TA RIVALA
Leswi Endlekaka Le Amerika
Swiviko swa mahungu swa le Amerika swi kombisa leswaku vutlhari bya Bibele i bya nkoka naswona a byi hundzeriwi hi nkarhi.
Leswaku U Hunguta Ntshikilelo—Hunguta Ku Hlaya Tie-mail
Ndzavisiso lowu endliweke eVancouver le Canada wu kombisa leswaku vanhu va nga hunguta ntshikilelo loko va hlaya tie-mail kanharhu ntsena hi siku ematshan’weni yo tihlaya nkarhi ni nkarhi. Kostadin Kushlev, loyi a kongomisa ndzavisiso wolowo u vule leswi loko a gimeta: “Vanhu swa va tikela ku papalata ku tshamela ku hlaya tie-mail, kambe ku endla tano swi nga va hungutela ntshikilelo.”
XIVUTISO XO ANAKANYISISA HA XONA: Leswi hi hanyaka eka “minkarhi ya mangava leyi swi nonon’hwaka ku langutana na yona,” xana a hi fanelanga hi lava tindlela to hunguta ntshikilelo?
Ku Sirheleriwa Ka Tihlampfi
Nhlangano wa vandla ro hlayisa swiharhi wu vula leswaku, eBelize ni le swihlaleni swin’wana swa Caribbean “xiphiqo xa ku hela ka tinhlampfi se xa antswa hi leswi ku nga ni tindhawu leti swi nga ha pfumeleriwiki ku phasa tinhlampfi eka tona.” Wu tlhela wu ku: “Swi nga ha teka lembe ku ya eka malembe ya tsevu leswaku ku va ni ku andza ka tinhlampfi etindhawini leti swi nga pfumeleriwiki ku phasa tihlampfi eka tona kambe leswaku ti andza swinene swi nga ha teka malembe yo tala swinene.” Janet Gibson wa nhlangano wolowo loko a vulavula hi le Belize u ri: “A swi kanakanisi leswaku ku sivela ku phasa tinhlampfi etindhawini to karhi swi nga ha pfuna leswaku ku papalatiwa xiphiqo xa ku hela ka tinhlampfi ni ku hlayisa ntumbuluko.”
XIVUTISO XO ANAKANYISISA HA XONA: Ku va ntumbuluko wu kota ku ti vuyetela, xana a swi kombisi leswaku ku ni Muvumbi?
Madzolonga eBrazil
Phephahungu ra Agência Brasil ri vula leswaku madzolonga ma ya ma nyanya eBrazil. Hi 2012, nhlayo ya vanhu lava dlayiwaka yi tlakuke yi hundza eka 56 000, ku nga nhlayo ya le henhla ku tlula malembe laman’wana leyi Ndzawulo ya Rihanyo yi tshameke yi yi vika. Luís Sapori mutivi wa vuhlayiseki bya vanhu, u vula leswaku ku andza koloko ku kombisa leswaku vanhu va fe mapfalo. Loko vanhu va sungula ku ba milawu hi makatla, “va endla swilo swo tivana na vona hi ndlela ya tihanyi.”
XANA A WU SWI TIVA? Bibele yi vule leswaku rirhandzu “ri ta hola” naswona ku kala nawu ku ta andza.
