fanelanga hi swi anakanyile, hi vula swilo leswi hi tisolaka ha swona kumbe hi endla swilo leswi hi swi xiyeke endzhaku leswaku swi hoxile, a hi tekeleleni xikombiso lexi vavanuna lava hi vulavuleke ha vona va hi vekeleke xona. Xikwembu xa swi tiva leswaku a hi hetisekanga sweswi. Hambiswiritano, xi lava leswaku hi xi rhandza hi tlhela hi tikarhatela ku xi yingisa. Loko hi endla tano hi nga tiyiseka leswaku hi ta swi kota ku tsakisa Xikwembu.