TSALWA: “Loyi a hlwelaka ku hlundzuka wa antswa ku ri ni wanuna wa matimba.”—Swivuriso 16:32.

LESWI SWI VULAKA SWONA: Ha vuyeriwa loko hi dyondza ku lawula ndlela leyi hi titwaka ha yona. Hinkwerhu hi pfa hi hlundzuka mikarhi yin’wana kambe loko ho kariha ku tlula mpimo hi nga nyanyisa timhaka. Valavisisi va manguva lawa, va kombisa leswaku vanhu lava tshamaka va hlundzukile hakanyingi va endla kumbe ku vula swilo leswi va tisolaka ha swona hi ku famba ka nkarhi.

LESWI U NGA SWI ENDLAKA: U nga pfumeleli ku hlundzuka ku ku lawula. Vanhu van’wana va ehleketa leswaku vanhu lava hlundzukaka ngopfu va ni matimba kambe kahlekahle va ni xiphiqo. “Munhu la nga swi kotiki ku lawula moya wakwe u fana ni muti lowu boxekeke, lowu nga riki na rirhangu.” (Swivuriso 25:28) Lexi nga hi pfunaka ku lawula ku hlundzuka ka hina, i ku rhanga hi kuma ntiyiso wa mhaka hi nga si angula. “Kunene ku twisisa ka munhu ku vohlisa ku hlundzuka kakwe.” (Swivuriso 19:11) I swa nkoka ku twisisa mhaka hi vuenti hikuva swi ta ku pfuna ku lawula mintlhaveko ya wena.

TSALWA: “Tikombeni mi ri ni ku nkhensa.”—Vakolosa 3:15.

LESWI SWI VULAKA SWONA: Vanhu lava khensaka va tshama va tsakile. Hambi ku ri vanhu lava nga tshama va loveriwa kumbe ku lahlekeriwa hi nchumu wa nkoka, va yi tiva mhaka leyi. Va vula leswaku lexi va pfuneke ku horisa mbilu i ku tlangela leswi va nga na swona ku nga ri ku ehleketa hi leswi va lahlekeleke.

LESWI U NGA SWI ENDLAKA: Siku rin’wana ni rin’wana tsala swilo leswi u swi tlangelaka. Hambi swo va switsongo. Khensa swilo hambiloko swi ri switsongo, swo tanihi ku saseka ka dyambu loko ri xa, mabulo yo tsakisa ni vutomi. Swilo swo  tano swi nga endla u tsaka loko u tinyika nkarhi wo ehleketa ha swona ni ku swi tlangela.

I swa nkoka ku ehleketa hi swilo leswi u nga khensaka swirho swa ndyangu ni vanghana va wena ha swona. Loko u kumisisa swilo leswi ku tsakisaka hi munhu wo karhi n’wi byele kumbe u n’wi tsalela papila, imeyili kumbe u n’wi rhumela rungula hi foni. Leswi swi ta tiyisa vunghana bya n’wina ni ku ku pfuna leswaku u kuma ntsako lowu tisiwaka hi ku nyika.—Mitirho 20:35.

PAPALATA TIMHOLOVO.

“Ku sungula ka mholovo ku fana niloko munhu a pfulela mati; hikwalaho loko mholovo yi nga si pfuka, suka.”—SWIVURISO 17:14.

PAPALATA KU VILELA HI VUMUNDZUKU.

“Mi nga tshuki mi vilela hi siku leri tlhandlamaka, hikuva siku leri tlhandlamaka ri ta va ni mivilelo ya rona. Vubihi bya siku rin’wana ni rin’wana byi enele rona”—MATEWU 6:34.

RHANGA U EHLEKETA U NGA SI ENDLA NCHUMU.

“Vuswikoti byo ehleketa byi ta ku rindza, ku twisisa ku ta ku hlayisa.”—SWIVURISO 2:11.