1-2. (a) Hikwalahokayini lava ha ku tekanaka va fanele va tshemba Yehovha? (Pisalema 37:3, 4) (b) Hi ta kambisisa yini eka nhlokomhaka leyi?

XANA u lava ku nghenela vukati kumbe wa ha ku byi nghenela? Loko swi ri tano, a swi kanakanisi leswaku u tiyimisele ku tiphina hi vutomi ni munhu loyi u n’wi rhandzaka swinene. I ntiyiso leswaku evukatini ku nga ha va ni mitlhontlho naswona ku ni swiboho swa nkoka leswi vatekani va nga ha bohekaka ku swi teka. Ndlela leyi mi swi tlhantlhaka hayona swiphiqo swa n’wina ni swiboho leswi mi swi tekaka, swi ta khumba ntsako wa n’wina hi ku famba ka nkarhi. Loko mi titshega hi Yehovha, mi ta teka swiboho swa vutlhari naswona vukati bya n’wina byi ta va bya ka tsakani na rhulani. Kambe loko mi nga endli swilo hi ndlela ya Yehovha, swilo a swi nge mi fambeli kahle naswona swi ta mi tikela ku tsaka evukatini bya n’wina.—Hlaya Pisalema 37:3, 4.

² Hambileswi nhlokomhaka leyi yi kongomisiweke eka vatekani lavantshwa kambe yi ta bula hi swiphiqo leswi vatekani hinkwavo va nga ha langutanaka na swona. Yi ta tlhela yi hlamusela leswi hi nga swi dyondzaka eka vavanuna ni vavasati va le Bibeleni. Swikombiso leswi swa le Bibeleni swi ta hi dyondzisa tidyondzo ta nkoka leti hi nga ti tirhisaka evuton’wini bya hina ku katsa ni le vukatini. Nakambe hi ta vona leswi hi nga swi dyondzaka eka vatekani van’wana va manguva lawa.

3-4. Hi yihi mitlhontlho leyi lava ha ku tekanaka va nga ha langutanaka na yona?

³ Van’wana va nga ha kucetela vatekani lavantshwa leswaku va hanya hi ndlela leyi vanhu vo tala namuntlha va hanyaka hayona.  Hi xikombiso, vatswari ni maxaka va nga ha kucetela vatekani leswaku va hatla va tswala vana. Kumbexana vanghana ni swirho swa mindyangu swi va kucetela ku xava yindlu ni nhundzu yo tala.

⁴ Loko vatekani va nga tivoneli, va nga teka swiboho leswi nga ta va nghenisa hi nhloko eswikweletini. Sweswo swi ta endla leswaku nuna ni nsati va boheka ku tirha tiawara to tala leswaku va ta kota ku hakela swikweleti. Ntirho wolowo wu nga ha endla swi va tikela ku va ni nkarhi wo dyondza Bibele, ku va ni dyondzo ya ndyangu ni ku ya entirhweni wo chumayela. Nakambe va nga ha sungula ku xwa etinhlengeletanweni ta vandlha ku va kuma mali leyi engetelekeke kumbe hileswi va lavaka ku hlayisa mitirho ya vona. Sweswo swi nga endla va nga ha tiphini hi ku tirhela Yehovha hilaha va nga kotaka hakona.

5. U dyondza yini eka xikombiso xa Klaus na Marisa?

⁵ Swikombiso swa van’wana swi hi dyondzisa leswaku ku hlongorisa swilo swa misava leyi a swi wu tisi ntsako. Xiya leswi vatekani lava vuriwaka Klaus na Marisa va swi dyondzeke emhakeni leyi. * Loko va ha ku tekana, va endle xiboho xo tirha havumbirhi bya vona leswaku va ta hanya vutomi bya vulovolovo. Kambe sweswo a swi va tiselanga ntsako wa xiviri. Klaus u ri: “A hi ri ni swilo hinkwaswo leswi a hi swi lava kambe a hi hanya vutomi lebyi nga riki na xikongomelo. Ku vula ntiyiso, swilo a swi nga fambi kahle naswona a hi tshama hi tshikilelekile.” Swi nga endleka na wena u tivonele hi ya wena leswaku ku va ni swilo swo tala a swi ku tiselanga ntsako wa xiviri. Loko swi ri tano, u nga wi mapa. Ku dyondza eka swikombiso leswinene swa vanhu van’wana swi nga ku pfuna leswaku u endla ku cinca. A hi sunguleni hi kambisisa leswi tinhloko ta mindyangu ti nga swi dyondzaka eka xikombiso xa Hosi Yehoxafati.

6. Hosi Yehoxafati u xi tirhise njhani xitsundzuxo lexi nga eka Swivuriso 3:5, 6 leswaku a langutana ni swiphiqo swakwe?

⁶ Vavanuna lava tekeke, xana mikarhi yin’wana mi pfa mi tshikileriwa hi vutihlamuleri bya n’wina? Loko swi ri tano, xikombiso xa Hosi Yehoxafati xi nga mi pfuna. A ku ri vutihlamuleri byakwe tanihi hosi leswaku a sirhelela vanhu vakwe! Xana u swi kote njhani ku byi hetisisa kahle vutihlamuleri byakwe lebyi nga oloviki? U endle hinkwaswo leswi a nga swi kotaka leswaku a sirhelela vanhu vakwe. U tiyise makhumbi ya Yuda ni ku letela masocha yo tlula 1 160 000 lawa a ma ri vuswikoti. (2 Tikr. 17:12-19) Kambe hi ku famba ka nkarhi, u langutane ni ntlhontlho lowukulu. Vuthu lerikulu ra Vaamoni, Vamowabu ni vavanuna va le ndhawini ya tintshava ta Seyiri va n’wi xungetile yena ni ndyangu wakwe ni lava a a va fuma. (2 Tikr. 20:1, 2) Xana Yehoxafati u endle yini? U kombele mpfuno ni matimba lama humaka eka Yehovha. A ku ri xiboho xa vutlhari lexi kumekaka eka Swivuriso 3:5, 6. (Yi hlaye.) Xikhongelo xa Yehoxafati xo titsongahata lexi kumekaka eka 2 Tikronika 20:5-12, xi kombisa ndlela leyi a a n’wi tshemba hayona Tata wakwe wa rirhandzu la nge matilweni.  Xana Yehovha u xi hlamule njhani xikhongelo xa Yehoxafati?

7. Xana Yehovha u xi hlamule njhani xikhongelo xa Yehoxafati?

⁷ Yehovha u vulavule na Yehoxafati hi ku tirhisa Yahaziyele lowa mulevhi. U te: “Yimani mi nga tsekatseki, mi vona ndlela leyi Yehovha a nga ta mi lwela ha yona.” (2 Tikr. 20:13-17) Leyi a ku nga ri yona ndlela leyi tolovelekeke yo lwa nyimpi! Hambiswiritano, a ku nga ri swiletelo leswi humaka eka munhu kambe a swi huma eka Yehovha. Leswi a a tshemba Xikwembu hi mbilu yakwe hinkwayo, Yehoxafati u endle leswi a byeriweke swona. Loko a huma ni vanhu vakwe leswaku va ya lwa ni vuthu ra valala, a nga rhangisanga masocha lawa a ma ri ni vuswikoti kambe u rhangise vayimbeleri lava a va nga hlomanga. Yehovha a nga n’wi khomisanga tingana Yehoxafati kambe U n’wi hlulele vuthu ra valala vakwe.—2 Tikr. 20:18-23.

8. Vavanuna lava tekeke va nga dyondza yini eka xikombiso xa Yehoxafati?

⁸ Vavanuna lava tekeke, mi nga dyondza swo tala eka xikombiso xa Yehoxafati. Leswi ku nga vutihlamuleri bya n’wina ku sirhelela mindyangu ya n’wina ni ku yi khathalela, mi wa mi pfuka leswaku mi endla tano. Mikarhi yin’wana loko mi langutana ni swiphiqo, mi nga ha tibyela leswaku mi nga swi kota ku ti lulamisela swona hi n’wexe. Kambe mi fanele mi hlula moya wo titshemba ngopfu. Tinyikeni nkarhi wo khongela mi kombela mpfuno eka Yehovha. Tlhelani mi khongela hi timbilu ta n’wina hinkwato ni vasati va n’wina. Lavani nkongomiso lowu humaka eka Xikwembu hi ku dyondza Bibele, tibuku leti humesiwaka hi nhlangano ni ku tirhisa leswi mi swi dyondzaka. Van’wana a va nge pfumelelani na swona swiboho swa n’wina leswi fambisanaka ni milawu ya le Bibeleni naswona va nga ha vula leswaku mi humbiwe mano. Nakambe va nga ha vula leswaku mali nileswi yi kotaka ku swi xava hi swona ntsena leswi nga sirhelelaka mindyangu ya n’wina. Kambe mikarhi hinkwayo, tsundzukani xikombiso xa Yehoxafati. U swi kombise hi swiendlo leswaku a a tshemba Yehovha. Yehovha a nga n’wi tshikanga wanuna yoloye wo tshembeka naswona na n’wina a nge mi tshiki. (Ps. 37:28; Hev. 13:5) Xana vatekani va nga endla yini leswaku va tiphina hi vutomi?

9. Hi nga ku yini hi muprofeta Esaya ni nsati wakwe?

⁹ Muprofeta Esaya ni nsati wakwe a va teka ku tirhela Yehovha swi ri swa nkoka evuton’wini bya vona. Esaya a a ri muprofeta naswona swi nga endleka leswaku nsati wakwe na yena a a profeta hikuva a a vitaniwa “muprofeta.” (Esa. 8:1-4) Swi le rivaleni leswaku Esaya ni nsati wakwe a va rhangisa ntirho wa Yehovha evuton’wini bya vona. Mawaku xikombiso lexinene lexi va xi vekeleke vatekani namuntlha!

10. Xana ku dyondza vuprofeta bya le Bibeleni swi nga va pfuna njhani vatekani leswaku va tiyimisela ku tirhela Yehovha hilaha va nga kotaka hakona?

¹⁰ Vatekani va nga teka ku tirhela Yehovha evuton’wini bya vona swi ri swa nkoka hi ku endla leswi va nga swi kotaka entirhweni wakwe. Va nga tiyisa ndlela leyi va n’wi tshembaka hayona Yehovha hi ku dyondza swin’we vuprofeta bya le Bibeleni ni ku vona ndlela leyi byi hetisekeke hayona. * (Tito 1:2) Nakambe va nga ha anakanyisisa hileswi va nga swi endlaka leswaku va pfuneta eka ku hetiseka ka vuprofeta lebyi nga eBibeleni. Hi xikombiso, va nga pfuneta eka lebyi vuriweke hi Yesu bya leswaku mahungu lamanene ma ta chumayeriwa emisaveni hinkwayo makumu ma nga se fika. (Mat. 24:14) Loko vatekani va tiyiseka leswaku  vuprofeta bya le Bibeleni bya hetiseka namuntlha, va ta ya va navela ku endlela Yehovha hinkwaswo leswi va nga swi kotaka.

11. Xana Prisila na Akhwila a va kota ku endla yini naswona hikwalahokayini?

¹¹ Vatekani lavantshwa va nga dyondza swo tala eka Prisila na Akhwila, vatekani lava a va ri Vayuda lava a va tshama eRhoma. Va twe mahungu lamanene mayelana na Yesu kutani va va Vakreste. Swi le rivaleni leswaku a va tiphina hi vutomi. Kambe swilo swi sungule ku cinca loko Klawudiyo Mufumi wa le Rhoma a lerisa Vayuda hinkwavo leswaku va suka eRhoma. Xiya ndlela leyi a swi ta byi cinca hayona vutomi bya Prisila na Akhwila. A va ta boheka ku rhurha endhawini leyi va yi toloveleke ivi va ya ekaya lerintshwa ni ku tlhela va sungula bindzu ra vona ra matende endhawini leyintshwa. Xana ku cinca koloko a ku ta va sivela leswaku va nga rhangisi mfumo evuton’wini bya vona? Swi nga endleka u yi tiva nhlamulo. Loko va ri ekaya ra vona lerintshwa eKorinto, Prisila na Akhwila va pfunete evandlheni leri a va ri eka rona ni ku tirha na muapostola Pawulo leswaku va tiyisa vamakwerhu. Hi ku famba ka nkarhi va rhurhele eka doroba rin’wana leri a ri ri ni xilaveko xa vachumayeri. (Mit. 18:18-21; Rhom. 16:3-5) Hakunene a va tshama va khomekile ni ku tiphina swinene hi vutomi!

12. Ha yini vatekani va fanele va ti endlela swiboho swo tirhela Yehovha?

¹² Vatekani va nga tekelela Prisila na Akhwila hi ku rhangisa mfumo ku sungula evuton’wini bya vona. Nkarhi lowunene wo tiva leswi vatekani va lavaka ku swi fikelela evuton’wini bya vona hiloko va nga se tekana. Loko va teka swiboho swo tirhela Yehovha ni ku tikarhatela ku swi fikelela, va ta tivonela hi ya vona ndlela leyi Yehovha a nga ta va pfuna hayona evuton’wini bya vona. (Ekl. 4:9, 12) Xiya xikombiso xa Russell na Elizabeth. Russell u ri: “Loko hi nga se tekana, hi vulavule hileswi a hi lava ku swi endlela Yehovha.” Elizabeth u ri: “Hi endle tano leswaku loko hi endla swiboho swin’wana hi ku famba ka nkarhi, hi nga swi pfumeleli swi hi sivela ku fikelela swiboho swo tirhela Yehovha.” Swiyimo swa vona swi va pfumelerile leswaku va rhurhela eMicronesia ku ya tirha laha a ku ri ni xilaveko xa vachumayeri.

13. Hilaha Pisalema 28:7 yi vulaka hakona, hi ta vuyeriwa hi yini loko hi tshemba Yehovha?

 ¹³ Ku fana na Russell na Elizabeth, vatekani vo tala va teke xiboho xo heta nkarhi wo tala entirhweni wo chumayela hi ku hlawula ku nga lavi swilo swo tala. Loko vatekani va lava ku fikelela swo tala entirhweni wa Yehovha ni ku tirha hi matimba leswaku va swi fikelela, va ta vuyeriwa swinene. Va ta wu vona nkhathalelo wa Yehovha, va ta ya va n’wi tshemba naswona va ta tsaka swinene.—Hlaya Pisalema 28:7.

14. Muapostola Petro ni nsati wakwe va swi kombise njhani leswaku va xi tshemba xitshembiso xa Yehovha lexi kumekaka eka Matewu 6:25, 31-34?

¹⁴ Vatekani va nga tlhela va dyondza eka xikombiso xa Petro ni nsati wakwe. Kwalomu ka tin’hweti ta tsevu a ha ku hlangana na Yesu, muapostola Petro a a fanele a teka xiboho xa nkoka. A a tihanyisa hi bindzu ro phasa tihlampfi. Hikwalaho, loko Yesu a rhamba Petro leswaku a n’wi landzela nkarhi hinkwawo, a a fanele a rhanga a anakanyisisa hi xiyimo xa ndyangu wakwe a nga se teka xiboho xexo. (Luka 5:1-11) Kambe Petro u xi amukerile xirhambo xo chumayela na Yesu. Xexo a ku ri xiboho xa vutlhari! Nakambe hi nga vula hi nga tipfinyingi leswaku nsati wa Petro na yena u xi seketerile xiboho lexi. Bibele yi vula leswaku u seketele Petro hi ku fambafamba na yena endzhaku ka loko Yesu a pfuxiwile. (1 Kor. 9:5) Xikombiso lexinene xa yena tanihi nsati loyi a nga Mukreste xi endle leswaku swi olovela Petro ku tsundzuxa vavanuna ni vavasati lava nga Vakreste. (1 Pet. 3:1-7) A swi kanakanisi leswaku Petro ni nsati wakwe a va xi tshemba xitshembiso xa Yehovha xa leswaku U ta va khathalela loko va rhangisa Mfumo ku sungula evuton’wini bya vona.—Hlaya Matewu 6:25, 31-34.

15. U dyondza yini eka xikombiso xa Tiago na Esther?

¹⁵ Loko ku ri hileswaku u ni malembe se u nghenele vukati, i yini leswi nga ku pfunaka leswaku u endla swo tala entirhweni wa Yehovha? Ndlela yin’wana leyi nga ku pfunaka i ku dyondza leswi endlekeleke vatekani van’wana. Hi xikombiso, u nga ha ti hlayela nhlokomhaka leyi nge “Va Tinyiketele Hi Ku Tirhandzela.” Tinhlokomhaka teto ti pfune Tiago na Esther ku nga vatekani lava humaka eBrazil leswaku va navela ku ya tirha laha ku nga ni xilaveko lexikulu. Tiago u ri: “Loko hi hlaya hi mitokoto ya ndlela leyi Yehovha a pfuneke malandza yakwe ya sweswi, swi endle leswaku na hina hi lava ku n’wi tshika a hi kongomisa ni ku hi khathalela.” Va rhurhele eParaguay, laha va nga fika va tirha eka nsimu ya Xiputukezi ku sukela hi 2014. Esther u ri: “Tsalwa rin’wana leri hi ri rhandzaka swinene i Vaefesa 3:20. Marito lama nga eka ndzimana leyi, hi ma vone ma va ntiyiso eka hina loko hi ri karhi hi tirhela Yehovha ku ringana malembe yo tala.” Eka papila rero leri yaka eka Vaefesa, Pawulo u vule leswaku Yehovha u ta hi nyika swo tala leswi katsaka ni leswi hi nga swi kombelangiki. Ninamuntlha marito lawa a ma weli ehansi!

16. Vatekani lava ha riki vantshwa va nga wu kuma kwihi mpfuno loko va lava ku teka swiboho?

¹⁶ Vatekani lava ha riki vantshwa va nga dyondza swo tala eka van’wana lava titshegeke hi Yehovha. Vatekani van’wana swi nga ha endleka va hete nkarhi wo tala entirhweni wa nkarhi hinkwawo. Hikwalahokayini u nga kombeli switsundzuxo swa vona loko u lava ku teka swiboho? Yoleyo i ndlela yin’wana leyi kombisaka leswaku wa n’wi tshemba Yehovha. (Swiv. 22:17, 19) Nakambe vakulu va nga pfuna vatekani lava ha riki vantshwa leswaku va tiendlela swiboho swo tirhela Yehovha ni ku lwela ku swi fikelela.

17. Ku endleke yini hi Klaus na Marisa naswona hi dyondza yini eka xikombiso xa vona?

¹⁷ Mikarhi yin’wana xiboho lexi hi nga ha xi tekaka  xo endla swo tala entirhweni wa Yehovha, xi nga ha cinca hi ku copeta ka tihlo. Xiya leswi endlekeleke Klaus na Marisa lava hi buleke ha vona laha henhla. Endzhaku ka malembe manharhu va tekanile, va rhurhele ekaya ra vona leswaku va ya pfuneta eka ntirho wo aka erhavini ra le Finland. Hambiswiritano, va byeriwe leswaku a va fanelanga va tlula tin’hweti ta tsevu va ha tshama kwalaho. Eku sunguleni swi va hete matimba. Kambe hi ku famba ka nkarhi va rhambiwe ku ya eka khoso yo dyondza ririmi ra Xiarabu naswona sweswi hi vulavulaka, va tiphina hi ku chumayela eka nsimu ya Xiarabu etikweni rin’wana. Loko Marisa a hlamusela hi swona, u ri: “A swi ndzi chavisa ku suka ekaya ra mina ivi ndzi tshembela eka Yehovha hi ku helela. Kambe ndzi vone Yehovha a hi pfuna hi tindlela to tala leti a hi nga ti ehleketi. Loko ndzi vona ndlela leyi Yehovha a a hi pfuna hayona, ndlela leyi ndzi n’wi tshembaka hayona yi ye yi kula.” Hilaha hi swi voneke hakona, u nga tiyiseka leswaku na wena Yehovha u ta ku pfuna loko u n’wi tshemba hi ku helela.

18. Xana vatekani va nga endla yini leswaku va ya emahlweni va tshemba Yehovha?

¹⁸ Vukati i nyiko ya risima leyi humaka eka Yehovha. (Mat. 19:5, 6) U lava leswaku vatekani va tiphina hi yona. (Swiv. 5:18) Vatekani lava ha riki vantshwa, hikwalahokayini mi nga kambisisi ndlela leyi mi wu tirhisaka hayona nkarhi wa n’wina? Xana mi endla hinkwaswo leswi mi nga swi kotaka ku kombisa Yehovha leswaku ma yi tlangela nyiko ya risima leyi a mi nyikeke yona? Vulavulani na Yehovha hi xikhongelo. Dyondzani Rito ra Xikwembu ivi mi vona leswi nga mi pfunaka exiyin’weni xa n’wina. Ku engetela kwalaho, tirhisani xitsundzuxo lexi Yehovha a mi nyikaka xona. Mi ta tiyiseka hi ntsako lowu mi nga ta va na wona ni ku hanya vutomi lebyi nga ni xikongomelo loko mi teka ku tirhela Yehovha tanihi nchumu wa nkoka evuton’wini bya n’wina!