Xitirese i ndlela leyi miri wa wena wu angulaka ha yona loko wu langutane ni xiyimo xo tika. Byongo byi endla leswaku tihomoni ti hangalaka ni miri wa wena, leswi swi endla leswaku mbilu yi bela ehenhla ni nsusumeto wa ngati wu tlakuka, swi tlhela swi endla leswaku mahahu ya wena ma kukumuka kumbe ma vambeka ni misiha ya wena yi gwimbeka. Hi ku copeta ka tihlo miri wa wena wu va wu lunghekele ku endla swo karhi. Loko se xitirese xi hundzile, miri wa wena wu tlhela wu vuyela eka xiyimo lexi tolovelekeke.

Xitirese i ndlela leyi miri wa wena hi ntumbuluko wu angulaka ha yona loko ku ri ni xiyimo xo tika kumbe lexi nga ni khombo. Xitirese xi sungula ebyongweni. Ku karhateka hi ndlela leyinene swi ku pfuna leswaku u hatla u teka goza nakambe swi nga ku pfuna leswaku u fikelela leswi u lavaka ku swi endla. Ku nga ha va hi nkarhi wa xikambelo, wa inthavhiyu ya ntirho kumbe loko u lava ku tlanga ntlangu wo karhi. Hambiswiritano ku karhateka nkarhi wo leha swi nga ku vavisa. Loko u tshama u karhatekile, u nga ha sungula ku vabya, u tshama u hlundzukile ni ku rivala hi ku hatlisa. Mahanyelo ya wena ni ndlela leyi u khomaka van’wana ha yona swi nga ha cinca. Ku tshama u ri ni xitirese swi nga endla leswaku u sungula ku kukutlela byala ni mahanyelo man’wana lama nga basangiki. Swi nga ha ku vangela ntshikilelo wa mianakanyo ku nyangatseka ni ku anakanya hi ku tihinga.

I ntiyiso leswaku xitirese a xi nge hi vavisi hi ndlela leyi fanaka kambe xi nga hi vangela mavabyi yo tala. Xi nga ha vavisa swirho hinkwaswo emirini wa hina.