Loko hi fambela ekule ni vanhu lava hi nga va rhandziki hi ya hi hlanganyetela xihlawuhlawu etimbilwini ta hina. Loko hi endla xinghana ni vanhu lava fanaka na hina ntsena, hi nga ha tibyela leswaku ndlela leyi hi endlaka swilo ha yona hi yona ntsena ndlela leyinene yo endla swilo.

‘Rhandzanani hi mbilu yo basa.’—2 VAKORINTO 6:13.

Hi dyondza yini eka ndzimana leyi? Rito leri nge, “mbilu” ri nga ha vula ndlela leyi hi titwaka ha yona. Loko hi rhandza vanhu va rixaka ra hina ntsena ha ti pfalela, a hi nge tolovelani ni vanhu van’wana. Lexi nga hi pfunaka i ku va hi endla xinghana ni vanhu vo hambanahambana.

Loko hi ya hi va tiva ku antswa vanhu vo karhi, swi endla leswaku hi ya swi twisisa leswaku hikwalaho ka yini va endla swilo hi ndlela yo karhi. Loko hi ya hi va tolovela, hi sungula ku va teka va fana na hina. Hi ya hi va rhandza, hi tsaka na vona hi tlhela hi rila na vona.

Xiya ntokoto wa Nazaré. A a venga vahlampfa. Loko a hlamusela leswi n’wi pfuneke, u ri: “Ndzi tinyike nkarhi wo va na vona ndzi tlhela ndzi tirha na vona. Loko ndzi ri karhi ndzi tolovelana na vona ndzi kume leswaku a va hi ndlela leyi vanhu va va tekaka ha yona. Loko u va ni vanghana va rixaka rin’wana u sungula ku va rhandza ni ku va teka va ri va nkoka lerova xihlawuhlawu xi namba xi ku nkwee!”

Tinyike nkarhi wo vulavula ni vanhu lava humaka eka tiko rin’wana, rixaka kumbe lava vulavulaka ririmi rin’wana. U nga ha

• Va kombela va ku byela swo karhi hi vona vini.

• Va rhamba leswaku va ta dya na wena.

• Va yingisela loko va ku byela leswi va humeleleke evuton’wini ni leswi nga swa nkoka eka vona.

Loko u ringeta ku twisisa leswi nga tshama swi va endlekela evuton’wini leswi endleke va va hi ndlela leyi va nga ha yona namuntlha, swi ta endla leswaku u va rhandza.